CANTO QUARTO

S'affrontano l'eserzete, e fracasso E gra' stroverio ntra de lloro fanno, E po' ch'agnuno è ascevoluto e lasso Tregua se face, e a ritira' se vanno.

Cerriglio, c'ha sentuto lo gra' schiasso De lo nemmico, se resorve tanno Manna' Schirosso, ch'autro 'mbruoglio tramma; Isso nce va, ma po' se scopre a ramma.

Masto Titone s'era già affacciato De lo cielo a na certa fenestrella, E la mogliere aveva llà portato De cauce molla zeppa na tenella:

Perché Febo l'avea tanno ordenato Ch'uno de lloro fosse lo parrella, E ll'auto co no scupolo pigliasse La cauce, e lo palazzo ianchïasse;

Quanno vediste la gente affrontare Pe se 'mbrognolïare li caruse, E de sango vediste llà tornare Le capo rosse e li vestite 'nfuse.

Lo greciello, li strille e lo siscare Faceano li sordate cchiù anemuse: Ma chelle botte de le cannonate Le faceano torna' tutte cacate.

Li tammurre sonavano e li cuorne, Li cavalle correvano a 'mmestire, Ch'auto non se vedea pe li contuorne Che gente morte, o puro pe morire:

L'afficiale facëano gra' scuorne A chi se confarfava pe fuire, E po' co certe belle parolette Le pegneano lo 'nore a le mennette.

La porva co lo fummo 'n airo ieva, Che facea deventa' lo iuorno notte: L'uno co ll'auto tanto se vedeva Quanto lucea la vampa de le botte;

No vesbiglio dogliuso se senteva Che parea chillo de l'aterne grotte, Chi chiagneva feruto e chi arraggiato Morea, da li cavalle scarpisato.

Chi a la 'mprovisa se sentea schiaffare No grisuommolo aciervo a li filiette, E chi a la facce se sentea ficcare Na chioppa amara de nigre confiette;

Chi se vedea ne n'attemo <'n>nauzare Da sordatielle a quacche afficio aliette, E chi da Capitanio se vedeva Muorto quanno cchiù manco se credeva.

Llà bedive cade' na pettorata E scamazzava na frotta de gente, Ccà sentive veni' na cannonata E t'accedea n'ammico o no parente,

Da n'auta banna na saglioccolata Te sentive a lo stipo de la mente, E se sentea mescato p'ogne canto Botte, strille, siscate, allucco e chianto.

Mo vedive cade' no tammorrino, Po' fui' no cavallo scapolato, Mo te vedive a la morte vecino E po' da lo pericolo scampato;

Lo sango iea pe terra comme a bino E pe tutto nge stea allavaniato; E 'nfine nulla parte ng'era netta, Ma nge potive i' co la varchetta.

La vattaglia era 'n terra, e parea iusto Comme se fosse fatta 'n miezo maro: Pareva ognuno che pisasse musto, O pe di' meglio no sanguinacciaro;

Ccà vedive assomma' no miezo fusto, Llà de capo e de vraccia quacche paro, E bedive sauta' le cellevrelle Da capo a li sordate comme ascelle.

Ma chi pò tutto quanto sto remmore Contare comme propio soccedette? Abbesognante che fosse Dottore Comme so' cierte cacapozonette:

Che pe da ccà e da llà fanno l'ammore E se stirano ogn'ora le cauzette, E pe parte de tieste stodïare Stanno ogn'ora la fava a ghiodecare.

Perzò le faccio mo ccà reterare E fare tregua pe vintequatto ore, Perché non se pò propïo contare Sto solenno, spantuso e gran remmore;

Ognuno se facette medecare E patette no duppïo dolore: Ma cierte che restaino co le bite Ieano aunanno li tagliere e spite.

Cierte aute mo faceano lo catasto De chille muorte ped ogne npontone: Ma ntra lloro nge stea no capo masto Che le mannava co lo carrettone,

E chille le portavano pe pasto De na montagna a no gran cannarone; Ma chill'aute se ietteno a mutare E fa' resegna pe s'arrecettare.

Feceno cunto: decedotto muorte, Sette ferute e cinco 'mbrognolate, Ma duie Arfiere co li piede stuorte Restaino, e le bannere sdellenzate.

E da la banna da Cerriglio, fuorte, Tutte, e baliente s'erano mostrate: Ma non pe chesto lo Sio Sarchiapone Non l'acconciaie buono lo ieppone.

