CANTO QUINTO

Cenza da Ciullo have na sbravïata; Vene l'amico e da no fenestriello Le tira co na scopa na mazzata, Tanto che fa de gente no rotiello.

Micco Passaro iogne e a cappa e spata Fa fare a lo Pertuso no doviello; Scompisce a la taverna ogne roina E rotta è la fattura a Carmosina.

Già 'sceva l'Arba co lo mantesino Zippo de coppetielle e de papagne, E commo perne quanto no carrino Stizze sbruffava 'ncoppa le campagne;

Già li sturne e le quaglie ben matino Stordevano li vuosche e le montagne, E de la Terra le ventosetate Cotolavano l'erve defrescate;

Quanno s'era sosuto, cchiù arraggiato Che chi vace pe debbeto presone, Ciullo marisso, e stea tanto scornato Che non mirava 'n facce a le perzone,

Pocca 'mpierdeto s'era affatecato Senza dare a la zita 'sfazïone, E perzò se resorve o de morire O farene l'ammica arrepentire.

E sotta se mettette no cortiello E de corzera la ieze a trovare, Perché s'ha puosto propio 'n cellevriello Se no' lo scioglie llà de la scannare:

Ma perché ieze troppo matiniello L'abbesognaie la porta tozzolare, Ca se ieva cchiù tardo asciava apierto E lo designo le resceva cierto.

Ma chella s'affacciaie a la fenesta Addove pe le fare quarche male Abbesognava avere na valesta, E stare arrasso pe quarche aurinale;

E comme ch'era assaie chiappina e lesta Essa facette mo de lo fescale, Gridanno: «Guardia, guardia, ca m'apposta Sto tradetore, testemmonia vosta!»

Se Ciullo se 'ntosciai non te lo dico, Ca da te stisso te lo puoie penzare: Puro fa 'nfenta de l'essere ammico, Fuerze co chesso lo facesse 'ntrare.

Ma chella ha 'n cuorpo lo fauzo nemmico E se mettette cchiù forte a strillare, Perché sapenno chello c'have fatto Ha gran paura de no schiaccomatto.

Isso vedenno mo c'avea sgarrato Chillo triunfo che penzava fare, Se lassaie propio commo desperato A quanto cchiù la potte 'nciurïare:

«Non te cura', ienimma de crastato, Ca mo propio te faccio 'ngabellare. Scrofazza, pettolella, singhe accisa, Ca puerte carta straccia pe cammisa.

«Non m'haie legato, strega fattocchiara, Perchiepetola, brutta zantragliosa! E Carmosina mia scura ed ammara Faie che co mico stia pe chessa cosa.

Zitto! La burla costaratte cara, Ca vennetta farraggio auta e famosa. Uh, se t'avesse mo le mano adduosso Acciso sia se sano avisse n'uosso!»

«Tiente, ragazzo, le respose Cenza (Ch'accossì la guagnastra era chiammata), De che te cride stare 'mpretennenza Che me la frusce co la sbravïata?

Va', straccia-vrache mio, ped auta penza, Ca cchiù pe te no' stongo ammartellata: E s'haie golìo d'avere ste bellizze Va' ca n'haie sceca, quanto curre e 'mpizze!

«A me co felatielle? Pane-a-parte, Guattaro, zuca-vroda, marïuolo! Tu faie co mico de lo capoparte, E po' vorrisse quarche ferraiuolo.

Tu saie ca l'ommo mio è cchiù de Marte, E te fa co no cauce ire a lo Muolo: Squàgliamette da 'nanze stammatina Se provare non vuoie la tremmentina».

«Venga, esca, dov'è chisto smargiassone? Con chisso la vogl'io, Ciullo decette, Ca se schitto le do no secozzone Con cheste mano, mo, che songo nette,

Voglio che zompa commo no pallone E corra iusto commo le staffette: Ca io, quanno da vero sto 'nzorfato, Me la piglio co miezo lo Mercato».

No' avea scomputo ancora isso de dire Quanno che Cenza da lo fenestriello Lo 'nnammorato suo vedde venire, Che tanno se carcava lo cappiello,

Perché già le pareva de sentire Parole de chi ha male cellevriello, E gridaie: «Mase mio, viene mo suso: Sciaccamillo da ccà sto presentuso».

