Der Höchste rufft vns von dem Marckt der Welt
In den Weinberg den sein Sohn hat mit Schweiß vnd
Blut genetzet
Den Er vnablößlich bawt der so werth vor jhm geschätzet
Daß Er sich selbst darumb in Todt gestelt
Doch wir sind die den müssig-gehn gefält
Vnsers ersten Morgenslicht ward mit nichts-thun hingẽ-
setzet:
Jtzt nun vnß der Mittag druckt hat vns Hitz’ vnd last ver-
letzet
Vnd was noch mehr von fleissig-seyn abhält.
Auff Menschen auff! gebt acht auff ewre sachen
Die Nacht bricht an der Todt wil abend machen.
Denckt wie werden wir bestehen wenn GOtt selbst wird
Rechnung hegen?
Er siht zwar den vnd mehr denn gnädig an
Der eine stund jhm fleissig dienen kan
Doch Er heist auch von Jhm gehn die die seinen grim’erregẽ.