CANTO QUARTO

Ciullo se penza ch 'è scazzamauriello Vedenno Carmosina negrecata; A lo saglire, po', lo foneciello Se rompe e lanno n'auta vrociolata.

Lo patrone che scassa lo portiello 'Ntenne commo la cosa èie accascata: Conta Ciullo li guaie e catalaie Ed isso pe pietà lo contentaie.

Aveva Carmosina tanto a forte Ca Ciullo non vedea, stanno presone, E commo fosse connannato a morte 'Nficcato a lo mandrullo o cammarone

Chiagnenno tozzolava chelle porte, Lebertate cercanno a lo patrone. Ma isso fino a mo no' l'ha respuosto, Tanto è crodele e commo vreccia tuosto.

E mentre strilla e se rascagna e scicca Vróciola Ciullo dinto la cantina, E cade assaie cchiù auto che na picca, E vrociolanno fa na gran ruina:

Tanto che pe gran iaio essa se ficca, Sempre strillanno, dintro na latrina. Ciullo che vede scuro e chello ha 'ntiso A lo 'nfierno se crede essere sciso.

E deceva chiagnenno: «O maro mene, E quanno Carmosina vedarraggio Se so' caduto a le 'nfernesche pene E chi sa quanno maie da ccà 'scïarraggio?

Penzava priesto d'abbracciare a tene E mo, nigro me, scuro, abbracciarraggio Pe parte toia, o Carmosina mia, O Mecene o Protone o quarch'Arpia».

Pe lo tùfolo steva ausolïanno Carmosina sorrèsseta e sbanuta Zò che deceva Ciullo gualïanno, Ed avenno la voce canosciuta

Sùbeto 'scette e ièzese 'nzeccanno, Decenno: «S'èie Ciullo, me saluta!» Ma isso che credea stare a lo 'nfierno Le parette vedere lo zifierno.

E tremmanno tremmanno le deceva: «O spireto nmarditto, fatte arrasso!», Penzanno, perché tenta la vedeva, Ch'era, pe lo tentare, Sautanasso;

Ma essa, ch'isso meglio canosceva, Accostata che s'appe n'auto passo Decenno (l'abbracciaie): «Facce de boia, Zitto, ca songo Carmosina toia».

Tanno respose: «Non me delleggiare! Sì Carmosina, non me vide acciso, O fuerze chillo che puozze squagliare, O l'ombra de chill'ommo ch'oie s'è 'mpiso?»

Ed essa: «Se be' stongo pe crepare, Respose, puro schiattome de riso. Non me vide? Te', toccame, sciaurato. Viata me, co tale 'nnammorato!»

Voleano dire mo de che manera L'uno e l'auto llà dinto se so' asciate; Ma li compagne suoie de la varrera, Che a la desgrazia s'erano trovate,

Erano iute tutte de corzera Facenno no greciglio pe le strate, Tanto che venne cchiù de no parrella, Chi co cuofano e chi co fonecella.

E sùbeto calaro a lo pertuso Chiammanno Ciullo pe ne lo tirare: Lo quale priesto, pe no' stare 'nchiuso: «Covernamette», disse, e po' afferrare

Se voze a chella funa e ire suso; Ma Carmosina mesese a strillare Decenno: «Te ne vaie mo, tradetore? E te puorte de me l'arma e lo core!

«Vecco c'hanno la funa già calata: Légate mo, fatte tirare susso, Ca me ne vengo co tico abbracciata Se non vuoie che te 'ntommaca sso musso».

«Uh, Carmosina, e commo sì arraggiata, Respose Ciullo, e se facette russo. Se me vuoie bene lassamenne ire, Ca commo è bruoco te farraggio 'scire».

E s'attaccaie e po' decette: «Tira!», E l'aïsava cchiù de no guarzone, Quanno essa se votaie co na granne ira Che parze, arrasso sia, fosse scorzone,

Ed a lo naso fecele la nmira Pe faresenne propio no voccone: Ma non potenno le gamme l'afferra E dèro tutte duie zùffete 'n terra;

Ca rèiere non potte tanto pìsemo La fonecella, ch'era 'nfracetata, Tanto ch'onne uno avea lo parasìsemo, Ca fo troppo crudele vrociolata,

E decevano: «Oimé, dove nce misemo? Tiente, che bella cocchia stroppïata, Tiente lo premio che nce dace Amore: Presonia, chianto, vrògnola e dolore».

