SIESTO

Schirosso fa lo 'ncanto. E desfidato Da Cecio Sarchia; Liso Cicco abbatte. 'N bufaro Cicco e 'n casa è trasformato Liso. Co Sarchia Cesaro commatte:

Sarchia le brache 'n auciello ha mutato; Cerriglio de dolore e arraggia sbatte, Iacovo co na maschera de morte Fa resta' li nemmice mieze muorte.

La sore de lo Dio che l'ore sparte Avea lecenzïata ogne nzitella: Sulo nge steva l'ammica de Marte Pe se fare a bede' ch'era cchiù bella:

Perché da l'ora che 'mmescaie le carte E nge fu còuta a chella grottecella Sta sempe co Dïana accompagnata Pe ffa' vede' a lo munno ch'è 'norata.

E Schirosso venea co no sportone De scerotole varro pe 'ncantare, E 'ncuollo s'avea puosto no robbone Ch'abbesognava de se l'accorciare.

Arrivaie 'nnante a lo gran Sarchiapone E disse: «Su, volimmo accommenzare?» Isso disse: «Vorria che fusse iuto, Anze, che fosse sso 'ncanto scomputo».

Isso priesto cacciaie 'n miezo a la via Na tavola co mille scartapelle, Che parea iusto na spezïarïa, Co tanta 'mbroglie e co tanta arvarelle:

Po', pe bole' chiamma' chillo che scria, Da sotta se cacciaie doie bacchettelle, E sengaie 'n terra no gran circhio tunno E 'n miezo nge pegnìje lo pappa–munno.

E po' vervesïava zitto zitto Comme dicesse qualeche gran cosa. Sarchia le disse: «E be', che cosa haie ditto, Ch'ogne mparola la dice annascosa?»

E isso a Sarchia tenne mente fitto, Po' disse: «De grammateca pelosa Certe parole so', ch'hanno vertute De fa' veni' dociento tarramute».

Po' chiammaie da lo Regno de Prutone De chillete na frotta, arrasso sia, Ch'appeno a ffa' sorrei<e>re a Sarchiapone Quanno le bedde 'mmiezo a chella via:

Se chiavaie dinto de lo paviglione E pe na senga po' facea la spia, E ll'aute tutte se fuino cacate, Che ll'uno a ll'auto s'appeno ammorbate.

Ma da coppa a la torre de Cerriglio Uno teneva l'acchiaro a cannuolo, Che cchiù o manco scoprea miezo miglio, Comme a dire da Puorto a ffi' a lo Muolo:

Vedde Schirosso e chillo gran besbiglio Movere, e ghire Zorfariello a buolo: Isso priesto avisaie tanno pe tanno Lo Re che avea scopierto chisto 'nganno.

Lo Re rommase tutto sbäottuto E lo Conziglio fece llà chiammare Azzò le conzegliasse quacche aiuto, Ca si è ped isso non sapea che fare.

Ognuno alla 'ncorrenno fu benuto E accommenzaino sùbbeto a parlare, Po' fuino de pare' che Cesarone Iesse a cortellïa' co Sarchiapone.

Cesarone volanno s'appe miso No pietto a botta de na cannonata, E pe paura de n'essere acciso Na spata de seie parme appe abbuscata:

Po' no guarzone che avea nomme Liso Chiammaie, che le portasse la celata, Et a cavallo priesto fu sagliuto E senza 'ntrattenere fu partuto.

Ne n'attemo fu ghiuto e fu arrevato, E po' lo paggio a Sarchia lo mannaie, A di' che fosse 'sciuto tutto armato, Ca voleano asci' tanno da sti guaie.

Chillo figliulo comme fu arrevato Primmo de Sarchiapone Cicco asciaie E disse: «Site vuie Sarchiapone? Ca lo desfida lo gran Cesarone».

Cicco le disse: «Io songo, e balle a dire Ca i' mo vengo a fa' quanto isso vòle, Ma che se tenga 'mmano de morire E de maie cchiù bedere asci' lo sole:

Perché la voglio mo proprio scompire E dare fatte a chi me dà parole». Liso le disse: «Auto non pozzo fare Che la 'mmasciata irele a portare».

E cossì se ne iette a lo patrone A dicerelle quanto le dicette, E lloro se fermaino a no pontone P'aspetta' ste barruffe e ste mennette.

Cicco se va a piglia' de Sarchiapone Ll'arme, e po' priesto 'ncuollo se le mette, Po' se mette a cavallo e ba a 'ffrontare Chillo che l'ha mannato a desfedare.

A chillo luoco sùbbeto arrivaie, Po' disse: «Miette mano a chessa spata», Ma Cesarone sùbbeto cacciaie La spata, pe le da' na cortellata.

