CANTO SETTEMO

Micco a chi l'alloggiaie vòle 'nmezzare Pe pagamiento na stoccata franca, Ma chillo scuro sta pe se cacare Mentre lo vede ca la spata arranca.

Nora pare ommo, e face 'nnammorare D'essa Grannizia, pe chi Micco allanca, Quanto sia vertolosa se fa dire, E lo valente Micco fa fuire.

M'a l'aura la zitella de l'Aurora S'era sosuta, e ieva sospiranno, Ca le 'ncresceva de 'scire a chell'ora E ghire li crepuscole cercanno,

Azzò, commo soleva, 'scesse fora E che le strate po' iesse adacquanno, E 'nnanze che Tetone se sosesse Pe lo rettorio l'ellera cogliesse;

Quanno Micco perzì s'era sosuto E s'allesteva sosperanno puro Penzanno a chello che l'era sortuto, E bò partire, se be' ancora è scuro.

Lo viecchio che l'aveva già sentuto Se sosette e ghìjo rente pe lo muro, E benché non vedesse pe lo bruoco Co lo focile s'allumaie lo fuoco.

E 'ntiso ca volea fare cammino Pe li compagne suoi priesto arrivare, Fece saglire n'arciulo de vino E pane e caso, se volea magnare:

Ma Micco, che d'ammore steva chino Ed autra voglia avea che de schianare, Le disse: «A mille 'razia, affé de Micco, Ca te faccio no iuorno essere ricco;

«Ma te voglio pe mo remonerare Co cosa che da Principe è prezzata, Ca te voglio a la 'ncorza ccà 'nmezzare Commo puoie dare franca na stoccata».

Ma lo viecchio vedennolo arrancare Sorriesseto ammarciai fore la strata, Ca 'mpagamiento avere se credette Quarche stoccata 'n miezo li filette.

E Micco disse: «Olà, potta de nnico, M'haie fatto aggravio mo co sta paura, Ca songo Micco, e te saraggio ammico Mentre sta vita a chisto munno dura!»

E fattolo securo a chilio vico Le disse: «Vide, 'mpara sta postura, Co sta stoccata e co sto strammazzone Farraie fuire n'armo de lione.

«E perché singhe commo a me balente E puozze fare a miezzo munno guerra T'azzetto pe compare e pe parente: Perzò sta spata mia piglia ed afferra,

Ca te farrà, toccannola, potente Poco manco de me ped ogne terra, E famuso e 'norato pe lo munno Sarraie chiammato lo Micco secunno».

Lo viecchio la pigliaie, ma non sapeva Dove se fosse, o se sia muorto o vivo, Perché avere l'agresta se credeva E mo se trova fatto no corrivo:

Ma perché farene autro non poteva Nce perde lo stallaggio co lo civo: E Micco lesto cortegianamente Se parte, e schetto dice: «A Dio, parente».

Lo quale perché ieze camminanno Pe chello frisco mentre fo matino, E spisso spisso puro cravaccanno, Dove trovava n'aseno o ronzino,

Li compagne arrivaie, che 'sceano tanno Da no certo casale llà becino, Che quanno lo vedettero arrivare Che sische te sentiste, e che alluccare!

E cossì 'nzieme all'Aquila arrivaro, Dov'era lo presidio destenato: Ma pe la primma sera nce alloggiaro Senza descrezïone, a muodo osato;

Micco, che fa fortuna commo a maro, Iognenno manco s'appe reposato, Ma cerca, vota, gira e fa ogne prova Fi' che la casa de Grannizia trova.

Nora ntratanto s'era carosata, Quanno che trista pe morire stette, Ma puro a la buon'ora era sanata E secotare Micco voglia avette;

Perzò vestuta d'ommo, co la spata, Na sera vierzo tardo se partette, E perché avea lo cuorpo auto e garbato Parea proprio no giovene sbarvato.

Partette, e 'n quattro pizzeche arrivaie Essa perzì dov'era Micco iunto, E pe bona fortuna lo trovaie 'Nnanze la porta de Grannizia a punto:

Con chi parlare esso non potte maie Perché ha paura de n'avere affrunto, Ma schitto ogne momiento da lontano La sbarretta, fa zinne e basamano.