Ed isso pe lo muro rente rente Se ne trasette bello zitto zitto, E pontellaie la porta da valente E po' disse da suso: «Be', c'hai ditto?

Te cride fuorze de gliotti' la gente? Affé, s'a chesta tiene mente schitto Te voglio fare tale mazzïata Che 'n aterno te scuorde sta iornata».

«Me ne rido de chesso! Viene a chiazza, Ca vedarimmo po' ssa bravaria, Decette Ciullo: ca co spata e mazza Darraggio cunto de la vita mia.

E voglio propio ssa ianara pazza Che mo me guasta la fattocchiaria, A despietto de chi la vò faurire, Ca voglio co moglièrema comprire».

«Tu parle troppo, e sì no caca-sotta! Saglie ccà suso e vide che te faccio, Respose Mase, ca co meza botta Da la capo a li piede te scafaccio».

Ciullo arraggiato, mo, la porta votta E volea propio 'scire da sso 'mpaccio. La trova chiusa e grida: «Apre, vaiasso, Se no sta porta co no cauce scasso!»

Tanno Mase respose: «Abbotta puro, Brutto anchione, pacchiano, marranchino! Schiatta, tozza la capo pe sso muro, 'Mbrïacone fetente, otra de vino!

Va', bene mio, va' córcate a lo scuro Se n'haie auta cannela, e craie matino Va', vienetenne quanno face iuorno, Ca volimmo secarete no cuorno».

«Ne miente, pe ssa canna, busciardone, Respose Ciullo. Songo ommo 'norato E pozzo stare a tutto paragone, Che tu no' nce pueie stare, sbregognato!

Scinne, pocca me faie lo smargiassone A la fenesta, scinne ccà, frustato!» Aggio paura ca nce 'nnevenaie, Ca Mase a sso «frostato» se 'nzorfaie.

E con gran zirria le tiraie na mazza De scopa vecchia, che se le coglieva Cierto restava 'n miezo chella chiazza E na mummia o scapece ne faceva.

A chesso Ciullo commo cosa pazza Co na preta sciaccare lo voleva, Quanno che Micco Passaro arrivaie E lo remmore sùbbeto acquetaie.

Che afferraie pe la mano Ciullo e disse: «Core mio bello, non me vide muorto: Contame commo passano sse risse. Tu saie chi songo e se me teme Puorto!

Vediste quanno vinne ca s'affisse Onnuno? Ma non saccio chi have tuorto: Perzò lo vero propio vuoie contare, Ca te 'mpromecco mo de v'aggiustare».

Ora Ciullo le disse propio quante Cose ha passato, pe fi' a no puntillo: Onne 'mbruoglio de Cenza disse 'nnante, Appriesso po' chell'auto de Masillo.

Micco Passaro, ch'era dovellante Ed avea 'n capo sempre quarche grillo, Disse: «Besogna, pocca è chesso, frate, Che quatto cuorpe 'nzembra ve tirate».

«Chesso aggio a caro, disse Ciullo, e saccio Ca io lo zollo buono, sso potrone, E me lo zuco commo sanguinaccio, Perché la spata saie ca vò raggione».

«Mo mo te levaraggio da sso 'mpaccio Senza che lieve né che vaie presone, Decette Micco. Vattenne a magnare, Ca da ccà a n'ora te vengo a pigliare».

Ntra chesto ieze a trova' Mase, Micco, E le decette ca non ha raggione, Ed èie cosa de verrillo e sbricco Fare da suso de lo smargiassone:

«S'io dinto de sta casa mo me ficco, Che paura aggio manco de Sanzone? Non serveno da ccà le sbravïate: Besogna 'scire e fare a cortellate.

«Ora vattenne fora lo Pertuso, Ca con tico se vò cortellïare». «De grazia, isso respose, ma me scuso, Ca lo voglio de botta smafarare».

In chesto Cenza sbalanzaie lo fuso E mesese co Micco a sbravïare Decenno: «Sì cardascio de Masillo E che s'acciga vuoie co no verrillo!»

«E tu, respose Micco, non devive Fare le cose de chillo che squaglia; Accossì l'ommo tuo no' lo mettive A sto remmore ed a chesta retaglia.

Ma zitto: tutte duie 'sciarranno vive, Pocca io le porto da chesta battaglia. N'ave' paura, figlia (statte sàuda), Che lo scrivano o miedeco ne gauda.