Ma Schirosso de chesto s'addonaie E chella 'mbroglia l'appe scommegliata, Zoè mannaie a dire a Cesarone Ca chillo è Cicco e non è Sarchiapone.

Cesaro mo non voze sferrïare Ca steva 'n picco de no gran guerriere, Ma disse si volea cortellïare Primmo co Liso, ch'era lo scotiere.

Da lo primmo isso non volea azzettare, Ma po' le parze buono lo penziere E disse: «Priesto, su, mettimmo mane Ca mo te caccio da cuorpo lo pane».

Liso cacciaie la spata, e co lo scuto Se mese 'mposta bello a no pontone: No' avea paura d'essere feruto Perché sempre pigliava lezzïone:

E primmo no gran tiempo isso fu ghiuto A la scola de Masto Palatone, E llà 'mparaie domilïa sbaratte, Che manco avea paura de le gatte.

E Cicco 'mposta co na spata puosto Se fu, che parea spito bolognese, E stea arrapato e cchiù che breccia tuosto, Che avarria dato 'mmiesto a no paese.

Tanno dicette Liso: «Chisto vuosto Chilleto stimmo iusto no tornese, Perché mo la recavo, e boglio 'ntrare E faretella da mano sautare».

Cicco che sente chesto dà na fenta Pe fare azzò lo scuto isso allargasse, Ma Liso manco sale se spaventa E fegne comme non se n'addonasse;

Ed isso torna co na grossa spenta Che parze furia o puro Sautanasse, E còuze a lo guancetto de lo scuto, Che s'appe tutto lo spito spontuto.

Ma quanno Liso le vedde sautare Tre deta de la ponta de la spata, Se mese 'n posta de volere 'ntrare E metterelle franca na stoccata.

Ma po' s'attenne e disse: «Che buoie fare? Vuoie che te lassa acciso a chesta strata O veramente te vuoie fa' legare E 'mpresonia farete portare?»

Isso se stette zitto e non voleva Dire né sì né no, ca stea scornato, Ma co na facce affritta se chiudeva Le spalle, e 'n terra lo fronte 'mpizzato.

Cesarone de chesto se redeva, E disse: «E be', non staïe cchiù arrapato? Ca te n'iere venuto co na rasa De Sarchia a sbreognarele la casa.

«Va', figlio mio, vattenne a lo castiello A bisetare li compagne tuoie, E tu lo porta 'nnante a Cociniello, E po' lo miette co l'ammice suoie».

Liso lo lega co no foniciello E lo portaie comme se fa a li vuoie; Ma Cicco volea bello guatto guatto Coglieresella, e no' le venne fatto.

Isso se resolìje de volere Fui' pe forza, e de Liso lassare: Ma Liso che se steva a lo bedere, Steva aspettanno che boleva fare;

Faceva 'nfenta de lasco tenere, E issò fa na forza pe sbignare: Ma Liso tenne strinto, e 'mpontaie 'n terra Li piede, e buono a la fune s'afferra.

Cicco tutta la forza soa metteva, E Liso appriesso se lo strascinava, Che si qualeche arcuno lo vedeva Parea che Cicco a Liso 'ncarcerava.

«Lassa, cornuto», Cicco le diceva, Liso li Deïe 'n aïuto chiammava, Quanno vediste le gamme 'mpontare De Liso, e 'n doie colonne trasformare:

De lo cuorpo se fece no palazzo E restaie 'mmiezo la chiazza chiantato, La mane aniello e ncatena lo lazzo Con che Cicco stea buono annodecato.

Cicco non appe libertà de pazzo, Ca 'n bufaro da chille fu mutato, E cossì soccedette chisto caso E restaie bello bello pe lo naso.

La spata che tenea Liso a lo scianco Fu fatta a Spagna da no masto buono; Po' 'n Franza stette, e de sana' lo ranco Acquistaie ssa vertute co lo suono;

Ma chillo che sta 'ncoppa de lo banco De la sesta celesta, et ha no truono, Voze la spata vertolosa e bella Mutarela d'alluogo na cartella.

E cossì se restaino a chillo luoco 'N bufaro Cicco, e Liso alloggiamiento: Cossì ba chi na cosa piglia a ghiuoco Che 'mporta, e nge dà poco sentimiento,

Cossì è chi 'n mano vò piglia' lo fuoco E lo bòle astutare co lo viento: Che pe se temperare l'abbrusciore L'allumma cchiùne, e sente cchiù l'ardore.

Tornammo a Cesarone, ch'era iuto Ntratanto a desfedare a Sarchiapone, E Sarchia d'arme ianche era vestuto E 'sciuto 'n compagnia de Iacovone;

La lanza 'n mano e 'nnante no gra' scuto Se mese, e 'ncuollo a no gran cavallone, E tenea 'ncoppa de na pavesera De mille penne na gran pennacchiera.

