TIERZO

Cerriglio na gran museca fa fare, Rienzo s'addorme e sùbbeto nce 'ncappa; Cecca se ne 'ncrapiccia, e de sbignare 'Ncognete se confarfa, e fa che scappa:

Se ne sfilano 'n frotta; ccà sonare Fa Sarchia a la battaglia taratappa. Cicco vedenno Cecca sta attassato, Ed è da chella a n'arvolo legato.

Cerriglio stea sorriesseto e spantato Ca ll'era stato curto lo ieppone, E de collera stea miezo malato, Ca non potte cecare a Sarchiapone;

Tutte li conzigliere appe chiammato, Che facesseno lloro, 'n crosïone, Comme potesse fa', de che manera Piglia' de Sarchia la meglio bannera.

Venne Mostaccio e benne Sapatino, Venne Giansarvo, ch'era lo decano: E comme fuino a chillo Re becino Le fece ognuno lo suo vasamano.

Sedìjeno 'ntuorno de lo bardacchino, Ma lo cchiù biecchio a la deritta mano, E po' parlaie lo Re co gravetate, Marvaso 'n facce e scarzo de piatate:

«Vuie che sapite cchiù de letterumma De quanta songo pratteche a le scole, E l'aute a paro vuosto so la scumma, Tanto de fatte quanto de parole,

Pocca li fecatielle co la mpumma Non hanno dato fastidio a le mole De sto nemmico che me face guerra, Anze l'ha 'ntossecato cchiù la sferra,

«Vorria mo che penzassevo quaccosa, Ma 'nnanze de aspettare la matina: Che si chillo presiento è stato rosa, Le vorria da' na 'ntossecosa spina.

Potessemo na littera ammorosa Manna' da parte de quacche guaguina, Azzò se 'nnammorasse e ccà benesse, Et io tonnina d'isso po' facesse.

«Potessemole fa' pe bia de 'ncanto Venire suonno e farelo dormire, O co quacche strommiento o co lo canto Farelo ccà becino mo venire:

Ca le farriamo tutte tanto quanto Potessemo pe farelo morire; E si non potarraggio omanamente Chiammarraggio de Pruto la soa gente.

«E farraggio che 'n airo volanno Portano Sarchia pe chille capille, E chelle gente che co isso stanno Zeffonnarranno tutte a mille a mille:

Che de paura schitto morarranno, E no' le iovarrà chianto né strille; E cossì po' starraggio allegramente E camperraggio sempe maie contente».

Tutte li Conzigliere confermaro Chello che proponìje lo capo lloro, E 'nnante 'nnante volanno chiammaro De sonature e museche no coro:

Po' no certo barchetto accommenzaro Che parea iusto no lietto martoro, Co certe doche ch'erano de votte, Che steano 'n terra fracassate e rotte.

Vennero cierte museche famuse Co no conzierto ch'era de gra' spanto, Pe ffare li nemmice assaie confuse Restare co lo suono e co lo canto:

Portaïno chitarre e cornamuse, Cetole e colasciune, e 'nfine quanto Lloro potteno ascia' pe fa' conzierto, Azzò restasse ognuno canna apierto.

Venne nfra l'aute l'Abbate Cravone Co no fauzetto muto dellecato, Che ghieva a tiempo co no vïolone Che lo sonava no cierto cecato;

Lo bascio lo faceva Pascalone E lo tenore no viecchio sbarvato, E pe fare na museca perfetta Lo cornetto sonaie Masto Brachetta.

Le gente mo che stevano a la terra s'appilaino l'arecchie de vammace, Azzò lloro medeseme la guerra Non s'avesseno data pe la pace:

Pe li cafuorchie ognuno po' se 'nzerra Pe s'astene' da chello che pïace, E po' accommenzaino muto buono No canto doce e no soave suono.

Ma Rienzo ch'era iuto chella sera Pe soa ventura e pe soa bona sciorta De lo nemmico all'utema trencera, Pe bole' fa' la sentenella morta,

Quanno sentìje na museca sì autera De lo suonno isso tozzolaie la porta, E s'addormìje bello sulo sulo, Che le potive fa' la sauza 'n culo.

Tanno lo Re la ronna soa mannaie Cercanno si quaccuno era venuto, Quanno no Caporale s'addonaie De Rienzo, che stea 'n terra già addormuto;

Sùbbeto bello bello s'accostaie E lo cotolïaie, ma isso iuto Se n'era già 'n brodetto, e lloro 'ncuollo Se lo 'ntorzaino, e ghìjeno a rompecuollo.

Comme vedde lo Re chillo venire Se penzaie cierto ch'era Sarchiapone, E lesto steva pe lo fa' morire Dinto de lo cchiù scuro torrïone;

Priesto no cremmenale fece aprire Et addormuto lo mettìje 'n presone: Ma po' addonato ca non era chillo Lo fece sta 'n gaiola commo a grillo.

