QUINTO

Rienzo quatto vecchiune fa agghiaiare, Che deano a Carmosina tentazïone; Ma Cecca, che sta a chiagnere e a strillare Co la spata se passa lo permone.

Cesaro, che Schirosso va a chiammare, Mase e Micco vencìje. Da lo troncone Se scioglie Cicco, e po' piglia gran<n>'armo; Rienzo s'accide e Cecca se fa marmo.

La notte avea spannute già l'ascelle E 'mmarrava la luce p'ogne luoco, E 'n cielo steano mille cannelelle Pe ffa' lustro lo munno, ch'era vruoco.

Rienzo, che ghiea pe cheste banne e chelle, E non trovava né luoco né fuoco, (Ma si è pe fuoco n'avea tanto 'n pietto Che no' le dea tantillo de recietto),

Mo correva a la 'mpressa e mo se steva, No poco a quacche banna se fermava, E n'auto poco a selluzzo chiagneva, E n'auto poco forte sosperava.

Non sapeva isso stisso addove ieva Lo cavallo, ed Ammore lo guedava: Ma conzidera mo comme guedato Era a lo scuro da chillo cecato.

Tanto che fu portato da la sciorta Dove stea Carmosina, a no pontone, E la trovaie ch'era quase morta, Che avea da cierte gran tentazïone.

De chille nullo avea la varva corta, Ma d'anne ognuno avea no melïone: Erano quatto, ognuno stea aggobbato, E Carmosina avevano allummato.

Ma essa stea co chille a contrastare E tutta se sciccava e stea chiagnenno: Ma Rienzo, che llà stea ad ausolïare, Se penzaie Cecca, e ghiette a la 'ncorrenno:

Canoscìje Carmosina a lo parlare Et isso se 'nzeccaie muto tremenno, E chille viecchie, vedennolo armato, Ognuno de paura fu agghiaiato.

Rienzo arrancaie la spata e ghiette adduosso A chiste quatto viecchie 'nzallanute: Nullo de loro niente se fu muosso, Ma steano tutte quante sbaottute.

Dette na botta a uno a lo 'nfraccuosso: Ma lloro erano già tutte ammutute, E de lo iaio tutte 'ntesecaro E tanno 'n preta marmola tornaro.

Sti quatto viecchie erano poverielle, Et ognuno campava co pescare: Lo iuorno ieano co li vuzzetielle E la gente portavano a sbarcare;

Ma chella sera co cierte tenielle Erano iute pe acqua pigliare, E comme appero visto l'arme mosse Se le chiavaieno sotta de le cosse.

Oie è lo iuorno che stanno agguattate E devacano l'acqua adaso adaso; Ognuno sta co le spalle votate, Conforma se trovaie cossì è rommaso.

Ma Carmosina e Rienzo assaie preiate Fuino ca se trovaieno cossì a caso, E bello chiano chiano s'abbïaro E chille viecchie a lo Muolo lassaro.

Ma io perzì le lasso arreposare A no pontone, sotta a na pennata, Che la matina voleano aspettare Pe ghi' trovanno Cecca sfortonata;

La quale steva sempe a lagremare, Che avea allavaniata chella strata, E steva dinto de na grottecella Senza provare manco na panella.

Ma sulo li lamiente erano civo, Cuotto a lo fuoco che teneva 'n pietto, E comme fosse cannela de sivo Se ne scolava, senza manco lietto.

Dicea chiagnenno: «Ahie, Rienzo, comme privo Sì de me, io de te, senza recietto? E comme pò campare chesta vita Si stace da la toia dessonita?

«Negra me, sfortonata, e comme sola Potarraggio contenta maie campare, Abbannonata dinto a na gaiola De penziere, sciaure e pene amare?

Si be' lo tiempo la rompe che bola Rienzo da ccà schitto me pò cacciare: Ma cchiù priesto io medesema sarraggio La Parca, e da sti guaie ne 'sciarraggio.

«Ma meglio assaie farria che co sta spata Cacciasse chisto spireto dogliuso, Azzò po' iesse spierto p'ogne strata Pe ffi' che trova Rienzo mio amoruso».

Cossì decette, e priesto na stoccata Se schiaffaie 'n pietto, e fece no pertuso Ch'a furïa lo sango llà scorrette, E lo spireto 'n aria se ne iette.

Ma tornammo a lo Re, che la resposta Cchiù non avette, né lo 'mmasciatore, Che fu forzato mannarenge a posta N'ommo che fosse chino de valore:

Fece de li cchiù meglio fa' na mosta Pe sceglierenne nfra chille lo sciore, E de parere fu ch'a Sarchiapone Mannasse Capetanio Cesarone.

Ed isso iette, pe sape' che n'era Fatto de sto Schirosso tradetore. Arrivaie dove steva la bannera De Sarchia, e llà chiammaie lo 'mmasciatore;

Schirosso 'scette co na bona cera E disse a Cesarone: «Oh, servetore». Isso respose: «Be', che cosa faie Che la resposta no' la puorte maie?»

