CANTO SECUNNO

Mastro Roggiero a suono di lïuto A lo Cerriglio allegramente canta La ienimma da dove era scennuto Micco valente, che la 'Talia spanta;

La compagnia, ch'avea buono 'ngorfuto, De lo sentire se n'allegra e 'ncanta; Ed isso sta preiato de manera Commo se tanno 'scesse da galera.

Po' secotaie: «Co tutto ch'isso è nato 'N 'Talia, la soa ienimma esce da Troia. Quanno chillo paiese fo abbrusciato Pe na guaguina ch'appe tanta foia,

E Morte tanta gente ha macenato Commo grano che scenne da trammoia, E quanno Enea piatuso d'isso schitto Lo fierro auzaie, perzò piatuso è ditto,

«E venne a Romma co no bregantino, Dapo' ciento vïagge e ciento guaie, E fattose pe ammico Re Latino Pe mogliere la figlia se pigliaie,

Avea cod isso, Enea, no babuino Che la bella Dedone le donaie: No iuorno iea zompanno pe la casa, E cadìjo 'n chiummo dinto na privasa.

«E perzò a no Troiano Enea chiammato, Decette: - Curre, curre, pigliamillo, E te promecco, quanno l'haie pigliato, Darete li cosciale ch'appe Achillo -;

Quanno vediste chillo sommozzato Pe lo tùfolo, lieggio commo a grillo: Ma perché nce iea stritto: - Io passarò, Disse 'n toscano, o quinci morirò -.

«E tanto fece forza che trasette E lo gattomaimone ne pigliaie, E tutto quanto sperfumato 'scette, E Passarò pe nomme le restaie;

Lo punto 'ncoppa a l'o po' si perdette, E Passaro po' sempre se chiammaie: Ora da chisto, mo, pe linea scenne Sto Passaro che bola senza penne.

«A chisto Enea facette cammariero De lo meglio cavallo che s'asciava, Lo quale commo a buono cavaliero Ogne matina a l'arba lo strigliava;

Lo figlio a chisto po' de no levriero Ch'a no zumpo li liepare pigliava Fece aio, da lo quale n'autro 'scette Passaro, po', ch'a Napole venette.

«Micco appe nomme, e fo ricco e balente, Che l'uommene accedea pe no tornese; Chisto Renza pigliaie, ch'era parente De no guattaro, 'n Corte, calavrese,

Lo quale tanto fece destramente Co lo Re ch'era tanno a sto paiese Che le concesse, stanno assai de vena, Ch'accedesse le gente senza pena.

«Da chisto po' scennette Carmeniello, Che pe na sborria se deze 'n campagna, E commo speretuso gioveniello Commo lèparo iea pe la montagna;

Po' quanno fo lo patre vecchiarello Se vortaie, e benettele da Spagna De chillo affizio I 'amprïazïone, E campaie sempre commo no Barone.

«Da chisto n'autro Micco po' scennette E fo, pe quanto se ne vedde e disse, Ommo de tanto studio e che leiette Scorrenno, e senza fauza rega scrisse,

E perzò da lo Re n'affizio avette Che tutte l'autre ne restaro ammisse: Oh viato chi nasce a sto destino! De la Bagliva fecelo agozino.

«Da chisto ne scennette po' Carluccio Che rescette no bravo spataccino, E se be' parea manzo commo a ciuccio L'uommene t'accedea pe no lupino;

No iuorno fece commo a Mastro Muccio Zompare no smargiasso a lo Pennino, E se notriccia la sore non era De no scrivano, cierto iea 'n galera.

«Da Carluccio scennette po' no Mase, Che fo gran letterato e berteluso, E se facette doie para de case Co lo giardino fora lo Pertuso;

Chisto screvette perché le privase Feteno, e perché a mare nce sta 'nfuso, Ch'era nfra li felosofe mastrone A l'uocchie d'Arestotele e Pratone.

«Da chisto po' scennette no Giancola, Che d'aurina fo miedeco de chiappa, E la mula 'nmezzaie de ghire sola E defennere a cauce la gualtrappa:

Chisto difese a càtreta ed a scola Ca la femmena è vecchia quanno arrappa, Chisto dicea, vedenno no malato: -Tu starraie buono quanno sì sanato -.

«Da Giancola scennette Gianferrante, Smargiasso comme l'aute antecestune, Perché fegliulo fo gran pretïante, E portava no chiuovo a li cauzune;

Po' se facette quanto no giagante, E faceva ogne iuorno a secozzune, Né maie lassaie sta zirria, fi' ch'a caso N'autro cchiù tuosto l'ammaccaie lo naso.

«Velardiniello po' da chisto 'scette, Che fo poeta e facea ire a lava Li vierze, e chella storia componette Che fo tanto laudata e tanto brava,

Dove co stile arruoieco nce decette: “Ciento anne arreto ch'era viva vava”, Co mille autre soniette e matricale, A Napole laudando e li Casale.

«Da chisto scese n'auto Micco, ed era (Oh mamma mia) che bravo smargiassone! Appe a la casa soa sempre la fera De li compagne e de l'autre perzone;

Isso facea fuire da galera Ogni iuorno quarcuno, e da presone, E quanno quarche cosa era arrobbata Se ive ad isso sùbito era asciata:

«Ca conosceva tutte l'alevente E sapeva d'ognuno lo trattare, S'era pe le saccocciole valente O s'era armuso de lo cappïare,

S'era pe fare truffe delegente O se sapea le porte smafarare, Tanto che secunno era lo delitto Sapeva dove ire a pede fitto.