Quanno Rienzo se vedde 'n presonia Gridaie e fece cose maledette, Ch'ognuno che passaie pe chella via Tutto maravegliato rommanette.

La figlia de Cerriglio che la spia Faceva, chelle buce essa sentette, E boze i' pe corïosetate A bede' Rienzo da le cancellate.

Iette co duie guarzune de librera 'Nnante, et ognuno avea na ntorcia a biento; Ionze a lo luoco addove Rienzo era E le dìje 'n facce n'afeto de liento:

Lo vedde 'n facce e canoscìje a la cera Ca llà dinto patea muto trommiento, E po' tutta piatosa addommannaie A Rienzo si pateva pene assaie.

Isso disse: «Signora, ccà me trovo Non saccio comme, e senza fare male: Allo manco sapesse comme provo Sti guaïe, senza fare manco sale.

Io da chiste uocchie affritte sempe chiovo De lagreme nperpetoe no canale; Perzò, se Dio te guarda sse bellezze, Non me fa' sta' cchiù dinto a ste monnezze».

La figlia de lo Re, che se chiammava La Signa Cecca, et era muto bella, Lo desgusto de Rienzo le passava Lo pietto a funno nfi' a la coratella.

Oramaie essa puro lagremava, E bolentiere a chella cammarella Nge sarria stata, pe fa' compagnia A Rienzo, che ne aveva fantasia.

Po' se partette e disse: «Allegramente, Ca manco nge haie da sta', che nge sì stato: Ca te tengo stipato a chesta mente E farraggio io che singhe scarcerato».

Isso la 'ngrazïaïe grannemente Ch'era stato da essa visetato, E tutto quanto alliegro se restaie, Ma cchiù de chella vista se preiaie.

Ma Sarchiapone, che avea già mannato A chillo luoco addove Rienzo steva No cierto prattecone e buon sordato, Pe scanagliare chello che faceva,

E commo a chillo luoco fu arrivato Sporgaie, e nullo propio responneva, Po' parlanno attentaie, e po' s'accosta, Ma nullo tocca e da nullo ha resposta;

Sùbbeto fece che Sarchia sapesse Che avea trovato lo puosto vacante. Conzidera tu mo che cosa desse Non trovanno uno de li meglio 'nfante:

Mannaie a dire che non se partesse E che se stesse affi' a ghiuorno vegliante, E si perzì sentesse na cosella L'avisa priesto all'auta sentenella.

Et a chell'ora mannaie a zitare L'asèrzeto nemmico pe l'assauto, Che all'arba se volevano provare Chi de lloro facea cchiù gruosso sauto;

Cociniello mannailo a 'ngrazïare, Ca era prunto co isso e cod ogn'auto, E po' se posse ognuno a la veletta P'aspetta' sto fracasso e sta mennetta.

Ma Cecca, che se steva sola sola Penzanno a Rienzo, che l'avea allummato, Commo potesse fa' che da gaiola Fosse pe bïa soïa scapolato,

Se chiammaie a chell'ora na figliola E l'appe lo negozïo contato, E po' appontaro de fare a lo scuro Rompere de la carcera lo muro.

E priesto abbascio chella soa zitella Manna a piglia' no cuofeno e na pala; Una de lloro fece lo parrella, L'auta facea la spïa da la sala,

La quale steva rente co la cella, A lo sboccare iusto de la scala; E po' ch'appe lo muro spertosato Sùbbeto co la pala appe annettato.

E Rienzo priesto da chillo mantrullo 'Scette preiato e chino de paura, Che parea iusto no piccione o pullo Quann'esce 'nfuso da na banna scura;

Po' lo portaino dinto a n'auto rullo, Adaso adaso, attentanno le mura; Appriesso a n'auta cammara arrivaro, E 'nzembra tutte tre llà se 'nzerraro.

E sùbbeto volanno apparecchiare Fece pe Rienzo na collazïone: Isso dicea ca non volea mangiare, Ma puro se smorfìje no gran capone;

Po' tutte tre se posseno a parlare De lo cchiù e de lo manco, e 'n crosïone Se conzegliaro de se ne fuire, Ma non sapeano commo fa' pe 'scire.

Se aveano confarfate de sbignare Vestute d'arme, a foggia de sordate, 'Nnante che l'arba venesse a schiarare De lo munno li viche co le strate:

E 'n frotta se volevano 'mmescare Co ll'aute, pe non essere trovate, Pe ghìresene a stare a n'auta terra, Azzò stesseno 'n pace e senza guerra.

