CANTO QUARTO

Vene d'Abruzzo n'ommo pe la posta Ch'a So' Ezzellenzia dice quanto fanno Li forasciute, e commo hanno composta Cchiù de na terra con vergogna e danno,

E ca non cape sotto na sopposta A nullo, tanto sbagottute l'hanno. E Cianna, che de Meneca have 'ntese Le parole, chiammare fa Chiaiese.

Ma quanno l'Arba avea strutto lo bruoco De la notte, già stracqua e ascievoluta, E iusto commo chi scioscia lo fuoco Tenea la facce lustra ed arrostuta,

Le Stelle le cedevano lo luoco Ca la bellezza lloro avea venciuta, E le faceano la baia e li sische E grille, quaglie, e ventolille frische.

A Soa Azzellenzia venne no corriero Da n'Abruzzo, e na littera ha portata, Da dove lo screvea no Cavaliero Ca na terra l'è stata sacchïata,

E ca commo se fosse no sommiero L'aveano na capezza arravogliata Li forasciute, e no' l'aveano acciso Perché mille docate l'ha prommiso.

E perzòne umelmente sopprecava C'avesse priesto mannato sordate, Ca se quarche soccurzo cchiù tardava Erano llà tutte quante taccariate,

Pocc<h>'isso lo taglione non mannava E chille a tutte aveano ammenacciate Ca se troppo iea a luongo chisto iuoco Tutte quante metteano a sango e fuoco.

E contaie sto corriero la roina, La strazia granne e la crodeletate Che iea facenno sta gente assassina, Terrore de le gente e de le strate;

Vennero, disse, a l'arba na mattina E nce scetaro co le scoppettate, Gridanno tutte commo gente pazza: «Sango, sango, compagne, ammazza, ammazza!»

Che pietate a sentire lo strillare, Lo trivolo, lo chianto e li selluzze, Lo vattere de mano e lo scioccare De faccie e pietto e di capille muzze;

Chisto c'avea perduto li denare, Chillo le cauze a brache e l'albernuzzo, Chesta c'avea perduto lo marito, E chillo ca pe forza va a Cornito.

Chi chiammava la mamma, chi lo figlio, Chi la zia, chi lo frate e chi la sore, Chi de corzera va cchiù de no miglio Dove penza scappare, e 'ncappa e more.

Uno se 'nfrocchia commo no coniglio A na cantina, e 'scire non ha core, N'autro esce a fare facce de valente, Ma resta chi feruto e chi pezzente.

'Nfine se ne tornaro a la campagna Dapo' fatto sto bello schiacco matto, E commo foro 'ncoppa la montagna Co lo Barone fecero lo patto:

Zoè, che priesto de stoppie de Spagna Le manne mille scute de rescatto, Si no vorranno 'nninamente ch'isso Vea a casa cauda si se veve spisso.

Lo Barone prommese, pe scappare, Moscolïatamente, e priesto priesto Li mille piezze e cchiù de le mannare, Si proprio avesse da cercarle 'mpriesto;

Ma mo perché lo vedeno tardare Aggio paura ca nce va lo riesto, Ca da li cippi l'arma mo se sferra, Accideno isso e tornano a la terra.

Perch'a n'autro che priesto no' spedette De trovare 'n contanta li tornise, Sta brutta razza a la sua mandra iette E le bacche e le pecore l'accise

Po' co la capo a brògnola facette Tornare li pasture a li paise, E chillo ch'a foire fo cchiù adaso Nce lassao pe memoria aurecchie e naso.

Ma chi pò dire li streverie granne Che fanno ed hanno fatto sti latrune? Pe tutto dove le soe ascelle spanne La famma già n'ha chine li cantune.

Tremmano tutte quante commo a canne Dintro le proprie case le perzune, E tale privo 'n tutto de confuorto Se vede vivo che se chiagne muorto.

Ogne iuorno se vede cosa nova, Ogne ora cchiù atterresce chi la sente, Ogne punto s'ascota quarche prova De la primma assai cchiù cauda e fetente:

L'aglio e la corallina cchiù non iova, Ca li vierme so' fatte assai potente, E vene vota c'ommo a quarche luoco More de cacavessa e non de fuoco.

Sentire comme fecero Locrise De chillo gran tiranno a la fegliola, Che n'eserzeto gruosso se nci mise E mille aucielle stèro a na gaiola:

Cossì na poverella a sti paise Pe macenare assaie roppe la mola. Chesto è la causa donne a cincociento Le veneno le iute pe spaviento.

Sentire ch'a na cerza sia legato N'ommo, e sia fatto iusto commo a crivo; Sentire po' che sia 'nsieme atterrato Co no muorto attaccato n'ommo vivo;

Sentire no palazzo è bolïato Ca l'ha fatto la porta no corrivo: Cheste so' cose che pe gran paura Fanno cacare l'arma senza cura.

Sentire (oimé, ca me vene 'nsavuorio! ) Che dui meschine, senza fare niente, No' sfida Apollo e lassa uno lo cuorio, L'autro no' ha spata e perde li penniente.

Viato chi pe freve o pe ciammuorio Schiatta 'nnanze che ionga a sti tormiente, Ca no' vede sti strazie, sto strevierio Che fa ghire la gente a besentierio!

