O Selig wer recht arm auff Christum einig trauet!
Sein ist der Himmel reich! O selig dessen Muth
Vol sanffter Geister ligt! sein ist der Erden Gutt.
O selig dem hier stets vor schweren Straffen grauet
Der nichts als klagen kan! Gott der sein Elend schauet
Wischt endlich von ihm ab die herbe Thränen Fluth!
O selig den nur dürst in allem was er thut
Nach recht vnd heilig-seyn der nur auff Tugend bauet!
Sein Wuntsch wird reichlich voll O selig wehm die Noth
Deß Nechsten bricht durchs Hertz! fürwar es jammert Gott
Gott den ein reiner Geist' von Angesicht wird kennen
Der den so Frieden liebt sein Kind heist vnd sein Haus
Dem auffschleust den man hier jagt vmb die Wahrheit auß
Der die man alhier schlegt vnd schmäht wird selig nennen.