De Cianna negrecata a lo greciglio Correno tutte l'autre guagnastrune, E ntra de lloro fanno gran consiglio Contra li guitte 'sgrate smargiassune.
Meneca vecchia de lo 'nfierno stiglio Le dace certe bone lezïune, E Nora co na raggia da crepare Se resorve de Micco secotare.
Era muerto lo Sole e se vesteva La Terra la gramaglia de la notte, E lo Cielo l'assequie ne faceva Ce le Stelle pe ntorcie e cannelotte;
Lo trivolo già fare se senteva A lupe, a varvaianne e a ranavotte, E la sore carnale negrecata Chiagnea 'ncoppa la terra la rosata;
Quanno scomputo essenno lo cantare Micce e compagne s'erano sosute, Ma non pottero troppo passïare Ca la crovara avea tutte stordute:
Perzò d'accordio ierose a corcare Commo s'asciaro, cauzate e bestute, Chi co l'ammice e chi co li pariente, E chi chiavato pe ss'alloggiamiente.
Ma non dorme nesciuna guagnastrella, Ch'a la casa de Cianna era già iuta, E chi a na cascia e chi a na seggiolella Steva tutta penzosa e sbagottuta;
Quanno pigliaie a dicere Ciannella: «E che iocammo a la passera muta? Decite, che ve pare de sti tratte Che da sti mancia-mancia nce so' fatte?
«Avite visto a Mase? Avite 'ntiso Maie a le munno tale canetate? Eccote ca pe mene non fo 'npiso, Eccote ca pe mene ha libertate:
Tutte sapite quanto nce aggio spiso Quanno foro le chellete scassate, Chelle poteche a la Rua Catalana, E stette a le mandrullo na semmana.
«Che se non era ca chillo scrivano Sùbeto che me vedde m'abbistaie, Ed otra ca l'ontaie bona la mano Comm'isso voze po' lo contentaie,
Affé ca sto scortese, sto villano (Che malannaggia quanno nce 'ncappaie!) Non porria me lassareme da banna, Ca saria 'sciuto co no chiappo 'n canna».
«Uh mara me se chesto vace <vaco> a dire, Respose Tolla, tutte state zitto. Cose fice pe Rienzo da stordire Quanno facette chillo gran delitto,
Ca caudo caudo lo faciette 'scire E me nce strusse, che le sia nmarditto!, E le robbe e le carne e li denare, Ca fi' a lo boia voze contentare.
«A sto precolatore, a st'avocato, A sto screvano ed a sto carceriero Da' no cianfrone mo, crai no docato, E prega chisto e chillo Cavaliero:
Ca t'averia non saccio chi stracquato, Ed io stea tosta e maie cagnaie pensiero, E mo de brocca véome lassare Quanno credea m'avesse a 'nguadïare».
«Che dice sora mia?, Cicia decette. Et io pe Cesarone quanto fice Quanno 'n galera pe cinco anne iette Pe lo negozio de chelle balice?
Quanta docate pagaie quanno 'scette No' lo sape auto ch'io, scura Viatrice, Azzò non iesse commo a marïuolo Ma commogliato co lo ferraiuolo.
«E quanta appe lo còmmeto docate, E quanta lo patrone e l'agozino, Azzò che no' le dessero mazzate E potesse dormire a strapontino!
Quanto spise a mannare le pignate, Lo pane frisco, lo caso e lo vino! E perché stesse cemme a Cavaliero Contentaie tutte, fi' a lo paglioliero».
«Ed io pe contentare Sapatiello, Decette Lella, non ieze a Messina Quanno pe gelosia de Masaniello N'appe a benire chella gran roina?
Dove na notte aprìjo no potechiello D'uno che llà vennea lardo e tonnina, Ma, scura me, strillaie lo potecaro, E iezemo 'n presone e nce frustaro.