Ntratanto lo patrone era venuto De Carmosina, ch'era meza morta, E dinto li cosciale de velluto Va cercanno la chiave de la porta;

Né la trovanno, se fo resoluto Darela 'n terra, ch'è la via cchiù corta. E scassata che fu Ciullo trovaie E de tutto lo fatto lo spiaie.

Ed isso disse: «Patrone mio caro, Mo conto pe lo filo commo è stato, Se be' me trovo commo fele ammaro. Io no iuorno venea da lo Mercato

E chiste uocchie co l'uocchie s'affrontaro De sta cornuta, che m'ha 'ntommacato: Da donne Ammore, che n'avea che fare, Me voze co na frezza spertosare.

«M'accomenzaie a sbattere lo core E perdiette lo suonno e l'appetito, Comme fa lo malato quanno more; E pe golìo de l'essere marito

'Noratamente faciette l'ammore, E pagaria pe averela sto dito. Mo, correnno a sta festa, vrociolaie E ccà dinto cod essa me trovaie.

«E se be' steva tutto 'mbrognolato E me doleano l'usse e li filiette, Pe farela da vero 'nnammorato, Commo ch'era essa propio conoscette

Dapo' che m'appe quase speretato Pe paura, ca tenta la vediette, Le sautaie 'ncuollo lieggio comm'a grillo E diezele no vaso a pezzechillo.

«Ma non volenno ch'io me ne sagliesse, Quanno tirare 'ncoppa me vedeva A le gamme afferrata me se messe E commo a grancio o purpo me stregneva.

Ma pe lo piso granne, o se rompesse La funa, o ca scappasse a chi teneva, Simmo cadute, ed io moro crepato Se no' me schiaffo dinto no crastato.

«Chesto è quanto io te pozzo mo contare, E de lo mio non te nce metto niente. Ora se nce volite perdonare Ed avere pietà de sti trommiente

Facitence sta sera 'ngaudïare, Ca facimmo chiammare li pariente E ve restammo schiave ed obrecate Propio commo nce avissevo accattate».

Lo gentelommo, avennolo sentuto, E canoscenno ca lo vero ha ditto, Le disse: «Io me so' propio 'ntenneruto E non te voglio cchiù vedere affritto.

Pocca co 'nore mio nce sì venuto Va', pigliatella, e singhe beneditto; E iammoncenne suso, e a sta pedata Conzertammo pe craie st'auta 'nmarcata».

Accossì s'abbïaro chiano chiano Da la cantina a la vota de suso, Tutte alliegre e contiente pe la mano, Commo è de zite lo costumme e l'uso.

Ma perché steva Ciullo poco sano Pe la caduta, e de sodore 'nfuso, Lo gentelommo pe compassïone Lo fa corcare 'ncoppa no saccone.

E disse: «Frate mio, pocca 'nzorato Te sì con chesta ch'è zitella mia, Voglio che 'nnanze singhe covernato Pe te scanzare da na malatia:

Mo mo sarrà lo miedeco chiammato Azzò quarche remmedio isso te dia Pe tutte chesse brògnola sanare, Ca po' craie ve farraggio 'nguadïare».

E sùbbeto mannaie lo servetore A chiammare no cierto messe' tale, Ch'è no miedeco cierto de Segnore Ed ha sfrattato cchiù de no 'spetale.

Venette, e 'ntiso avenno lo dolore E commo e quanno se facette male, Parlaie toscano e disse: «Ho 'nteso a pieno: Ecco lo rezettario de Galeno.

«Mo vedarrimmo s'a chesta caduta, Pocca èie stata dinto na cantina, E buono ontare co zuco de ruta O veramente co cera cetrina.

