Jn dieser Krieges Erndt vnd vberheissen zeit
In der man was man schawt vor Hitze schawt ver-
schmachten
Seid Jhr G Jungfraw Brautt glückselig wol zu achten
Weil euch der Liebe glutt selbst schatten hat bereit
Jhr sitzt bey ewrem Baum vnd trotzt das grimme leid
Das vnser Vaterland eh’ alß wir noch gedachten
Versenget vnd verbrand das. was die felder brachten
Was in den Gärten blüht mit Schwerdt vnd flammen
may’t.
Der Baum den jhr erkießt wird jederzeit euch decken:
Euch wird kein trüber sturm kein vngewitter schrecken
Die Zweige werden stäts voll schöner blätter stehn
Die äste die ihr schon seht voll von blütten schweben
Die werden künfftig euch gewündsche Früchte geben
Diß Laub wird glaubt gewiß von keinem frost vergehn.