«Ma perché llà non era canosciuta Me stiette zitto, e fìcene passaggio: E commo me trovaie, bona sarciuta, Co na varca nce mìsemo 'n vïaggio;
Ma da lo Faro a mala pena 'sciuta, Quanno de sole esce lo primmo raggio, Nce pigliaro duie belle bregantine Commo piglia lo niglio pollecine.
«E perché po' li Turche ne facèro Doie parte de le cose che pigliaro, Isso 'n catena sùbeto mettèro E a me sotta coperta me chiavaro:
Isso a lo bregantino de Zifero Ed a me scura a chillo de Maimaro, Ch'accossì se chiammavano li cane, Che nce dèro cchiù tuosseco ca pane.
«Ma piacette a lo Cielo che passasse De Sciorentine na bella galera, E che lo bregantino mio pigliasse, Che fo de lunedì, 'nmiero la sera,
E che chillo de Sapato scappasse: Uh fosse morta, ch'assai meglio m'era! Ca iuta non sarria pe terra e mare, Commo faciette, pe lo rescattare.
«Che t'aggio fatto, sore, arrasso sia, Ca sorreie a pensarece lo core, Pe cacciare sto sgrato da Torchia E portarelo ccà commo a Segnore!
Mo se le dace de la vita mia Quanto vedite! Ora portate ammore, Or agge ad ommo maie speranza o fede, Ca po' te paga co na ponta-pede!»
«Gran cose avite ditte, e cierto avite Na gran ragione de ve lammentare: Ma quanno a mene scura sentarrite, Decette Popa, facciove appilare.
Vuie tutte quante Cola canoscite, E sapite se sa squarcionïare: Ora chisso accossì me 'npapocchiaie Ch'io stessa a morte po' me connannaie.
«Lassammo stare li denare spise, Le ferite c'aviette e mazzïate, Ca nce vorriano cincociento mise A dire schitto chelle cchiù notate.
Iette cod isso pe tante paise, Quanno 'n ausilio fùimo connannate, Fi' che facette n'autro sbarione Dinto Leguorno, e ièzene 'n presone.
«Dove fo priesto connannato a morte Perché fece na chelleta assai trista, E puosto 'ncoppa de na torre forte, Auta, ch'appena nce iognea la vista:
Addove schitto s'apreno le porte Quanno lo boia e la Iustizia è lista, E quanno le vò da' lo carceriero Co na panella, d'acqua no becchiero.
«Io scura, mo, che iea pe la marina, E sarria morta affé pe lo sarvare, Pregai lo carceriero na matina Che pe pietà le desse da manciare;
E tanto le faciette la meschina Che bello s'accordaie de nce ne dare. Accossì le mannaie mille coselle E na mesura de nuce e nocelle.
«Po' m'accattaie na lècora 'nmezzata Che revenea no miglio da lontano, E quanno co lo sisco era chiammata Volava a chi tenea la noce 'n mano;
Io me tenea la lècora attaccata Co no capo de filo marfetano, De lo quale tenea no gliommaruozzo Pe fare quanto avea a sto chierecuozzo.
«Ora no iuorno pe no fenestriello S'affacciaie, che no' nc'era cancellata, Ed io, che maie partea da lo castiello, Sempre a lo sciato de la cosa ammata,
Le faciette 'nzegnale ch'a l'auciello Na meza noce avesse apparecchiata. Isso me 'ntese e chiammaolo sescanno, Io lo lasso, e lo filo vao mollanno.
«E 'nfine lo designo me rescette, Ca nce ieze la lècora llà suso, E perché la malizia mia 'ntennette Isso mese lo filo a no pertuso.
Ma quanno la vessica d'ombre mette Cinzia a lo cielo, pe che sta zelluso, Io vao là 'ntuorno commo chi va a caccia Fi' ch'a la fenestrella isso s'affaccia.
«Lo quale poco stette e s'affacciaie, Ca co la mèuza già steva isso puro, E vedennome sùbeto calaie Lo filo rente rente pe lo muro.
