CANTO QUINTO

Chiaiese dice chello che le pare A le guagnastre, e contale de chelle Che cchiù de lloro sapettero fare Commo femmene astute, e no' ciantelle;

Ma pe le grade lo vonne iettare Pe pagamiento, chelle pettolelle. Micco nce corre, e n'esce 'ntommacato, E co na cacavessa è secutato.

Commo furgolo iea co lo compagno Lo Dottore Chiaiese, e commo arcivo; L'adore che sentea de lo guadagno Dereto le servea d'argiento vivo:

Fa' cunto ca te vatte lo carcagno Che sciùlia commo a barca onta de sivo: E va de muodo che 'n quattro palate Va dove è Cianna co le cammarate.

Ch'a no scanniello fattolo assettare A dire commenzaie co no gran chianto: «Segno' Dottore mio, c'hai fatto auzare 'N auto la famma toa chilleto tanto,

Mo vedarimmo quanto tu puoi fare E si è secunno l'opera lo vanto: Ca si Vossignoria non ce aiutate Simmo iute a l'acito e consumate».

E cossì le contaie de punto 'n punto Quanto li 'nnammorate aveano fatto, E commo ogne sciaurato unto e bisunto Le deva de pedina schiacco matto;

E commo àppe scomputo chillo cunto Chiaiese disse: «Io me me piglio a patto, Si me date pe carta dui tornise, De ve le fare tutte essere 'npise.

«Have da fare poco cunto, 'n frutto, No guittariello de la carne umana, E schitto quanno sta sodunto e rutto Fare lo spantecato na semmana?

E po' ch'è puosto 'n punto, essenno strutto, Se fa battaglio de n'autra campana! Non lice, sore mia, ca sì tenuta Servire chillo che t'ha repoluta.

«Perché, dice Cepolla e Moscatiello E ciento autre Dotture cremmenale, Non deve n'ommo sano de cerviello Fare a na femmenella nullo male,

E tanto cchiù se face a lo fratiello Senza la cosetura no stivale; Femineo sesso povero e sprezzato, Commo sì sciso a tanto buon mercato!

«Erano antico tempore tenute Le meretrice comme le Regine, Ed erano prezzate e ben volute Commo le cose sceute e pellegrine:

Ca pe l'autre uorte n'erano cogliute Commo coglieno mo li petrosine, E so' 'mbrogliate de muodo le carte Che non se pò campare cchiù co ss'arte.

«Dove è mo Lamia d'Argo, ch'a squatrone Avea le gente appriesso dove ieva, E de lo granne Socrate e Platone A lo duppio con tutte cchiù poteva?

Ed a chesta no Re, piezzo d'anchione, Demetrio tanto bene le voleva Che quanno morze ne deventaie pazzo, E la tenne atterrata a lo palazzo.

«E dove è mo na Rodopea famosa Che guadagnava tanta denaraglia, Che facette 'n Agitto chella cosa Co dudece migliara de marmaglia:

Dico chella Pirramida pomposa Che non è bista che tant'auto saglia, Chella ch'è nommenata a tunno a tunno Pe quanto gira lo reverzo munno?

«Dove è Faucola Clunia che le spese Facette a meze le squatre romane Quanno pigliaro le zirrie e le 'nprese Ce le 'norate gente Capoane,

Ch'ognuno n'appe no buono garrese Che le duraie fi' a quinnece semmane? E Tàide, a chi Menandro fece 'nore Co tanta vierze che chioveano ammore?

«E dove è Flora, che quanno morette Lassaie tanta recchezze e facortate Che le muraglie Romma se facette, Quanno le venne tale 'redetate?

E se pagaie li diebete ch'avette Co chelle cchiù che l'erano restate, E fecero a mammoria po' de chesta No luoco dove ogn'anne era la festa.

«Dove è Làide Cortinthia? Dove è Frine? E Campaspe, lo sciore de le belle? Chelle àppero la Grecia pe li crine, Chesta Alessandro Magno e Mastro Apelle.

Dov'è Ermia Lopa, che scarfaie li rine A chi sapea le curzo de le stelle, Dice chillo felosofo 'norato Ch'era lo gran 'Restotele chiammato?

«Mo de vuie se 'nnammora no garzone, No pacchiano, no scuro, no scontente, Che quanno t'have dato no testone E già iuto a l'acito et è pezzente,

O veramente quarche smargiassone Che ve scorcoglia sempre e mai dà niente: Perzò meglio è lassare st'appetite E chiavareve tutte a le Pentite.

«Ch'aspettate a la fine, o poverelle? Che designo è lo vuostro, o che speranza? Credite essere sempre giovenelle E stare a spasso come Carlo 'n Franza?

Corre lo tiempo e vola co l'ascelle, E vene Morte, da chi nullo scanza: E vederite 'n quattro pezzecate La facce crespa e l'uocchie scarcagnate.

«La vocca, che mo adora commo rosa E pare co le perne na cannacca, Senza no dente se farrà bavosa E perderà lo minio co l'alacca;

Sta perzona che sta liscia e carnosa Farasse commo a cuoiero de na vacca, 'Nsomma lo fine vuostro, a manco male, E fracete morire a no 'spetale».

Le cortesciane mo chesto sentuto Se mettettero a fare no greciglio, Decenno: «Oh che Dottore, oh che saputo, Oh che brava parlata, oh che consiglio!

