CANTO SECUNNO

Figliai Renza e lacette na figliola Che lo marito n'appe a spantecare. Ogne vaiassa n'have cannavola E se ne sbigna pe se sgolïare.

Vace lo banno; Prezïosa sola Scrive a Cienzo e se vole mmaretare; Nce la dà lo patrone, e Carmosina Non pò fuire, e posta <è> a na cantina.

Renza campaie commo na Segnora E 'scette prena 'n capo de no mese. Ogne uno le diceva: «A la bon'ora! Te vea mamma de Conte e de Marchese».

A Mineco parea mille anne onne ora Che la mogliere trasesse a lo mese, Ped avere no ninno o na nennella Che la portasse a màmmara-nocella.

Venne chessa ora, ma la crïatura Poco mancaie che no' moresse 'n foce: Ma la mammana, che n'avea paura, La capo le 'ntronaie ad auta voce:

«Spriémmete, figlia, spriemme, ca non dura Troppo st'ammaro, e venerrà lo doce. Spriémmete, bene mio, sta' 'n cellevriello, Aiutate, te', scioscia st'agliariello».

Puro figliaie e 'scette a sarvamiento, Ca ionze l'ora, e fece na figliacca Che vessica parea chiena de viento, E sùbeto che 'scìjo fece la cacca;

E Menechiello preiato e contiento Disse: «Anna a tata, figlia de na vacca, Ca chillo c'have bella 'reda a fare Besogna da na squacquara 'ncignare».

Ma la mammana disse: «Mo, compare, La mecco 'n terra, e po' tu pigliatella: Ma lassamella 'nnanze covernare, Ca piglia friddo, po', la pacionella».

Cossì pigliaie lo filo pe legare Lo vellicolo, e po' la forfecella, E legato che l'appe lo tagliaie Quanto parette ad essa ch'abbastaie.

E de lo sango che sghizzato n'era Le tegnette la facce, azzò che fosse La ninna po' cchiù rossolella 'n cera: Perzò ne vide certe accossì rosse.

E po' la stese 'ncoppa la lettèra E conciàiele le vraccia, gamme e cosse; Lo filo de la lengua po' rompette E zuccaro e cannella nce mettette.

Po' salïaie dinto la sportella No pocorillo de sale pisato, Decenno: «Te', ca cchiù saporitella Sarrà quanno hai po' lo marito a lato»,

E le mettette la tellecarella; Dapo' che lo nasillo appe affilato, Co lo cotriello e co lo fasciaturo L'arravogliaie che parze pisaturo.

Po' pisaie maiorana e fasolara, Aruta, menta, canfora e cardille, E n'erva che non saccio, puro amara, Che se dace pe vocca a peccerille,

E disse: «Te', se la tenite cara A bevere le date sti zuchille, Ca n'averrà de ventre maie dolore E se farrà commo no bello sciore».

Postala 'n terra, po', disse: «Ora susso Auzala mo, compare, allegramente, E benedicetella, e chillo musso Le vasa, e po' la mostra a ss'aute gente».

Isso lo fece e se facette russo De prieio, e po' la deze a no parente, E cossì l'uno a l'auto la mostraro, Che commo palla la pallottiaro.

Ora mo la mammana vertolosa Redenno se 'nzeccaie co la figliata E disse: «Non me stare regnolosa, Ca cchiù fatica è fare na colata».

«Non dicere, commare, tale cosa, Ca tutta quanta me sento schiattata, Essa respose. Io tengo <'n> cellevriello De no' nce stare cchiù co Menechiello».

«De chesto me ne rido, la mammana Respose tanno, ca non tanto priesto Passarà, figlia mia, chesta semmana Che farraie co mariteto lo riesto!

Tu dice chesso mo ca no' staie sana E lo dolore te leva de siesto: Ma 'nnanze de pescruozzo te ne piente E farraie commo n'auta. Ora mo siente:

«Dice ch'era na vota na zitella C'avea le doglie e non potea figliare, E strillanno chiammava chesta e chella, Che venessero priesto ad aiutare.

- Che me venga, dicea, 'n capo la zella, Se cchiù nce 'ncappo a fareme 'mprenare. Marito tradetore, e che m'haie fatto? Ca me sento morire, e crepo e schiatto!

«A chille strille corze la Voccera E tutte le vecine della strata: Mettettero na cosa a la spallera, Tanto che 'n quatto doglie fu figliata;

Ma manco la seconna 'sciuta l'era Quanno essa disse a chi l'avea aiutata: - Stìpame, sore mia, sta chella, ascota, Pe quanno figliarraggio n'auta vota -.

«Voglio dicere mo ca buono saccio De vuie aute zitelle l'appetito, Ca tutte pagarissevo no vraccio Pe no morzillo schitto de marito:

E cchiù priesto volite quarche abbraccio Che ve 'ncignare no nuovo vestito. Uh, mara me, quanno era giovene io Quante carizze fice a Fonzo mio.

«Gaude mo, figlia, che gaudere puoie, Ca commo po' sì vecchia non porraie: Giovene tu puoie fare zò che vuoie, Ma vecchia no, ca sì chiena de guaie.

Se na vecchia vò dire li guaie suoie, Uh, negra me, ca no' la scompe maie. Ma lassammo da banna sso parlare, Ca passa ll'ora de te covernare.

«Ora pruóieme ccà chill'arvariello Addove stace chello metredato, E damme puro sso fiaschetiello Con chello grieco che non è adacquato,

E sta grasta co l'uoglio de lauriello Co l'aute cose ch'aggio apparecchiato: Acqua ed uoglio de sciure e lo cemmino E n'onza e meza de zuccaro fino».