Ma l'aserzeto già s'era allestuto De lo gran Capitanio Sarchiapone, E 'n miezo de lo campo era già 'sciuto, Et avea fatto no gruosso squatrone;

Ogne sordato s'aveva mettuto L'arme cchiù meglio e le cose cchiù bone, Che chillo campo parea d'ogne parte Che fosse lo gran puopolo de Marte.

E comme steva pe schiarare iuorno Sùbbeto commannaie che se sonasse Lo tammurro a battaglia co lo cuorno, E lo nemmico a lo campo chiammasse;

Coceniello mo iea 'n perzona 'ntuorno Azzò ogne sordato suo s'armasse, Ma comme fu scetato lo vesbiglio Sulo l'ordene aspetta da Cerriglio.

Quanno vediste no ponte calare A na portella picciola e segreta, Da dove n'ommo buono solea 'ntrare Pe bennere a Cerriglio certa seta:

Da llà bediste na squatra sboccare De gente armata, e ghiea muto coieta Pe non fare vede' a la sentenella De lo nemmico la fauza portella.

Chiste ievano a fare la 'mmasciata Da parte de Cerriglio a Cociniello; Ma co sta gente già s'era 'mbrogliata Cecca, la serva e Rienzo poveriello.

E comme fuino 'n miezo de la strata Se n'addonaie de Sarchia Minichiello, E sùbbeto ne n'attemo e bolanno Sarchiapone avisaie tanno pe tanno.

Sarchia spedette la gran compagnia De Cicco, ch'era pratteco a sparare, E disse che bolasse pe la via E chelle gente iesse ad assautare.

Ma Rienzo e Cecca aveano fantasia De bello bello volere lassare A chella gente co quacche bell'arte Pe potereno ire a n'auta parte.

Commo fuino vicino a na fontana Se la còuzero bello zitto e mutto, E po' s'annasconnettero a na tana Dove venea dell'acqua chillo butto;

Ma 'n cielo le compagne de Dïana Se miravano dinto a lo connutto: E lloro steano llà tenenno mente, Ma da dereto sentìjeno gra' gente.

Rienzo voze fuire, ma non potte, E le femmene puro, e s'agghiaiaro, Perché de fatto fuino le botte Che appena le celate se calaro.

Le lanze lloro erano meze rotte E de paura manco le toccaro, Ma sotta a n'urmo s'erano agguattate, Che parevano tre quaglie pelate.

Cecca s'addona mo ch'a no pantano La notte ng'era iuta la ielata; Essa llà s'accostaïe chiano chiano E bedde ca chell'acqua era quagliata.

Se mese chella a la mancina mano Pe brocchiere, e pigliaise la spata, E po' priesto a cavallo fu sagliuta E sola lo nemmico essa secuta.

Quanno Cicco se vedde secutare Sùbbeto s'allestette pe 'mmestire, Ma se sentette po' tutto agghiaiare E parze a isso ca volea morire;

Pe <po'> isso non mancaïe de sbignare, Ma non se potte no passo partire, E Cecca le fu adduosso co la spata Fignenno de le da' na cortellata.

Isso iette pe ghire a lo reparo, Ma non pe chesto l'avarria iovato; Ca si essa le dea schitto no paro De scenniente, restava llà spaccato,

E lloco visto avarrisse no maro De sango, co le lagreme 'mmescato; Ma chelle gente che co isso armate Ievano, fuino tutte sbarisciate.

Lo fatto fu perché chella rotella Trasparea comme a brito p'ogne banna; La celata s'auzaie, e po' con chella Se ammarraïe la facce co la canna;

A Cicco le parette tanto bella Che perzò ne tremmaie commo a na canna, E quanto cchiùne a isso s'accostaie Cchiù friddo e 'ntesecato se trovaie.

Po' essa se cacciaie da la scarzella, Pe lega' Cicco a no cierto troncone, Fi' a quatto parme de na funecella Ch'era sfilata da lo capezzone;

Po' lo legaie, e po' l'appese chella Tareca faccefronte a no pontone; Po' disse che da llà non se partesse Fi' che lo iaccio strutto non vedesse.

Po' se ne iette pe bede' a lo luoco Si ng'era Rienzo addove lo lassaie; Ma Rienzo ardette d'ammoruso fuoco Quanno da Cecca lontano s'asciaie,

Iette p'ogne npontone e lustro e bruoco Che manco no cafuorchio nge lassaie. Essa che llà arriva, e no' lo trova: Conzidera tu mo sta bona nova.

Ma Carmosina po' quanno vedette Rienzo ammarciare appriesso a la patrona, Essa perzì a cammena' se mette, Ma non trovaie manco na perzona:

Arrivaie a lo maro, e llà se stette Ped aspetta' quacche fortuna bona: Essa chiagnenno da na banna steva, Cecca da n'auta, e Rienzo spierto ieva.