Ma vedenno lo Re ca lo nemmico Era no tuosto e no proffedïuso, E ca non se curaie ca commo a fico L'avea fatto tornare lo caruso,

Se tornaie a chiammare chillo ammico Che fece a Sarchia restare confuso, E disse che facesse 'nnante sera N'auta fattura de n'auta manera.

Ma Gianzarvo, che era conzigliere E maie non se parteva da Cerriglio, Pe n'essere tenuto da sommiere A lo Re suio dette no conziglio,

E disse: «Io pe me songo de parere, E be lo dico comme a frate o figlio, Ch'a Sarchia le mannassemo a parlare Pe chisso che lo 'mbruoglio ha da trattare.

«Io dico pe Schirosso, che sa tanto Parlare buono ed èie muto 'spierto: Non sulo ch'èie buono Nigromanto, Ma nzò che dice rieste canna apierto;

E si no' nge iovaie l'arrusto o canto Co isso, non perrò me pare cierto Ca nge 'nnevenarrimmo chesta botta Co mannarele a di' na paparotta.

«Mannammolo a 'nfosca' de sta manera, Con dire ca volimmo fare pace. Fuorze vedenno quacche bona cera Se lassasse, pe fa' quanto nge piace:

De chesto no' aspettammo a ffi' a sta sera, Mannammoncillo mo, si non te spiace». Lo Re respose: «Sto penziere è buono; Auto che fecatielle e canto e suono».

Sùbbeto commannaie che fosse iuto; Ed isso priesto ad obedire iette E disse: «Io deventa' comme a paputo Lo voglio fa', co cierte parolette».

«Va', lo Re disse, e singhe muto astuto Se vuoie che gente a te faccia sog<g>ette». Isso volanno priesto s'abbiaie E 'nnante a Sarchia sùbbeto arrivaie.

Ionze a la porta de lo paviglione, Addove Sarchia stea co muta gente, E disse: «O schiavo, Signo Sarchiapone, Lo Re s'arrecommanna grannemente,

E dice ca pe granne campïone Te tene, e pe no gran<n>'ommo saccente, Pocca te sì mostrato valoruso, Che isso n'è rommaso assaie confuso.

«Me manna ccà, che bosta Segnoria Saccia quanto è lo bene che ve vòle: Ca l'è benuta mo na fantasia De ve di' de 'mportanzia doie parole.

Isso si stesse buono ccà sarria Venuto, ma le doleno le mole, Et have no catarro co na tossa, L'uosso a lo pede e no dolore a l'ossa.

«Facitela da chillo che buie site E no' ve demostrate cotecone: Ca si a Cerriglio pe n'ora venite Avarrite na granne 'sfazïone

E pe no piezzo no' ve partarrite; Perché la doce commerzazïone De lo Signo Cerriglio è tanto cara Cchiù che n'è lo pignato a la cocchiara».

«Io venarria muto allegramente, Respose Sarchia a chillo 'mmasciatore, Quanno potesse portare ste gente Che 'n guerra m'hanno fatto tanto 'nore.

E l'avarria a caro grannemente De esserelle ammico e servetore: Ma isso, 'n quanto veo, muto le piace La guerra, ed è nemmico de la pace.

«Io quanno le mannaie chella 'nmasciata Ca volea co lo buono llà benire, Me mannaie isso a fa' na sbravïata E non me voze le porte raprire:

Che fuie forzato de stare a la strata Na notte, e bello llà fore dormire. Ma si me facea 'ntrare chella notte Non sarriano soccesse cheste botte».

«Chello che pe ffi' a mone è 'ntrabenuto Maie cchiù creo ca sarrà da oie nnenante: Perché lo Re v'ha buono canosciuto, Meglio che non ve canosceva 'nnante.

Crediteme, ca tutto s'è stoputo: Venitenge, ma non co tutte quante Chisse sordate, ma co uno o duie, Chille che li cchiù care songo a buie.

«Perché la mutetudene de gente Fa gran confusïone addove vanno, E quacarcuno, pe se fa' valente, Farria quacche pazzia tanno pe tanno:

Zöè se mostrarrïa 'mpertenente E darria a quacched auto lo malanno; Ma pe leva sto scannalo me pare Che sto aserzeto ccà s'avesse a stare».

«Io non so' pe beni' manco no passo Senza ste gente che stanno co mico, E non me curo niente de sto spasso E de sta afferta de sto Re nemmico;

Io sulo vastarria a fa' fracasso De lo Cerriglio, e ghiusto comme a fico Me gliottarrïa, quanno ïo volesse, Chiste sordate, o puro comme allesse».

