I

Decette a lo Chiaiese, Ch'èie ommo saputo e letterato: «Tèccote no tornese, e dimme: è buono l'essere 'nzorato?»

«Bonissimo, diss'isso, a la bon'ora, Se tu non sì 'nzorato, e tu te 'nzora». «Aggio na gran paura, Io le decette, non desse de pietto

A na mala ventura: Ed àuzate se puoie, po', da sso nietto, E di' ch'è pezza che se pò stracciare». Ed isso disse: «E tu non te 'nzorare».

«Se vao pe ssi pentune N'auzarraggio, diss 'io, na spennazzola, O farraggio a costiune E puosto ne sarraggio a na gaiola;

E nge vò bona agresta a 'scire fora!» Ed isso me decette: «E tu te 'nzora». «Vorrà ire sforgiosa, Diss'io, che nge vorrà tutta la dota;

Sarrà na schifenzosa Che scariglia farrà cchiù de na vota: Io me 'ntorzo e non pozzo comportare...» Responnette isso: «E tu non te 'nzorare».

«Starraggio sempre sulo, Io le decette, e puosto a no pentone Iusto comme a cuculo, Chiagnenno de menestra no voccone,

Ca na mogliere te ne abbotta ogn'ora». Diss'isso: «Frate, adonca, e tu te 'nzora». «Me farrà tanta figlie, Io disse, che iarranno pe la casa

Iusto comme a coniglie; Starraggio sempre maie drinto la vrasa, Penzanno comme l'aggio da campare». Ed isso leprecaie: «No' te 'nzorare».

«Ma se cado ammalato Chi me fa na panata o no cristiero? Diss'io, e abbannonato So' dall'ammice comme a no sommiero.

N'è meglio tanno, arrasso sia, ch'io mora?» «S'è chesso, me respose, e tu te 'nzora». «N'aggio granne appetito, Diss'io, ma s'have male cellevriello

E me manna a Cornito Chella che piglio, patre de l'agniello, E po' torno a Forcella ad abetare ?...» «Scumpe!, diss'isso, e tu no' te 'nzorare».

«Voglio propio sapere, Diss'io, da te c'hai lietto lo Donato Dove m'aggio a tenere: Aggiome da 'nzorare o star squitato?

Ca comme me resuorve, a la stess'ora Me proveo de mogliere o de signora». Disse Chiaiese tanno: «O ca piglie l'ammica o ca te 'nzure,

Sempre haie quarche malanno Ed haie causa de chianto e de dolure; E sto conziglio avere a mente puoie: Tutte so' guaie, e piglia quale vuoie».