Isso rommase quase 'nzallanuto E non sapea che dicere o che fare; Volea parlare, ma stea sbaottuto E 'n facce se vedeva ianchïare.

Da chiste signe l'appe canosciuto Cesaro, che sapea conzederare, E le dette arraggiato no scennente Che le fece sauta' lo meglio dente.

Le gente che senteano sto remmore Corzeno tutte quante pe spartire, Et a Schirosso ietteno 'n faore, Che de dolore quase appe a morire.

Ognuno muosso da no gran furore Chi volea fare e chi voleva dire, Ma Cesarone, ch'era assaie forzato, Appe ognuno de chille 'ntommacato.

E po' le mannaie tutte a desfedare, Che 'scesseno 'n campagna tutte armate, Ca isso propio se volea provare O co lanze o co perteche o co spate.

Sarchia che 'ntese chesto fa chiammare Masillo e Micco, ch'erano approvate, E disse che bolanno ognuno iesse E co chisto nemmico commattesse.

Ognuno se mettette na corazza, La spata a lato e 'n capo na chianetta, Micco na lanza e Masillo na mazza, Pe ffa' de sto nemmico gran mennetta;

'Scetteno tutte duie fore a la chiazza E sparaino na botta de scoppetta, Pe da' lo signo a lo gran Cesarone Ch'erano 'sciute pe la costïone.

Sùbbeto Cesarone fu accostato Pe se provare primma co Masillo, Ma isso se fu priesto cravaccato Co no zumpo che parze Masto Grillo:

E l'uno e ll'auto po' se fu allargato Pe se passare comme a bertecillo, E co le lanze se corzeno a dare, Ma a primmo non se potteno spezzare.

Po' tornano a botare li cavalle E danno n'auta strenta de sperune: Ognuno s'abbasciaie tanto le spalle Che li piette toccavano l'arciune,

E se 'ncriccaino po' comme a duie galle Allora quanno fanno a costïune; E po' arrancaino tutte doie le spate E stoccate se detteno e 'mbroccate.

Lo cavallo de Mase fu feruto E le cadette 'n terra meza aurecchia; Isso non restaie niente sbauttuto, Ma dette a lo nemmico na scervecchia;

Chillo la reparaïe co lo scuto E 'n capo a isso stese la serrecchia, E fu de puzo lo gran scervecchione Che tutto l'ammaccaie lo morrïone.

Masillo comme a piro traboccaie, O puro comme a strummolo rotanno, Ma Cesarone priesto scravaccaie E le stoiaie la facce co no panno.

La botta buono te lo 'ntromentaie, Che creo ch'appe a mori' tanno pe tanno: Po' 'ncoppa a lo cavallo a l'abboccune Lo mese, e l'attaccaïe co na fune.

Ma dapo' ch'appe vinto sto nemmico A Micco disse si volea iostrare. Isso respose: «Lo vero te dico Ca co lo buono me vorria accordare».

Cesaro disse: «E tu viene co mmico, E co lo buono fatte desarmare». Isso le dà lo scuto e la corazza, La spata, la chianetta co na mazza.

E priesto le portaïe 'mpresonia 'Nnante a lo Signo Cicco Cociniello, E tutto alliegro ieva pe la via, Ca guadagnato avea sto granne appiello.

Cicco pe se sgana' la fantasia Le mannaie dinto de no cammariello, Po' Cerriglio avisaie de chesta presa, Cerriglio che stea sempe a la defesa.

Quanno ssa nova iette a Sarchiapone, De la pèrdeta grossa de st'ammice, Se voze già passare lo premmone Si no' avesse allegrate li nemmice.

Schirosso se chiammaie e disse: «Mone Che cosa te ne pare, e che ne dice? Ca pe l'ammore tuio aggio perdute Li meglio ammice ch'aggio canosciute».

Isso respose: «Io mo voglio abbuscare L'erve, le prete e ll'aute scartapelle, Azzò pozzammo sso Regno 'ncantare Et a sso Re cacciare le bodelle:

E chille ammice già recoperare Le bedarrite, e beni' co l'ascelle». Ma Sarchiapone che stava arraggiato Disse: «Va', priesto, e mo singhe arrivato».

Ma Cerriglio, che steva grannemente Colereco, ca Rienzo era sbignato, E, chello che le iea cchiù pe la mente, Ca s'era co la figlia confarfato,

D'arraggia steva tutto quanto ardente, Ma con chella vettoria fu allegrato; E Sarchia stea cchiù d'isso sbaottuto Perzì ca Cicco n'era cchiù benuto.

Cicco, che s'addonaie ch'era scomputo De scolare lo iaccio, comme a scurmo Senza fatica se trovaie sciogliuto Da chillo 'mpaccio lëato a chill'urmo:

E isso priesto e miezo sorrïuto S'abbiaie turdo, pauruso e turmo, E la via de lo campo ieva ascianno Pe non avere quacch'auto malanno.