Va' scria da ccà, squaglia da ccà, paputo, Non t'accostare a nuie manco no miglio!» E dandole paricchie secozzune Le vonno fa' zompa' li scalandrune.

Ntra chesto Micco venette passanno E corze pe sapere che cosa era, E bisto ca Chiaiese vrociolanno Steva pe accommenzare la carrera,

Decette: «Ferma, olà, potta d'aguanno, Ca l'accedite, ed ha la mala sera!» A sto gridare tutte se fermaro Né lo scuro Chiaiese vrociolaro.

Ma visto ch'era Micco lo smargiasso Disse una: «Affé, che sì benuto a punto, E se pe te facimmo sto fracasso Co tico puro voglio fare cunto».

Stese tutto a no tiempo e punio e passo, Lo parlare e lo dare fo no punto, E perché Micco s'è votato a caso Fece la mira a l'uocchie e dìjo a lo naso.

L'autre ch'erano 'n zirria ed arraggiate Corzero appriesso, e lloco te vediste, O mamma mia!, che brave chianellate, E che strille e che 'ngiurie te sentiste;

Ma ne foro na mano reparate Da te, Coppido, ch'assai ccà potiste: Dico da Nora scura e sfortunata, Ch'ammava Micco ma non era ammata.

Micco che se sentette carfettare Da chesta squatra tanto arresecata, Pe no poco s'attese a reparare, E po' mettette mano pe la spata:

Ma 'nnante che se pozza reterare Le fo bona la facce ammatontata. Puro 'scette a la strata e con gran core Disse: «L'haie fatta da no tradetore!

«Iesce ccà co la spata, ca t'aspecco E te do conto de la vita mia. E si no' iesce sì no 'nfammo becco, E te lo provo 'n miezzo de sta via!»

Mentre accossì sta Micco a dicere, ecco 'Scèro dui co na bona fantasia Decenno:«Ecconce susso, aspetta, aspetta E mostraro doie vocche de scoppetta.

Micco decette: «Oimé, m'assassinate, Chesta è soperchiaria: vocche de fuoco? Ferma, potta de nnico, non tirate, Ca craie nce trevarimmo a n'auto luoco».

Tutto a no tiempo l'autre conzertate A certe tricche-tracche dèro fuoco: Micco se crese dereto le spalle Avere na sceppettata co doie palle.

Sta burla Micco maie non se credeva, Se be' sentea l'allucco e lo strillare, E tale parapiglia se faceva Vedenno ad isso correre e trottare

Che sempre appriesso avere le pareva Palle arrammate pe lo spertosare, Né maie se ferma e sparafenna e sporchia Fin tanto ch'a palazzo se 'ncaforchia.

Dove lassa 'ngarbare isso lo fatto A dire una pe n'autra, e commo è stato A trademiento ped essere sfatto Da cchiù de vinte che l'hanno assautato,

E che cierto facea quarche sbaratto Se l'arme a fuoco non ce fosse stato; Basta, tanta parole 'ntesse e accocchia Fi' ch'ogne uno le crede e se 'npapocchia.

Ntra chesto, perché stea gridanno Nora Ca non se commenea de maltrattare N'ommo 'norato, e ca 'nnanze che mora Se ne vòle de buone vennecare,

Cianna decette: «Zitto, a la malora, Che me puoi tu da ccà <a> cient'anne fare? Ca sì, ca no, de muodo s'afferraro Che la scura de Nora te sciaccaro.

Lloco nce corze cchiù de na vecina E se mesero 'mmiezzo, e le spartette, E co lo pane e la rosamarina No 'nchiastro 'n capo a Nora se facette.

Trattaro pace tutta la matina: Non ce fo taglio, Nora tosta stette, Vasta, ntra cheste litigante autere Nce gaudìje lo scrivano e lo varviere.

Ma lo Mastro de Campo avea chiammato, Commo lo Veceré fece ordenare, Tutte le gente co 'nzegne schiegate Perché a la 'mpresa voleano ammarciare;

Micco avea li compagne tutte asciate Che steano leste pe lo secotare, Ed accossì so', 'mmiero le binte ore, Tutte da la cetate 'sciute fore.

E Micco iea contento e grellïanno E deceva nfra sé: - Mo ne la vengo, Quanno te vederaggio, musso, quanno, E te conto che fuoco a st'arma tengo?

Ah, ca me pare ogn'ora cchiù de n'anno, E se tardo a bederete me 'npengo! Volle, Grannizia mia, sporpa sto core, Tanto fuoco pe te nce allumma Ammore.

- O pescraie o pescruzzo arriveraggio A chesta terra, ch'è Cielo pe mene! Oh che bello cammino, oh che vïaggio, Che me porta a bedere tanto bene!

Che 'sfazïone è chella c'averaggio, Massema se 'n ammora essa me tene! Scioscia dereto, Ammore, azzò cammine Cchiù priesto, su, ca l'arma me scarpine!

Ora va, Micco mio, tutto preiato, Miette l'ascelle, e bola commo auciello, Ca priesto priesto t'asciaraie 'nzorato, Vencenno de Grannizia lo castiello:

Già lo lietto te stace apparecchiato, Fa' no molino de sso cellevriello! Oh che gusto, oh che spasso, oh che carizze! L'haie 'nnevenata, quanto curre e 'npizze!