Sol dich der höchste GOTT mit Vatter trew anblicken
So must du jede zeit voll sanffter Geister sein
Wer nichts als richten kan wer Rach’ vnd grimme pein
Stets auf den Rächsten rnfft wird endlich in den stricken
Deß Sathans in dem Strom der Schwefelbach ersticken.
Gnad ist vmb gnade feyl wer gibt nimm’t häuffig eyn.
Vnd wie dein Maß; so voll so richtig fest vnd rein
Wird man auff deine Schos die gegenwehre schicken.
Wer Laster straffen wil vnd selbst verbrechen libt
Gleicht dem der blind die Faust als Leiter blinden gibt
Wilst du ins Brudern Aug auch keinen Splitter leiden
So fange bey dir an vnd nimb die Balcken hin
Die Balcken die dir selbst verdunckeln Aug vnd Sin
Vnd fleuch diß selbst was du lehrst deinen Nächsten meiden.