Nora quanno lo vedde n'appe sciato D'arraggia e gelosia, ma fegne e sforza, Ed essa puro fa lo 'nnammorato De chella, che ped essa ascia a l'orza.

Micco crede che sia quarche sordato, Né la canosce, chesta sì ch' è forza, E quattro vote appe a lo cellevriello De farele paura e felatiello.

Ma po' se tenne, o voze cossì Ammore, O ch'isso fuorze avesse gran paura, E sta da 'rasso e mira ed ha lo core Frusciato de martiello e de cottura;

Grannizia 'ntanto pe sto frisco ardore Stuta de Micco suo la primma arzura, Ca proprio de volere ha resoluto Varva de felba no, ma de velluto.

Cossì uno ammore l'autro avea cacciato Commo chiuovo co chiuovo da no ligno: Micco s'adona e stanne desperato, Ca se vede sgarrato ogne designo;

Grannizia, c'ha lo giovene abbistato, Fatto ha lo core quanto no locigno Dicenno: «O bene mio, se chesto arrivo Micco sta vota nce sarrà corrivo.

«Di' ca non voglio sta speranza mia, Ch'aggia sempre lo sciore a lo pignato, E a lo patrone restarà lescia Tanto lo grasso ne sarrà levato.

Voglio arrobbare sempre commo Arpia Pe dare a chisto bello 'nnammorato E panne viecchie e pane e lardo e caso, Facenno a cagno e scagno co no vaso».

Nora che vede già fatto l'affetto Propriamente comm'essa 'nmagenava, Iettanno ieva mo quarche mottetto, E che Micco sentesse se 'nzeccava;

d a Grannizia cerca no lazzetto Che da lo cuollo le pennolïava, Ca lo vòle pe 'mpresa e pe favore E pe 'nzegnale ca le porta ammore.

Grannizia, ch'è vaiassa de natura, Sùbeto se lo crese ch'era ammata, E se tenne pe bella crëatura Credennose che Nora è già scarfata:

E non s'adona e non vede la scura Ca, commo essa nmerdava, è deleggiata. Scippa lo lazzo e dice: «Te', tresoro, Vorria che fosse na catena d'oro.

«Ma famme 'razia a notte de venire, Ca potimmo parlare cchiù pedaso». Micco chesto sentenno appe a morire Ed è commo na statola remmaso,

Puro quanno potette revenire Decette: «Io pozza perdere lo naso Se non ne faccio mo proprio mennetta!» Quartea la cappa e carca la barretta.

E dice: «Bene mio, chesta Segnora E cosa mia, non saccio se lo saie: Ora lassala stare, a la buon'ora, Se non, co Micco te la pigliaraie!»

«Co ciento Micche, le decette Nora, La voglio. Arranca, su, priesto, che faie? E mette mano proprio da valente, Ma Micco non arranca e tene mente.

E dice: «Ferma, torna a 'nfoderare, Ca sì cierto no giovene 'norato, Pocc'aviste tant'armo d'arrancare Contra chi Marte ha binto a lo steccato:

E perzò non te voglio smafarare, Va' a la buon'ora, e siate perdonato». E pe ne 'scire priesto da lo 'ntrico Senza dir autro vota pe lo vico.

Commo leparo c'ha bracche a la coda, Commo la preta ch'esce da scionneia, Commo nave c'ha viento a poppa e proda, Commo tigre che figlie secoteia,

Commo li puorce correno a la vroda E commo d'arco frezza voleteia, Cossì Micco correnno pe corrivo Affuffa e squaglia commo argiento vivo.

Nora che bede quanto è 'ncammenato Spera ch'Ammore le farrà iostizia, E a no bottone avennose attaccato Lo lazzetiello che le dìjo Grannizia,

Perché parlare a notte hanno appontato Azzò la gente non trasa a malizia, Fatto c'appe no bello vasamano S'abbiaie pe la terra chiano chiano.