Io mo na funecella nce attaccaie E disse: - Ailà, priesto, mo ch'è scuro -. E quanno l'appe 'mmano io priesto a chella N'autra nce n'attaccaie cchiù fermolella.
«Perché lo filo se saria spezzato Se chella grossa a primmo nce metteva, Ed averia guastato lo filato E sgarrata la tela che nce ordeva.
Ora quanno la grossa appe tirato, E 'ntise ca già 'n mano la teneva, Na tròcciola de puzzo nce legaie Ed isso puro ad auto la tiraie;
«E la conciaie de muodo, 'n crosïone, Che steva bona pe se ne calare. Ma commo ch'isso è tanto n'ommenone Se scennea sulo me potea sferrare;
Ammore, che 'mpapocchia le perzone, Me mese 'n capo de me nce legare. Me lego, isso se cala, io saglio 'ncoppa, Ma me la fece, la varva de stoppa.
«Perché quanno fui suso e me penzava Ch'isso, ch'era forzato, me tenesse Fin tanto che secura me calava, Azzò cod isso sarva me ne iesse,
Decette ca la funa le scappava, Ch'a la fenestra priesto me tenesse; Io scura me lo crise e dintro traso, E nce restaie co no parmo de naso.
«Perché quanno vedette già 'ncappato Lo sorecillo, l'ommo mio valente Disse: - Oimé, Popa mia, so' arrovenato, Sciuogliete, sciuoglie, ca veneno gente!
Ora chi s'averria maie 'nmagenato D'avere, oimene, sto contravagliente? Me scioglio. Isso la funa tira abbascio, Isso fuie commo auciello, io resto n'ascio.
«Commo restaie ognuno pò pensare: Non tanto pe paura de morire, Quanto ca pe bolerelo sarvare Pe <po'> a mille grazia me voze tradire.
Tanno proprio volea vocetïare Ma la voce 'ntorzaie, non potte 'scire, E chisto affritto core arzo e feruto Steze fi' a l'arba sempre ascievoluto.
«Ma pe cchiù non ve rompere le chiocche Non diraggio li chiante e strille amare Che fice, ca nce vonno mille vocche Pe dire, e mille aurecchie pe 'scotare.
Pigliate asempio vuie, femmene sciocche, Mai cchiù non ve facite 'mpapocchiare! Vene lo carceriero: - Addove è Cola? Cola è 'n campagna, e Popa a la gaiola!
«La quale cosa visto, de corzera Ieze a lo Duca a fa' relazïone E penzava de ghìrene 'n galera O stare 'n vita a quarche cammarone:
Ma lo Gran Duca co na bona cera, Ch'è Segnore amoruso e buon patrone, Le disse: - Orsù, s'è commo m'hai contato Pe chesta vota te sia perdonato.
«- Portame ccà la femmena e bedimmo De che manera la cosa è passata -. Dove io iuta, deciette bello a primmo De li guaie mieie la storia sfortonata.
E So' Autezza decette: - Affé te stimmo Pe femmena saputa ed aggarbata, E non schitto te dongo libertate, Ma passa-puorto co ciento docate -.
«Ora se non trovava no Segnore De tale chella, dove sarria iuta? Con tutto chesto dinto de sto core La faiella de fuoco maie s'astuta.
E lo vinne ad asciare co cchiù ammore, E me scordaie de quanno fui traduta; Mo me chianta e me dà nuove sceruppe: Decite mo, ve passo a pede chiuppe?»
A sto dire colereca respose Nora: «Pe cierto tu patiste assaie, Ma puro Cola le chiaie ammorose C'haie 'n pietto mille vote nmedecaie.
Ma chi spesseia a cogliere le rose Fare non pò che non se pognia maie: Io schitto, io schitto so' la sbentorata, Pocca degna non so' d'essere amata.
«Io so' chella che maie puotte arrivare D'avere schitto na tenutamente Io chella che me ieze a 'ncrapicciare D'uno che non è ommo, ma serpente.