Iacovo no moriello avea abbuscato Ch'era comme a la morte sicco sicco, Et era 'mpasso 'mpasso arragamato De n'arragammo de chiaie muto ricco;

N'uocchio avea guercio e l'auto avea cecato, Che cacciato le fu co no palicco, Avea tutte le cosse scioffellate Che conta' le potive le costate.

Se vedeno, s'affrontano e s'accostano, Rideno, se salutano e se chiammano, Se toccano le perteche e se mostano 'Ntrèppete; po' s'arraggiano e se 'nsciammano,

Se votano, s'allargano e se scostano, Se stregneno, se 'mmesteno e s'arrammano, Se zollano, e le coppole s'ammaccano, Se menano, se parano e se sciaccano.

S'abbasciano, po' s'auzano e se tirano, Se stizzano, se fermano e se scornano, Mo sciatano e se posano e retirano, P'accidere e pe bencere po' tornano,

S'acconciano, po' passano e se mmirano, S'appontano, s'annettano, e po' s'ornano: Po' iettano li fodare e sferreiano, Se pisano, se pogneno e stroppeiano.

Po' scenne ognuno da cavallo 'n terra Pe ffa' ll'uno de ll'auto gra' scammazzo, E Sarchia auzanno la pesante sferra De li vracune se rompìje lo lazzo

E fece zitabona a chella terra: Ch'ognuno se pigliaie no gran sollazzo Vedenno Sarchia comme a no scolaro Quanno le cauze a brache se calaro.

Isso pe non restare perdetore, Perché chelle le deano gran travaglio, Le boze priesto sbalanza' da fore Comme a palla truccata da lo maglio;

Le mannaie tanto 'nn auto che quatt'ore Saglietteno, e pareano quanto a n'aglio, Tanto che po' se nn'erano scordate, Quanno s'appero 'n airo scommegliate.

Tutte chille sordate e chelle gente, Vedenno chelle brache abbecinare, Ognuno a chella via teneva mente, Tutte tremmanno steano ad alluccare:

Tanto cchiù che lo sole assai lucente Le ffaceva parere a lo calare; E tanno se mettìjeno 'n cellevriello Ch'era de Giove lo famuso auciello.

Perché pareva capo la vrachetta E li cosciale parevano ascelle; Ognuno corïuso chillo aspetta, Ma pauruso de nove scentelle.

Chi la picca pigliaie, chi la scoppetta, E steano tutte comme a sentenelle. Giove che vedde st'ardire sciaurato De collera se fece assaie 'ntosciato.

E disse a ll'aute Deie: «Facimmo caso Che chello che se penzano be' fosse: S'hanno da fa' lo sìnape a lo naso Venire pe me da' cottura e tosse?

Non sanno li Giagante che rommaso Ognuno fu dinto a l'ascure fosse?» E tanno ordenaïe che Febo desse Spireto a chelle, e auciello le facesse.

Tanno Cerriglio fu chiaruto buono: Vedenno chillo auciello stremmenato Le parze d'ave' 'n capo no gran truono, E steva tutto quanto desperato;

Chiagnea a despietto co dogliuso suono, E po' lo meglio meglio appe adunato Pe ghiresenne co la meglio gente, Pe non fare la chiaga cchiù fetente.

Ma torno a Iacovone ch'era arcivo, Che se mettìje na mascara de morte, E pe fare a Cerriglio cchiù corrivo Iette a cavallo a ffi' 'nnante a le porte.

Ognuno miezo muorto e miezo vivo Restaie, et a fui' se mese forte, E cossì co ssa burla Iacovone Fa vencere cchiù priesto a Sarchiapone.

Ma Schirosso, vedenno la fortuna Che iea 'n faore a lo gran Sarchiapone, Tutte le 'mbroglie soie priesto s'aduna E n'énchie varro varro lo sportone,

E po' l'appe leato co na funa E lo trasìje dinto a lo paviglione, E disse a Sarchia ca isso era stato Ch'appe tutto l'aserzeto 'ncantato.

Sarchia se lo credeva, bestïale, Ca isso avea 'ncantato chelle gente, Vozzacchio, sciauratone, arce–anemale, Che ssa papocchia se fa i' a la mente:

Sciaddeo, maccarone senza sale, Facce de no cetrulo de semmente, Sarchia e Schirosso, e chi credere vòle De sso Schirosso le fauze parole.

Paurose, tremmante e sbarisciate Restaino chelle gente de Cerriglio; Cesarone e cert'aute 'ncarcerate Restaino, e isso comme a no coniglio

Ordenaie po' che fossero portate Lontano da la terra miezo miglio, E isso s'allestea pe se n'entrare E 'mmiezo a lo Cerriglio trïonfare.