Ieva pe chesta strata e ghiea pe chella, Ad ogne bico iea tenenno mente: Arrivaie dove stea na sentenella, Ch'era de Coceniello no Sorgente.

Isso s'annasconnette a na portella, Ca non sapea chi fosse, o de che gente. Chillo: «Chi è llà?» tre bote le dicette, E isso zitto et agguattato stette.

Chillo sciosciaie lo miccio pe menare, Ma sulo appiccecaie a lo focone, E chella vampa le fece mostrare La facce, che parea iusto Nerone.

Volenno Cicco la vita scampare S'accostaie bello bello a lo pontone, E le sciccaie la spata da lo lato E l'appe tutto quanto desarmato.

Po' comme a ciucciariello lo legaie E disse: «Priesto, viene carcerato»: E isso chiano chiano s'abbiaie, Che manco na parola appe parlato.

Cicco p'essere 'sciuto da li guaie E pe ssa presa tutto iea preiato, E ghiea a la 'mpressa pe la chiazza vruna Guedato da lo raggio de la luna.

Dapo' ch'appe no piezzo cammenato Da lontano scoprette certe gente: Isso miezo restaie maravegliato E sempe a chella via teneva mente,

Ca se penzava ch'erano sordate De lo nemmico, e tremmaie fortemente; Ma canoscette po' lo paveglione Addove solea stare Sarchiapone.

Pe l'allegrezza non potea capere Dinto a li panne, et oramaie crepava E disse: «Ecco ca mo torno a bedere Li care ammice che desederava!

Ciento anne mo me pare de sapere Chello c'ha fatto chesta gente brava, E mill'aute anne de mettere fuoco A Cerriglio, a la gente, e a ffi' a lo cuoco».

Po' Giove 'ngrazïaïe co doie mane Ca l'avea fatto tornare a chell'ora, Po' disse: «O tenne meie napoletane, Sciauro vene da vuie che me 'nnammora!»

Po' priesto s'accostaie a chelle tane E se portaie chillo presone ancora: Ma quanno fu da chille canosciuto Preiato ognuno 'nnante le fu 'sciuto.

Sarchiapone vedennolo tornare L'addommannaie che cosa aveva fatto; Isso ogne cosa se posse a contare E commo avuto avea lo schiacco matto.

Ma m'abbesogna Cicco ccà lassare, A ttale ch'io non esca da lo patto, E dicere de Rienzo e Carmosina, Ca oramaie s'accosta la matina.

Rienzo già se voleva appapagnare, E Carmosina puro, a chillo luoco, Quanno na coccovaia ad alluccare 'Ntese, che le crescette cchiù lo fuoco.

Disse: «Chi sa si chesta non pò asciare Lo suo compagno pe chist'airo vruoco, E commo lo sapesse ca io puro Vago cercanno Cecca pe sto scuro».

Ma isso non sapea ca 'n chillo auciello Lo spireto de Cecca ng'era 'nchiuso! Le venne 'ntuorno e 'ncoppa a lo cappiello, E isso stea tremmanno e pauruso:

Po' le levaie da cuollo lo mantiello, E isso cchiù tremmava e stea confuso, Po' lo portaie pe l'airo volanno E isso appriesso lo ìje secutanno.

Tanto che dove Cecca lo portaie E appriesso a isso ieva Carmosina; E comme fu arrevato lo lassaie Cadere 'ncoppa de Cecca meschina:

Rienzo da llà lo ferraiuolo auzaie E co lo lustro, po', de la matina Vedde Cecca speduta e co la spata Pe ffi' a la groce a lo scianco 'nfilata.

Conzidera tu mo che gra' strillare, Che sciabacco, che trivolo e che chianto, Che greciello, che riepeto e sciccare, Che marmuoito, che allucco e che gra' schianto

Llà nge 'mmattette: non se pò contare: E perrò no' lo conto e ne <no'> lo canto. Ma sulo Rienzo pe soperchia doglia Co no cortiello se tagliaie la coglia.

E cossì morze e ghiette a ll'auto munno; Carmosina chiagnenno se fermaie, L'auciello dinto a no portiello tunno Se posse e 'mpreta marmola tornaie;

Cecca lo stesso, e stea cchiù sotta 'n funno, Corcata 'n terra morta se restaie; Ch'oie è lo iuorno che lo cuorpo muorto A la fontana sta de 'mmiezo Puorto.

E cossì co la vita lo dolore Scompetteno, e li guaie de chisto munno: Perzò quanno te pienze co st'ammore Essere 'n cielo, staie a lo spreffunno;

Lloco la nave chiena de ss'ardore Ietta l'àncora soia a chisto funno: Perzò 'mparate vuie da mo nnenante, Ca mo vene Schirosso co li 'ncante.