«E non facea na meza passïata 'Nnanze a chianchiero o 'nnanze a potecaro Che sùbeto veneva la costata E caso e frutte senza no denaro

A la casa perzì l'era mannata La falanghina da lo tavernaro Pane de puccia da lo panettiero, Che senza spesa stea da Cavaliero.

«E pe fare saglire la casata Co na Sdamma spagnola se 'nzoraie, Che fo de muodo nobele e 'norata Che na corona 'n capo le 'npizzaie;

Donna Casillo chesta era chiammata, Che lo Correggetore la sterraie Commo diceno llà, perché a Matriglia Non se trovava cchiù sauza pariglia.

«Ma no' le voze dare no contiento Ch'essa facesse 'reda, scura sciorte! Ma uno che nce aveano parte ciento Morette 'n foce, ed essa venne a morte.

Non saccio commo Micco a sto tormiento Non s'accedesse, tanto l'appe a forte, Perché sperava fare a sta sfornata Lo mierco de lo Donno a la casata.

«Ma facettero tanto li sanzare E tutti li parenti co l'ammice Che n'autra vota se venne a 'nzorare Co na Signora chiammata Viatrice,

Co la quale lo voze conzolare La natura de 'reda assai felice Ca bellamente da lo primmo mese Se rebellaie da lo Segno' Marchese.

E le fece de figli na gran chella, E nfra l'autre lo sciore de la gente, C'avea na faccia rossa, ianca e bella, Como no milo diece strelucente;

Ogn'uocchio c'avea 'n fronte era na stella, E da che fo 'n fasciolla fo balente: Lo gran Pascale fo chisto ch'io dico, D'ogne funnaco spanto e d'ogne vico.

«Chisto fo sempre tanto ben voluto Da lo puopolo grasso e da Segnure, Che lo vediste sùbito sagliuto A gran commo-se-chiamma e granne 'nure;

E fo de tale affizio proveduto Che le venea lo pane commo a sciure: O bona usanza, commo sì squagliata! Di' ca sentive fieto per la strata!

«Perché ieva sto giovene 'norato Pe quanta s'ascia a Napole quartiere Co na gran cincorenza 'ncuollo armato A l'uocchie de no scheltro de n'arfiere,

E se no cane muorto era iettato Lo mettea priesto sotta lo portiere, Ed otra ca n'avea na paga bella Lo scortecava e ne vennea la pella.

«No Colambruoso po' scese da chisto Che fo lo spanto de li smargiassune. Che lamma franca! Che sordato listo! Che bravo ammico, a fare a costïune!

A fare vierze fo no petrarchisto, No Conte Orlanno a rompere casciune, E perché doce fo cchiù de copeta Lo mese a na commedia Isa poeta.

«Ma dove songo, aimé? Musa, soccurzo, Ca co poco vescuotto so' 'nmarcato, E so' co lo golìo già tanto curzo Che dintro no gran maro so' 'ngorfato.

Damme de ss'acqua fresca n'autro surzo Azzò scompa sto chillo accommenzato; Ma creo sarrà na gran doglia de testa S'io voglio dire mo chello che resta.

«Basta. Ca da Pascale n'autro Micco, E da Micco, Pascale po' scennette, Che fo da dove lo presente Micco La 'rigene appe ed a sto munno 'scette.

O 'nore de li Micche, Signo' Micco, Ch'a lo tiempo e a la morte fai sgammette, Ca se pretenne no pepierno o vrunzo Chiavare 'n terra, ah c'ha pigliato chiunzo.

«Che serve adonca tanto frusciamiento, L'antecessure tuoi dire chi foro, Se tu dai nomme e luce a quattrociento E n'hai besuogno de la famma loro?

Pare la famma toia na ntorcia a biento Da Vico a Trocchia e da Cracovia al Moro, Né d'autro che de tuoie fatte 'norate Cantano sagliembanche e li cecate.

«Tu sì de la bellezza no paone, Tu sì de la fortezza n'alefante, Marte no sta co tico a paragone Ca tu le vaie quaranta passe 'nnante;

Te cede puro chillo bello Adone Ch'a Venere parea tanto galante: Anze, ogne cosa hai tu, grazia e balore, Marte armato a la facce, Adone 'n core.

«Tu po' se miette 'n carta sì no Tasso, E bince chillo de la Carriola, Tu se co la chitarra te dai spasso Pare pica 'nmezzata a la gaiola.

Lo 'ngiegno tuo, c'hai po', dove lo lasse? Na scigna non l'ha cchiù, manco na cola, Che zò che bide, faie (iodizio strano), Zò che te chiave 'n chiocca fa la mano.

«Pe agghiustare na pace, cagnatillo, No' schitto ntra nemmice e smargiassune! Ma se n'ommo e na femmena ha tantillo De sdigno, saude tu le costïune.

Ognuno a canto a te pare verrillo, Ogne donna pe te fa sbarïune: Ma che cammino cchiù, s'a sto vïaggio Se stracquaria no museco de maggio?»