SIESTO

Non cossì priesto tutte appalorciaro Le stelle, secotate dall'Aurora, Che Febo e tutte l'autre se levaro Azzò li carcerate escano fora.

Vestute, chiano chiano s'abbïaro, Ca de fare la vìseta era l'ora; Ecco, ogne carceriero ed agozino Lo vèneno a scontrare pe cammino.

D'oro brattino e frunne de mortella La porta de la carcere aparata Trovaro tutta, e scritto a na cartella: «La 'sciuta è dura, e facele la 'ntrata»;

Cchiù sotta n'autra scritta muto bella, Che cierto fu quarch'anno stodïata: «Perché se purghe sta presonia scura, Febo, pe grazia toa, falle na cura».

Mille trappite po', mille franciune Da parte 'n parte nc'erano aparate, E mille ditte aveano li presune Pe signo d'allegrezza llà 'mpizzate.

Sagliuto Febo pe li scalantrune A na gran sala, trova apparecchiate Segge ped isso schitto e pe l'Agente, Scannielle pe le Muse e l'autre gente.

Sona lo campaniello. Ecco venire Se vede a la 'ncorrenno ogne scrivano E pe le cause tutte referire Co li scartaffie e li prociesse 'n mano;

Ecco lo primmo t'accommenza a dire: «Signore, no poeta assaie pacchiano Tanta pallune avea 'nzieme abbottato Ch'è stato a remiganno connannato.

«Chisso ha compuosto ca duie giagantune S'erano a na campagna desfedate, E dapo' avere fatto a secozzune, Ch'ogne punio sentìjose otto iornate;

E po' commo se fossero pallune Co le montagne fecero a pretate, E pe brocchiere saude a sta fortuna Chi se pigliaie lo sole e chi la luna.

«'N chesto n'autro giagante arriva, forte Gridanno: — Strunzo 'n miezo, ferma, arrasso! — Ma chille, che s'aveano sdigno a morte, Non se voleano retira' no passo;

Né potenno spartire de sta sciorte, Ca sempe era cchiù granne lo fracasso, Se lanza, e tutto glióttese lo mare E 'n facce a chille córzelo a sbruffare.

«Ma chille commo fosse na sputazza Fecero de tant'acqua poco stimma, Tanto che chisto entra a na furia pazza E porta n'autro cuorpo cchiù de scrimma:

Aduna quanta porva èie a la chiazza E co n'arraggia che lo pogne e limma Nce la dà a l'uocchie, ch'erano vagnate, Tanto che deventaro fravecate.

«Cossì scompìje sta festa». Tanno disse Febo: «N'è cosa de se comportare; Chisso che ssi pallune gruosse scrisse No rimmo 'nmita mmèreta vocare».

Gridaie l'Agente: «So' tanta de chisse, Che se le buoie 'n galera connannare Cierto besognarria, co gran roina, Ire tutte le serve a la marina.

«Falle perzò la grazia.» — «Le sia fatta, Respose Apollo, ma se n'autra vota Nce 'ncappa, a fede mia ca no' la 'mpatta Co na galera, ma le dongo vota».

Sùbbeto scrisse llà lo mastrodatta: “Lecenzietur”, e firmàiese 'n rota; E lo poeta 'scenno fece vuto Sbottare sto pallone e stare muto.

Po', fatto chesto, se leiette appriesso No poeta catàmmaro sciaurato, Che contra Ammore ha fatto no prociesso Perché troppo contrario l'era stato:

Chisso pe na figliola morea ciesso, Ch'era propio no muorzo 'nzuccarato, E a fasce e a mazze gruosse le facette E matrecale e lettere e sonette.

E dapo' na grannissema fatica, C'avarria fatto muollo no pepierno, E appontato pe miezo de n'ammica De sta partita mettere 'n quatierno,

A punto fra la mano e fra la spica La rota se guastaie, che steva 'mpierno, E le speranze soie ietta a no puzzo Schitto pe no' ammacchiare n'albernuzzo.

Perché venuta l'ora desïata Da chi vò bene, e fatto l'airo vruoco, Va e se conzegna sùbbeto all'amata Ch'era pronta a stutàrele lo fuoco;

Scenne a no vascio e dice: «Io so' forzata De fare massa e tòppola a sto luoco, Perché sùso nc'è màmmema e porria Essere chesso la roina mia.

«Spanne sta cappa 'n terra e cuoglie fico, Pocca tu tiene la chiave dell'uorto». Ed isso lebbrecaie: «Potta de nnico, Ca chesta è nova e ghiere l'appe a Puorto!

Si me vuoie bene e tieneme p'ammico No' l'allordammo, non me vighe muorto, C'oie se stenta de sango no carrino; Va sùso e piglia quarche strappontino».

«De grazia, disse tanno la Signora, Mo te lo porto; ma no' stare lloco, Che no' scenna quarcuno. Aspetta fora, Ca trasarraie po' da ccà n'autro poco».