Mo siente ca na vecchia è viva posta Dinto no forno commo a tortaniello, Mo siente ca no cuorno pe sepposta Se chiava de no miedeco a l'aniello,

Mo siente no figliuolo che s'arrosta 'Mponta no spito commo a no perciello E che n'autro se parte (o gente alarva) Commo zeppola 'n miezo a sarva e sarva.

Oh che gente, o che gente nmaledetta, Che la semmenta ne pozza scriare! Fa' iustizia, Signore, e fa' mennetta, Che puozze consolato sempre stare:

Ogne Provinzia la iornata aspetta Ch'a sangue e fuoco le facce mannare. Manna gente, Signore, manna, manna, Falle 'mpennere tutte pe la canna.

Foro a lo Veceré tante stoccate Le parole che chisto le decette, Ca commo buon Segnore appe pietate Ed a l'uocchie lo chianto le venette;

Po' disse: «Caglia, ca mui castecate Priesto saranno», e scrivere facette A lo Mastro de Campo no veglietto Ch'ogne sordato se metta l'elmetto,

Y che lo stisso iuorno ognuno sia Lesto commo a Sorgente pe marciare, Facenno allegramente chella via Dove ste gente pensano d'asciare,

E che nesciuno, né pe malitia Né pe null'autra chella aggia a restare, Ma vaga commo chi vace a la zita, Se no' vò gire a na galera 'nmita.

Ntratanto le guagnastre allecordate De quanto disse la vecchia cortese, Mannaro ciento pe tutte le strate, Fuerze s'asciasse lo Dotto' Chiaiese;

Ma s'avessero chille passïate Quanta ne songo a Napole no mese No' l'averriano pe pensiero asciato, Ca s'era a stodïare reterato.

Perché no cierto astrolago todisco L'avea addomannato a lo Cerriglio Quale anemale veve co lo sisco, L'aseno sardegnolo o lo coniglio,

Ed a chi piace cchiù vevere frisco, A chi ha sete, o <a> chi curzo ha no miglio: Ca s'isso lo sapesse 'nnevenare No truocchio co na meza vò pagare.

E perzò lo Dottore stea strodenno, Felosofanno, mo, lo celevriello, Pe bedere se pòte a la 'ncorrenno Vencere lo Todisco a sto doiello,

Ca se no n'averia, chesto perdenno, Co no gran scuorno n'àccipe cappiello; Perzò cerca e recerca mille parte, Libre apre, sputa deta e vota carte.

Ntra l'autre libre che tenea pe mano Le venne a caso Damma de Rovenza, Buovo d'Antona e Donno Forestano, Dove d'asciare quarche cosa penza;

E mentre legge, e arrobba sano sano Ccà no concetto e llà na gran sentenza, Mentre ammassa e remena chesta pasta, Non saccio chi lo sconceca e lo guasta.

Perzò lassa lo studio e prestamente S'affaccia a no pertuso che 'scea fore, E vede ca strillanno no pezzente Faceva sto greciglio e sto remmore.

Perzò 'n collera dice: «Tiene mente, Chi sconceca lo studio a no Dottore! Agge pacienzia, agge pacienzia, frate, Ca m'hai ciento conciette stroppïate».

Ntra chesto uno de chille che iea 'n vota Cercanno lo Dottore abbascio e suso, Ed have puosto Napole a revota Cercanno pe ogne tùfolo e pertuso,

Quanno la voce soa da coppa ascota Sùbeto se fa 'nnanze a la 'ncaruso, Decennole: «O Segnore letterato, Pe mille vote singhe ben trovato!

«Cercato t'aggio de lo Conte a l'Uorto, A la Rova Francesca, a lo Mercato, Sopra Muro, a Pistase, ad Echia, a Puorto, Ed a le Ceuze puro songo stato.

Fa' cunto ch'allancato songo e muorto; Mo pe desgrazia ccà t'aggio trovato. Ora chi 'nnevenava pe no mese A lo Cerriglio lo Segno' Chiaiese!

«Laudato sia lo Cielo ca t'asciaie! Abbïamonce suso a la Chiazzetta, Ca non porrisse tu credere maie Che gioventù de femmene t'aspetta.

Da te vonno consiglio a mille guaie: Corrimmo, priesto, iammonce a staffetta, Ch'ogne conzurta o chella che te scappa Te rennerà cchiù che non va' sta cappa».

Lo Dottore che sente ca nc'è esca Se mette le caionze de la festa, E la cappa de 'stata, leggia e fresca, E fatta a crespe la barretta 'n testa;

No guanto 'n mano, che se 'nzecca e mesca E sa d'ambra porcina che te 'mpesta; Na cauza dove tanta robbe ha puosto Che non saie s'è despenza o s'è repuosto.

Zò che l'è dato mette dinto a chella, E carne e pizze e pane e caso e pesce, E perché la saccocciola è de pella Nce mette perzì bruodo, e manco n'esce;

Cossì co st'arte a Napole novella Manca lo 'nore e la panella cresce, Ca trova sto Dottore, 'n crosïone, Meglio essere gonnella che Iasone.

Ma lassammolo ire, e nui ntratanto Nce volimmo no poco stennecchiare, Fi' che de chelle femmene a lo chianto Va lo Chiaiese pe consiglio dare.

Ogne cosa auderite a l'autro canto. Pigliammo sciato mo pe non crepare. Musa, 'mpasta concette e po' le 'nforna, E se sì stracqua assai va' piscia e torna.