E quanno Febo scompe la carrera Torna da llàne e mettese a sescare, Commo co la vaiassa appontato era, Che priesto se venette ad affacciare

Decenno: «E chi me dà sta bona sera? Chi tanto bene vèneme a portare? O bene mio, che gioia, e che morzillo! Pe seie Passare vale sto Cardillo».

«E grazia che me fa Vossegnoria, Respose Nora, tu sì m'haie speruto, Che se non t'aggio pe mogliere mia Me scanno co no spruoccolo appontuto».

«Oimé, non sia pe ditto, arrasso sia, Disse Grannizia, ca me nce hai cogliuto, Ca quanno ssi bell'uocchi tuoi vediette Lo core e l'arma sùbeto te diette.

«E se be' Micco m'era 'nnammorato C'ha paricchie anne, e pare no Marchese, Da lo quatierno mo l'aggio scassato E no' lo stimmo manco no tornese.

Se da te, core mio, chesso è prezzato, Parla co lo Segnore, ch'è cortese, E di' ca de pigliareme haie golìo, Ca cierto me te dace, core mio.

«E faie lo buon ïuorno a me pigliare, Ca se be' so' zitella a sto Segnore Liberamente me pozzo avantare Ca so' nasciuta de gente de 'nore;

E saccio tanto l'aco manïare Quanto ogn'autra zitella de valore, E saccio fare cose da stordire, Ma non commène a me de te le dire.

«Otra ca m'ha stipato lo patrone Vinticinco docate pe la dote; Aggio po' na gonnella e no ieppone Nova, che n'è portata ciento vote,

De mille scartapelle no cascione Che sta carcato quanto cchiù se pòte: Cride ca nce aggio puosti ciento stiglie, Pe fi' a le coppolelle s'aggio figlie».

Nora che se pigliava 'sfazïone Vedere la vaiassa 'ncrapecciata, - So' no Re, disse, s'aggio sto voccone -: «Ma tu manco sarraie male 'ncappata:

Io craie matino parlo a lo patrone, E se no' me te dace, co sta spata Me ne saglio a la 'mbruna lloco suso, Me te piglio, e le rompo lo caruso.

«Ma dimme, bene mio, le cose belle Che saie fare, ca n'aggio gran piacere. E le deveno dire le zitelle, Ca le bertute s'hanno da sapere».

«Saccio fare, diss'essa, assai coselle, Commo spero ca priesto hai da vedere: Ma quarcuna pe mo ne voglio dire Pocca tu me ne prieghe e buoie sentire.

«Io saccio fare ciento sfilatielle, Punto spagnuolo e l'àfreco perciato, Li pedemosca e li punte cairielle, No corzetto, na rezza e no toccato;

Faccio pezzille a dece tommarielle, Che pozzo guadagnare no docato, Spichetta, retopunto, mazzarella, 'Ntaglio, dente de cane e sarcenella».

Nora redeva, e sotta lengua dice: - Lo malanno perzì che Dio te dia -, Po' disse forte: «Cierto so' felice, E da vero sarraie la vita mia.

Ora craie vengo co cierte autre amice E beo la sorte mia commo se sia». «Sìne, disse essa, e non me fa' sperire, E piglia chesto se te ne vuoie ire».

E ietta, a na mappina arravogliata, Na bona fella de caso cavallo, Na meza 'nnoglia e meza sopressata, E li piede e lo cuollo de no gallo,

No piezzo de na mèuza 'nmottonata, Quattro tozze de pane e no tarallo, Che me creo ca teneva lo patrone Appiso pe quanno ha lo strangoglione.

Nora le piglia e dice: «Bona sera», E se ne vace muto allegramente, Ca tene avere vinto la varrera Pocc'have 'mpapocchiata sta scontente;

Po' visto quanto a la mappina nc'era Lo deze co gran gusto a no pezzente, E già penzato quanto avea da fare Perch'era tardo ièzese a corcare.

Ma Micco steva curzo e desperato Pocca se vede perdere l'ammica, Che da lo core suio have sfrattato Pe nova sciamma la carcara antica:

Ma dapo' c'ha no piezzo sbarïato 'Ncoppa lo lietto, che parea d'ardica, Se resorve parlare a lo patrone E bedere che tene 'mpenïone.