Schirosso stette zitto, e po' respose Pe da' viento a la vela, azzò parlasse, E disse: «Io saccio buono ca le cose Che buie penzate fanno gran fracasse;

Ma sempe è buono a da' cchiù priesto rose Che spine, e pace 'n parte de sconquasse; Massema a chi pò dare tutte doie, Cossì s'acquista lo nomme d'aroie».

«Lassammo ire tanta chiacchiarelle. Dimme, sì stato tu lo Nigromanto Che 'ncantaïe l'arrusto e le panelle, E li strommiente co lo doce canto?»

«Si me prommiette de no' me da' pelle, Schirosso disse, io te confesso quanto S'è fatto, chi è stato, ed ogne cosa, Puro ch'io stia securo de la 'ntosa».

«Anze, te voglio da' no buono fatto, Si me dice ogne cosa, e non mazzate». Tanno respose e disse: «Io l'aggio fatto, E pe me chille se so' trasformate;

Pe te le fece, e no' me venne fatto E pe parte de te l'aute 'ncappate Nge fuino; e tanno po' lo Re me desse Che quacched auta cosa io te facesse».

Tanno respose Sarchia: «Tu me pare Che singhe no gran<n>'ommo vertuluso», E se sosìje e corzelo a 'bbracciare; Po' le mettìje na mano a lo caruso

E le decette: «Io mo te voglio fare Lo meglio de sto aserzeto anemuso Si tu me faie tornare comme a primmo Chiste compagne, e tutt'uno sarrimmo».

Isso respose: «Io no' lo pozzo fare Perché non aggio chello che nge vòle: Lo Re sulo le tene, e tanto care, Che no' le ffa vede' manco a lo sole».

«E comme a dire non se ponno asciare? O songo erve, o so' prete, o so' parole: Perché a lo munno sulo ste tre cose Le gran vertute teneno annascose».

«E lo vero, diss'isso, ma de chello Non se ne trova niente a sti paise: Perché non èie grieco o moscatiello, Che n'haie na meza pe cinco tornise».

«Tu me farraie vota' lo cellevriello, Respose Sarchia, et isso tanno rise; Cierto chesto sarrà qualeche bino De lo meglio che pare, e lo cchiù fino».

«E bino, ma che bino! E bino tale... Che lagrema de Somma e de Garitte? Cheste brache salate! Tanto vale Quanto vanno li Ri cchiù de li guitte.

Lo grieco e la cerella manco sale Non vanno, ca non songo vini schitte: Ma chella llà se chiamma marvasia, Che lo male fa ghì pe n'auta via.

«Lo Re de chesto n'ha sulo na votte E la tene cchiù cara de la vita, Che non ne donarria manco doie gliotte Si le disse na perna margarita:

Perché a lo tiempo che fuino le botte Ntra Giove e li Giagante, se fu unita La mamma, ch'era Cerere, co Bacco, Pe non avere quacche gruosso smacco.

«E tanno ll'uno a ll'auto se donaro Cierte presiente de le terre lloro: E Bacco, che maie fu quacc'ommo avaro, Le donaie chella comme a gran tresoro:

Et essa dette a isso fi' a no paro De spiche, che pareano iusto d'oro, Che quanno una co ll'auta steva unita Facea l'ommo torna' da morte 'n vita.

«E disseno perzì quanno figliava Cerere, a chillo figlio che faceva, A chi de lloro cchiùne assemegliava Lo nomme assemegliante le metteva.

No figlio fece ch'ognuno spantava, Et era ianco e russo, e maie chiagneva, E tutto era la mamma speccecato, Che Cerriglio da Cerere è chiammato».

Sarchia disse a Schirosso: «Vuoince stare Co mico, ca starrimmo allegramente? Ca tu m'aiutarraie a conquestare Chesta citate e ste nemmiche gente:

E te 'npromecco de farete stare Sempe maie ricco e sempe maie contente». Isso allummaie lo suono 'nteressato E se fu tradetore scommegliato.

Sarchia, che procedeva da Signore, Alliegro steva e grannemente amava Lo trademiento e no' lo tradetore, E d'isso niente propio se fidava.

Le facea bona cera a tutte ll'ore, Ma de li pare suoie se ne guardava, E ne stea pauruso tutto quanto, Ch'avea paura de quacch'auto 'ncanto.