«Ca po' facimmo sùbeto la pace: Ma besogna guastare chella cosa, Azzò quanno a corcare po' se vace Pozza d'amore cogliere la rosa».

«Se commo hai ditto la cosa se face, Essa respose, io guasto mo la dosa». Ed accossìne tutte s'accordaro E verzo lo Pertuso s'abbïaro.

Masillo fu lo primmo che nce iette, Mentre che Micco va Ciullo a chiamare: Lo quale, perché giacco non avette, De carta straccia ièzese a 'nforrare,

E quanno che chiammare se sentette Pigliaie na sferra, e po' pe no' schiantare A la soa cara e doce Carmosina Se ne sfilai quanno era a la cocina.

Che quanno s'adonaie ca co la spata Ciullo era 'sciuto, tutta se sciccaie; Ma mentre chiagne e stace desperata A lo Pertuso Mase Ciullo asciaie

E no miglio da 'rasso appe arrancata La sferra, ed a lo vraccio arravogliaie La cappa. E 'n chesto Ciullo da valente Disse: «L'haie fatta propio 'nfammemente!

«E mo ccà te lo boglio mantenere E carcàrete buono lo cappiello». Mase respose: «Non te trattenere, Miette mano e scompimmo sto doiello:

Se no te 'mpizzo, ca non pozzo avere Fremma, ca volle già lo cellevriello». Ma disse Ciullo: «Adaso, mazzafranca, Ca sta spata è arroggiuta e non s'arranca».

Po' quanno mese mano se tiraro Quatto cuorpe de chiatto e duie scenniente, Ma de manera che non se toccaro, Ca ne forriano tutte duie pezziente.

Micco, che pe ste cose era ommo raro: «Fermàte, disse, giuvene valiente», E 'n miezo se ficcaie commo no Marte, E co la spata sùbeto le sparte,

Dicenno: «O figli mieie, mo se pò fare La pace, ca ve site sgolïate, E nc'è lo 'nore vuostro, ca me pare Ca site tutte duie brave e forzate.

E se be' pò quarcuno chiacchiarare Decenno: - Comme saude le mazzate? -, A chisso dàlle 'n facce no permone E po' respunne: - Siente, cannarone!

«S'a no sordato 'n capo o forte o chiano Dà co na mazza co lo fierro 'mponta Lo Capitanio, chi è chillo pacchiano Che dice ch'è bregogna e ca l'affronta?

Perzò defengo co na picca 'n mano Dinto no fumo o co na mazza agghionta Ca non fu niente propio la mazzata, Pocca 'mponta la scopa avea 'mpizzata -».

Uh, chi dirria quanto se chiacchiaraie 'Ncoppa sto fatto? Puro s'accordaro. Po' Micco la parola ne pigliaie E verzo lo Cerriglio s'abbïaro.

Dapo' che l'uno e l'auto se vasaie Llà foro da Giansarvo tavernaro Servute propio commo tre Segnure, E scompìjo la taverna sti remmure.

Po' comme appero buono mazzecato Trippa, sambrusche, rósole ed arrusto E mangiaguerra e lagrema sciosciato, E de li suone avuto no gran gusto,

Ciullo, de la fattura allecordato: «Mase, frate, decette, sarria iusto Che facisse guastare la fattura, Ché Carmosina n'aggia cchiù cottura».

Micco decette: «Zitto, poveriello, Con chi te pienze tu d'avere a fare? Avimmo rutto lo catenacciello 'Nnanze che tu nce avisse da penzare,

E puoie rompere cierto lo castiello. Perzò lo veveraggio me puoie fare». «De grazia», Ciullo disse, e pe allegrezza Le dà sei rana dinto de na pezza.

E po' decenno: «Schiavo e servetore Ve songo a tutte», se pigliaie la via; E perché porta a la mogliere ammore, E levare le vò la cardacia

Corze e tutto azzoppato de sodore Ionze a la casa e disse: «Gioia mia, E scomputo ogne trivolo e despietto: Dirraggio commo po', dinto lo lietto».

E co na granne festa s'abbracciaro, Pigliannose isce bello quanto spasso! Po' co no granne gusto se corcaro Ma fecero lo suonno stare arrasso,

Perché la notte a staglio fatecaro Che se sentìjo doie miglia lo fracasso. E Carmosina stea tanto de vena Che chella primma notte 'scette prena.