Avesseme voluto contentare E fosse mo ped isso na pezzente! Na vota manco stuorto me mirasse E no' me curaria ca po' crepasse!
«Ca sarria tutta lardo e tutta feste, E non me cagnaria co le Regine, E sarria sanetate a me la peste E bone sciorte gliannole e roine;
E se magnasse vescuotte e rapeste Me pareriano papare e galline, Ca chella che da vero vòle bene De strazie d'ommo mai non sente pene.
«Che me serveno a me tanta vestite Co le pestagne e le trezzelle d'oro, E cannacche de perne commo antrite E d'anella e catene no tresoro,
S'aggio a sto core mio fuoco e ferite, Se pe chi me vò male squaglio e moro, Se chi me fùie secuto e chi me lassa Schitto perché vò bene a na vaiassa?
«E sapite chi è sto descortese? E sapite chi è sto tradetore? E chillo che de tutto sto paiese E lo sorreiemiento e lo terrore:
Chillo che lo Spagnuolo e lo Franzese Tutto se caca pe le fare 'nore, Oimé, ca cchiù a lo fuoco st'arma ficco, Ahi ca m'ascievolesco, è Micco, è Micco!
«E saccio io buono mo perché s'è scritto, Ca co n'amico suo se l'ha fidato, E chillo stammatina me l'ha ditto, Ch'ogne secreto 'nfine è scommogliato:
Ch'all'Aquila mo vace a pede fitto, Llà sta a patrone chi l'ha 'ncarcerato, Et io dintro le lagreme m'azzuppo, Ca pò cchiù la magnosa de le tuppo.
«Llà po' pretennerà de fare tanto Co l'ammice, che l'aggia pe mogliere, Ed io faraggio chiòppete de chianto Senza manco poterelo vedere;
Va' ca n'hai sceca! Ietto mo sto manto E sta gonnella, e bao co le bannere, Ca saperaggio l'arme manïare E fuorze accido chi me fa crepare.
«Mora chella vaiassa, mora, mora, Pecc<h>'essa è causa de lo male c'aggio: E già vorria che fosse ionta l'ora De mettereme a fare sso vïaggio.
Vengo, vaiassa, vengo, e non sia Nora Se non paghe de sango sto dammaggio, Io vengo, e bederai, brutta chiarchiosa, Quanto pò sdigno a femmena gelosa!»
«Ah mara me, che senco, e che parlate! Donca da vero vuie volite bene? E non fegnite, e non ce delleggiate? E co tutto lo sinno state 'n pene?
A lo core me so' tanta stoccate Sse chelle vostre. Ora sentite a mene Meneca disse, ca songo anzïana, E a tiempo mio cardaie bona la lana.
«Maie cortesciana, o figlia, avette ammore Ad ommo nullo, o le portaie lianza, E sia ricco, e sia bello, e sia Signore, E sia de 'Talia, e sia de Spagna o Franza,
Ma sai pe chi le sparpatea lo core? Pe chi sospire e lagreme sbalanza? Pe chi meglio refonne oro ed argiento, Ca l'autre cose so' cose de viento.
«Ha denare quarcuno, è liberale? O quanto è bello, o quanto è Cavaliero! E di' ca truove chi le voglia male Se be' a lo riesto fosse no sommiero.
Mo sia Re de l'aucielle e non sia tale, A cortesciana maie trase 'mpensiero, Ca, commo disse, s'ama e tene caro, Sia l'ommo peste, ed aggia lo denaro.
«Perdonateme, vuie sete 'mpazzute: Che zuco da na preta cacciarite? Se valeno chiste uommene fallute Poco pe ammice, e manco pe marite!
Ma se v'asciate proprio resolute De ghire appriesso a ssi male appetite, Chiammate 'nnanze lo Signo' Chiaiese, Ca ve darà conzulte tre a tornese».
Cookies on Poetry Cove