E l'aseno esce e chella chiude allora La stalla; isso gridava: «Ccà me coco»; Essa da la fenestra: «Ammore caro Mo te defresco», e ghietta n'aurinaro.

Chisto, curzo de chesto, pe dolore, Pocca otra lo corrivo era pisciato, Scrisse millanta 'nfammie contra Ammore, Tanto che ne fu puosto carcerato.

Disse Febo: «Pe cierto grann'arrore Fece, e mmereta d'essere squartato; Ma le sia fatta grazia e che se cacce: Le vasta la pisciazza c'appe 'n facce».

Sèqueta lo scrivano: «'Nformazione Contra chi cierto libro ha dedecato A no Signore, piezzo de n'anchione, Che quanto èie 'gnorante tanto è sgrato;

Perzò so' quatto iuorne ch'è presone, Ma a le seconne cause have appellato». Febo respose: «S'è chesso è pasticcio, Bella iostizia, propio scritta a miccio!

«Sto poveriello fuorze nce avea strutto Le gòveta e lo suonno a sta composta, E speranno cacciarene lo frutto E curzo co le penne pe la posta:

Pocca ha trovato sto nigr'uosso asciutto, Decite tutte vuie, per vita vosta, Che corpa nce have? Orsù, sia liberato, E che se fruste chi l'è stato sgrato».

De n'autro po' fu referuto appriesso C'avea seie mise ch'era carcerato, E chisto titolo era a lo prociesso: «Contra de no poeta scostomato».

Disse lo Fisco: «Chisso è granne acciesso: Priesto, che sia 'n galera connannato! Perché la Poesia sulo se spanne A dire cose oneste e cose granne».

E Febo disse: «Straccia mo sse carte, Commo te 'ncricche e fuie! Grann'è lo caso! Tu saie, llà corre il mondo ove ha più sparte Le sue dolcezze il lusinghier Parnaso.

Chi scrive d'autro muodo non sa l'arte De tirare li vùfare pe naso: Lo munno è dato a ste schefienzie tale, Chi non trova sto stile, non ha sale».

Sèqueta lo scrivano, e dice forte: «De furto verzi in quantitate magna Contra de quidam connannato a morte, A quarèra de Grezia e Franza e Spagna».

Febo se vota a tutta la soa Corte E dice: «Chesto è autro che lasagna! Morire pe ssi furte no meschino! Se chesso fosse, mancarria lo lino.

«Decite, chi de vuie sarria scappato Da li piede a Mastr'Agnelo, s'a ognuno C'avesse quarche bierzo granciato Dicea lo Fisco: — 'Nmóccate sto pruno — ?

Priesto, sia lo scurisso liberato, E se le dia marenna s'è dïuno, Ma da oie 'nnante sia no banno fatto, E craie se iette. Scrive, mastrodatto:

«Ch'ogn'ommo pozza libero arrobbare Vierze e conciette d'ogne libro e carta, Ma diestro, che non fàcciane addonare Nesciuno, ca si no se 'mpenne e squarta;

Iusto commo facevase osservare Da chille valient'uommene de Sparta: Chesto a lettere, mo, de catafarco Lo truove a le postèome de Protarco».

«Oh che te sia lo pane beneditto, Disse l'Agente, e campe aternamente, Ca chesto è ghiodecare pe deritto, E non ce vale ammico né parente».

'N chesto da lo scrivano po' fu ditto: «De Arte annichilata novamente, Contra d'uno che quanta scaca fuoglie Dedeca pe tornise a casaduoglie».

Cossì dice, e lo Fisco po' se lassa: «Se deve dedecare a gente granne, E no' a no spoglia–'mpise e a na vaiassa Pe lo granne 'nteresse che le scanne».

Febo respose: «Tiente, bella grassa! Lloco se vede ca sì barvaianne: Chi è liberale cierto è na gran gioia, Dedeca a chi refonne, e sia lo boia».

«N'autro nce n'è, respose lo scrivano, Che non fa vierzo che deritto sia: Se crede essere Omero ed è pacchiano C'ha sbregognata già la Poesia.

Ha poco iuorne che s'è avuto 'n mano E l'ha remisso a nuie la Vicaria». Dice lo Fisco: «Si fa vierze brutte, Pe chesta primma vota aggia li butte».

«Chisso mmeretarria d'essere 'mpiso, Respose Febo, e se non fosse iuorno De grazie, caudo caudo sarria miso Co Mastro chillo e duie papute attuorno;

Nulla Musa vogl'io c'aggia maie sfriso, Ca po' tutto de Febo èie lo scuorno. N'ardisca maie, né maie voglia ommo nato Fare vierze si n'è matricolato.