Sùbeto tutto chesto le portaie Madamma Vasta, e dèrole pe vocca Lo metredato e grieco, e po' l'ontaie Con chelle ogliara e disse: «Mo te tocca

La torta e lo peccione, pocca l'haie: E magna, a la bon'ora, e po' te cocca. E se purgasse fuorze poccorillo 'Npìzzate (ah, tu sai mo) chisto penillo».

Ma lassammole mo co li guaie lloro E decimmo de Zeza e de Grannizia, De Meneca, de Ciancia, e quanta foro Che contra Amore gridaro iostizia.

Onne vaiassa face concestoro, De chelle che trasettero a malizia, Pocca primmo de lloro mmaretata S'è Renza, tutta scura e sciallacquata.

Meneca fu la primma che parlaie, E co na 'rraggia che iettava fuoco E l'uocchie pesciarielle accommenzaie: «Avite visto Renza co lo cuoco

Commo se gaude? E nuie stammo a li guaie E commo cionche maie cagnammo luoco. Ora susso facimmo de manera Ch'onne una gaude 'nnanze craie a sera!»

«Mo m'allisto, Grannizia le respose, E tanto me strellicco e po' me 'nchiacco Che faccio cheste masche commo a rose E propio pareraggio la Dea Bacco».

«Nulla de vuie me passa de sse cose, Respose Ciancia. Io tutte mo ve smacco, Me faccio schitto quatto ricce 'n fronte E pareraggio po' la Dea Caronte».

«Ah ah che riso, ma non n'aggio voglia! Chi è sso Caronte e Bacco che decite?, Le disse Rosa. Fosse uorto de foglia?» Respose Caradonia: «Te', sentite!

Eie no sanguinaccio, èie na 'nnoglia! Ente megnogne, e chesto non sapite? Mara me, che vregogna, uh che sciocchezza! Chesse songo le Dee de la bellezza!

«Ma parlammo de chello che nce 'mporta: Onne una parla mo co lo Segnore O pe lo fenestriello o pe la porta, E le faccia a<s>sapere lo suo ammore;

E pe mostrare ca ped isso è morta Le faccia no presiento o no favore, Zoè no moccaturo lavorato De pedemosca o d'afreco perciato».

Manco essa avea scomputo de parlare Che tutte quante 'nzembra s'accordaro, Quanno lo Sole stracquo de trottare Pe fare de lo cuorpo scenne a maro,

De ire tutte quante ped asciare Chille pe chi cchiù vote spantecaro. Cossì concruso onne una s'abbïaie Decenno: «Po' nce vederimmo craie».

Ma Prezïosa che non potea 'scire E se sentea schiattare de martiello, Pe non volere 'n tutto ascevolire Da lo puzzo chiammaie no scolariello,

Che le screvette quanto sappe dire, Ch'avea no bello 'nciegno e cellevriello, E fecero na lettera ammorosa, Bene mio bello, e che pentata cosa!

«Magnifeco, dicea, muto 'lustrissemo, Che me faie spantecare e ire 'nzuoccole, Segno' Cenzullo mio caro e bellissemo, Cchiù saporito ca non so' li vruoccole;

Deh, vienem'a trovare, ca certissemo Haie tuorto, e non me fare tanta ngnuoccole. Viene, musso mio d'oro, a conzolareme, Se no so' resoluta de sbentrareme».

Sùbeto la chiudette e seiellaie Co pane mazzeccato, e lo scolaro Pe farele piacere la portaie A Cienzo suo, moscolïato e caro.

Ntratanto onne vaiassa se trovaie Lo guzzo, e già contente ne restaro; Ma la vaiassa onne patrone aspetta: Non la vedenno vace a lo trommetta.

Ieze lo banno mo pe la cetate E se iettaie a lo Mercato, a l'Uorto De lo Conte, perzì a la Caretate, A la Rua Catalana e 'n miezo Puorto;

Né maie da li patrune foro asciate, Ed era lo trommetta miezo muorto Decenno: «Onne patrone èie cortese, Ed a chi l'ascia dace no tornese».

Ma lassammole ire a la bon'ora E parlammo no poco de Cenzullo, Che la lettera avìje de la Signora E disse: «Aimé, so' cuotto co no vullo,

E no iuorno me pare onne meza ora Che siammo <stammo> 'nzembra e no' nce vega nullo, Pe fare co le iedeta lo cunto De quante vote m'haie co ss'uocchie punto».

E ieze de corzera a lo Segnore Patrone de la bella Prezïosa E le decette: «Io svisciolato ammore Porto a sta toa zitella vroccolosa,

E ped ella aggio mo no crepacore Che ne pozzo morire; e non è cosa Ca vago, arrasso sia!, co lo demmonio. Perzò facimmo mo sso matremmonio».

Lo patrone, ch'avea buono iodizio E sapea ca lo munno era 'mbrogliato E de chelle foiute avette 'nnizio, Sùbeto se fu bello contentato;

E chiammanno essa co Nota' Frabizio Se concrudette llà lo parentato, E s'appontaie che po' l'auta semmana S'abballasse e corresse la quintana.

Ma mentre se conzerta pe la danza, Tornammo a chelle che se ne foièro Pe farese vassalle a Re de Franza. Ora chi penzaria fi' dove ièro?

Chi ieze a la Chiazzetta e chi pe stanza Pigliaie la Caglientescia o lo Quartiero. Vasta: ca pe lo primmo carnevale Tutte ièro a morire a lo 'spetale.

Ma Carmosina no, perché l'asciaro Quanno foiea 'mmiezo li scalandrune; Perzò li ture buono le menaro, Sempre a cuorpo de tùtare e sgrognune,

E abbascio la cantina la chiavaro, Che steze sempre 'ncoppa li cravune Commo a gatta frostera. Ma dirraggio Craie commo 'scette, e de lo mmaretaggio.