Chesta arte nostra èie na scienzia futa Ed è de l'aute scienzie na Regina, Ed ha trovato propio pe onne male Agniento, nmedecina e serveziale».

Con chesto revotaie lo levretiello, E quanno l'appe tanto po' leiuto Che perzo nce averria lo cellevriello Onne auto letterùmmeco saputo,

Asciaie che de mortella e de rosiello La porva (o bello miedeco saputo!), Dapo' ch'ontato aveva <d'>uoglio rosato, Se semmenava a chello 'mbrognolato.

Accossì tanno de no cierto Losa A la poteca no fegliulo iette Ed accattaie sùbbeto onne cosa Secunno che deceano le rezette.

Carmosina l'ontaie tutta piatosa, E po' lo pane cuotto le facette Conciato, ch'era cosa prencepale, Con aglie ed uoglio, arecheto, acqua e sale.

Carmosina perzì se fece ontare Da n'autra vaiassella peccerella, E la matina se fece trovare E 'nciricciata e netta e ianca e bella:

E tutte quante fece po' scetare Che ancora 'n cielo nce parea na stella, Comm'a dicere, mo, propio a chell'ora Che no Toscano decerria l'aurora.

E ièro tutte quante a 'ngaudïare Accossìne, 'n chell'ora mateniello, Ca tiempo no' nce fo d'apparecchiare Pe fare festa e quarche banchettiello;

A la tornata fece cocenare Lo patrone doie torza e no sciosciello, E po' facette a tavola sedere A canto ad isso Ciullo e la mogliere.

Ma Carmosina, che stea crepantosa Ca s'era 'ngaudiata senza festa, Ieva facenno tanto la schefosa Che parea che magnasse o sorva o agresta.

Lo patrone le disse: «Staie cianciosa, O Carmosina mia, che cosa è chesta? Magna mo, figlia mia, sta' allegramente, C'haie pigliato no giovane valente».

«Lo saccio, respose essa, e chesto è chello Che me fa stare co sta crepantiglia: Ca chella che pigliaie no guarzonciello Ha fatto festa e tante parapiglia,

Ed io, ch'aggio pigliato no gioiello, E m'avite chiammato sempre figlia, So' nmaretata senza 'nmita' nullo. Che se dirrà de Carmosina e Ciullo?»

Respose isso: «Te voglio contentare E farraggio mo mo feste de truono, E no' schitto de farence abballare Ciento cascarde a tiempo de lo suono,

Ma na farza perzì farraggio fare, Na 'mpertecata da no mastro buono, Forze d'Ercole e po' li mattacine, E 'nmetarence tutte le vecine».

A che30sta nova tanto se preiaie La zita, che s'avette a 'scevolire; Po' commo n'allupata se magnaie Quanto a tavola nc'era da 'ngorfire,

Né nce fu arciulo che non devacaie (Bacco, se nc'iere, aiutamello a dire). Po' pe se 'ntrattenere fi' a lo bruoco Chiammaro ad uno co lo vottafuoco.

Lo quale ieze a lo zito e a la zita 'Mmezzanno quarche nova cascardella, Commo «Proderzia», «Maddamma la Zita», «Cunto de l'Uorco», «Vascia e Serenella»;

Dove iea Carmosina tanto ardita, Iettanno ccà e llà sta gamma e chella, Che parea propio, co li chianellette, Cavallo che se 'nmezza a fa' crovette.

Accossì fi' a la sera la passaro Ficché fu l'ora de lo mazzecare, Che se sedèro a tavola e magnaro Auto auto, pe cchiù priesto se corcare.

Ma pe parte de doce oh quanto ammaro La fortuna a lo lietto fece asciare: Pocca d'Ammore 'ntranno a lo steccato S'adonaie Ciullo d'essere legato.

Perché s'avea tenuto na guaguina (Potta de nnico e che mala ventura! ) Che ieze de corzera a na vecina E le facette fare na fattura:

Perzò non potte maie co Carmosina Fare quanto commanna la natura, Ma li scurisse se scolaro tutte Senza d'ammore cogliere li frutte.