«Chi face sconcordanzïe, chi trova Vuce da sconciurare parasacco, Chi penza de trovare forma nova De vierze, ed è cchiù antica ca n'è Bacco;

Chi le fa luonghe e chi sciancate 'mprova, Chi de traslate tale énchie lo sacco Che se te tiene quanto vuoie la voglia Puro schiatte de riso a crepa–'nnoglia;

«Chi chiamma “paraliteche” li vuosche Perché lo viento le fa freccecare, Chi dice ca lo viento have li cruosche Ché non face autro maie se non sciosciare,

Siente de brocca po' cierte autre Tuosche Chiammare “prieno” e “itruopeco” lo mare Quanno stace abbottato, n'autro vòle Che l'arba sia mammana de lo sole;

«A n'autro scappa ca la neve è zella Che se ne vene 'n capo a le colline, Autro chiamma le stelle (e chesta è bella!) “De lo Banco del Ciel lustre zecchine”

Autro chiamma la notte “negrolella”, “Coperchiola d'amante e malantrine”, Autro lo iuorno dice ch'è na cura Perché spila da l'àiero ogn'ombra scura.

«'Nzomma, chi sta pazzia tene a la capo Provarrà s'io me 'nzorfo e s'io me 'ncricco Quanno me saglie 'n capo lo sinapo E me vene da vero quarche cricco:

Ca si be' mo la presonia le 'rapo, N'autra vota se piglie lo palicco. Chillo che bò de Febo essere ammico Non esca niente da lo stile antico».

Laudaro assaie le Muse sto parlare, E l'Agente azzettaie ch'è cosa bona, Perch'oramaie s'era venuto a fare Na farza de le cose d'Alecona.

Po' lo scrivano venne a sequetare: «Sta carcerata ccà n'autra perzona Ch'a no poeta disse a la sboccata: — Brutto auciello, sì tu, pierde–iornata! —».

«Vàgliame sacco rutto, Apollo disse, E che 'nsolente temmerario ardire! Propio sàuza voglio essere de chisse! Chesse cose presùmmeno de dire?

Razza de becche (dico a li qualisse) Affé de Febo, io le farò pentire! Priesto, s'arrote mo sto forfantiello, E no premmone serva pe martiello».

«Non, per vita de vuie!», disse l'Agente, E s'addenocchia e pregalo 'n caruso. «Che le perdone, pocca se ne pente E confessa ca tanno era marfuso»;

Febo nce lo donaie cortesemente, Puro che stesse n'autro mese 'nchiuso A no mantrullo, e se le desse sulo Pane, e no poco d'acqua co n'arciulo.

N'autro se lesse po', che se la dette 'N tallune co na bella cortesciana, E autro pe tre ore non facette Che cardare a lo pettene de lana;

Quanno po' 'nzoperaie, ecco se mette Na mano 'n sacca e cerca na semmana, E quanno chella aspetta no rïale Scappa: «Buon iuorno!», ed ha no matrecale.

Lloco nce appe a benire gran barruffa Ped uno che n'avea protezïone, Ma po' le fece quarèra de truffa E fu puosto de pésole 'mpresone;

Dice lo Fisco: «Voglio che de muffa Nce piglie dinto de no cammarone, Fi' <'n>tanto che cotella non remette E piglie autro che sdrusciole e sonette».

«Appila, disse Febo, chisto è digno De grazia, e non se deve casticare: Anze, mmeretarria co granne sdigno Chella na pena, mo, talïonare,

Perché 'mmezzasse ogn'autra a stare a signo E ste 'mposture a nullo muodo fare. Che truffa, s'ogne bierzo che l'ha dato Manco se pagarria co no docato?»

Mill'autre nce ne foro referute Che nce vorria no mese pe contare, Ma tutte àppero grazia, e foro 'sciute Co lo portiello schitto contentare.

Io ne zeppolïaie paricchie scute Pe beveraggio e pe sollecetare Chisto e chillo decreto, otra c'aviette Pe ghionta mille frottole e soniette.

Ma già tre bote tutta era calata La porvera da coppa la 'mpolletta, E Febo, che na famme avea arraggiata, Coll'autre appriesso lo paiese annetta;

Ma commo fu la tavola levata Lo 'Mmasciatore, a chi lo Duca aspetta, Se lecenzia da Febo, e bò sbignare Ca pe lo frisco penza cravaccare.

Febo le fa donare la valdrappa Che portato ha dece anne lo Pegaso, Ma de Petrarca primmo è stato cappa, Che le Muse ne fecero gran caso;

Po' sùbbeto scavare co la zappa Fa lo cchiù meglio lauro de Parnaso E dice: «Chisso è digno stare all'uorto Ch'aggia cchiù bello o Marmeruolo o Puorto.

«Portalo addonca a chella Autezza 'n duono Da parte mia, ca le so' servetore, E dille ch'isso schitto è 'n terra buono Sta 'nzegna avere, ch'è de tanto 'nore».

'N chesto ecco de trommetta no gran suono, Ecco abbascio s'abbia lo 'Mmasciatore, E fi' 'mponta le grade chiano chiano Da Febo è accompagnato pe la mano.