CANTO PRIMMO

Cecca fa na 'nfroata a lo patrone De Renza, ca no' l'have maretata, Tanto ch'isso le dace 'sfazïone, E lo zito e la zita s'è corcata;

Ma primma fa banchetto, e 'n crosïone Da le sogre la zita è conzigliata Zò c'ha da fare, e 'n chesto tutto fuoco Zoccola venne e scónceca lo iuoco.

Io canto commo belle e vertolose So' le vaiasse de chesta cetate, E quanto iocarelle e vroccolose, Massema quanno stanno 'nnammorate;

Dirraggio po' l'autre isce belle cose Che fanno quanno songo nmaretate: Ma non faccio li vierze 'n toscanese Azzò me 'ntenga onnuno a sto paese.

Aggie pacienzia pe no poco, o Musa, S'io te dongo la corda, ca besogna, Sore mia bella, fare commo s'usa, Pe non essere ditto: «Oh che bregogna!

Oie è peo stare co la vocca chiusa Ca la zella, la gliannola e la rogna: Perzò nesciuno a Napole nce resta Che no' scache la carta co la 'ngresta.

Perzò mo me ne vengo adaso adaso: Stìpame de ienestre na corona, Ca voglio tutto quanto nfi' a lo naso 'Nchìreme de chell'acqua d'Alecona.

Viata te se dintro de Parnaso Me faie trasire co la cera bona, Ca te 'mprommetto fare pe saluto No pìdeto, no sàuto e no stornuto.

Aveva Renza n'anno e miezo mese Fatte le iacovelle a Menechiello, Ma lo patrone, ch'era calavrese, Maie nce la voze dare a lo zitiello.

Cecca che l'era mamma e chesto 'ntese Le disse: «Se non cagnie cellevriello Faraggio che ccà dinto cchiù non trasa, Ma la faccio chiavare a n'autra casa.

«Ca tu te la chiavaste sola sola De dece anne a sta casa, la maressa, Che pareva na lècora 'n gaiola, E mo de le vaiasse è la vavessa:

Ca n'ha quaranta, la scura fegliola, E la gonnella ancora è chella stessa». Quanto disse allecorda quarche cosa, Musa, ca sta materia è precolosa.

Sappe dicere tanto, 'n crosïone, Che fu contento de la mmaretare, E dezele tre onze, lo patrone: Perzò sùbeto fecero chiammare

Mìneco, ch'era a Zoccola guarzone, E bello ne la fecero portare, Che ièro cchiù contiente e conzolate Che chillo che va 'n miezo a li confrate!

Deceva onnuno: «A la bona ora sia, Ve guarde 'n chioppa sempre lo Segnore!» Era co lloro Madamma Locia, Femmena vertolosa e de valore,

E disse zitto zitto: «Figlia mia, Tèccote chisto lazzo de colore Ch'è buono, arrasso sia, p'onne fattura. Chi sape, figlia, la mala ventura?»

Arrevate a la casa s'assettaro A la tavola, ch'era apparecchiata; Cuotto onne ncosa e sùbbeto manciaro, E pe le fare 'nore fu cantata

Da no vecino lloro, potecaro, Chesta canzona, ch'aveva accacciata Uno certo poeta de la Marca Non saccio se lo Dante o lo Petrarca:

«Bella cocchia gentile, quinci e linci, Pozzate goder anco unquanco lei, Pocca tu de bellizze passe e vinci De lo Mercato tutti i semidei,

E tutto questo munno anco costrinci Ad auzarete chìllete e trofei: Tal che da Bacco a Tile p'accellenza Se canta: Viva Menechiello e Renza!»

Fornuta che s'avette sta canzone, Che fece tutte quante ascevolire, Onne vaiassa prega Iacovone Che le bertute lloro voglia dire:

Ed isso pe le dare 'sfazïone Cossì decette: «Stateme a sentire Ca de vuie mo dirraggio, o vaiasselle, Quanto site comprite e quanto belle,

«Songo le vaiasselle iusto iusto Cenère e ianche commo na rapesta, Colloritelle propio commo arrusto E saporite cchiù ca n'è l'agresta:

O sia de lo iennaro o sia d'agusto, O iuorno de lavore o de la festa, Le vide cchiù attellate e cchiù lucente Ca no' lo S<ant'>A<ntuono> le iommente.

«Tutte so' sciure e tutte penneriglie E cannacche e scioccaglie e zagarelle; Se radeno lo fronte co le striglie Pe parere cchiù lustre, ianche e belle;

Se vanno 'ntonacanno po' le ciglie De mille scotelluccie ed arvarelle Che le patrune teneno stipato, Co l'acqua de cocozza e solemato.

«Le scarpetelle (ora lloco te voglio!) Chi vedde maie la cchiù attellata cosa? Dimmello a me, ch'ancora me ne doglio Perché a ste spalle n'aviette na 'ntosa!

Craie o pescraie penzo c'arrecoglio E n'accatto no paro a Prezïosa De sommacco piccato, co la sòla D'unnece punte, pe mo ch'è fegliola.

«Ma io me ne so' sciso troppo priesto E n'aggio ditto de l'uocchie e lo naso, E de le belle vucche, e de lo riesto Cchiù saporito ca non è lo caso.

Chella cornuta me levaie de siesto E songo in sicco mo friddo rommaso. Aiuta, Musa, pe l'arma de zia, La nova vaiassesca fantasia.

«Ora le vertolose qualetate Chi sarrà chillo che le pozza dire? Lloro sapeno fare le frittate, Maccarune e migliaccie da stupire,

Le nobele pignate mmaretate, Zéppole ed autre cose da stordire, Agliata, e sàuze, e mille aute sapure, Cose de cannarute e de Segnure.

«Cheste fanno na pésema rïale Che te dura pe cchiù de miezo mese, Né hai paura d'ire a lo 'spetale, Ca spienne poco cchiù de no tornese;

Na vota me ne 'nchiette no stevale, Pe paura de Mastro lo Franzese. O vaiasselle meie, belle e comprite, Rosecarelle comme so' l'antrite.

«Le vaiasse so' bone p'onne cosa E sempre maie te danno 'sfazïone, So' sempre frescolelle commo a rosa, Sanno servire po' tutte perzone.

Di' ca ne truove maie nulla schifosa E che dica: - Ste cose non so' bone -. Non se pò stare propio senza lloro: Onne vaiassa vale no tresoro.

«Chi vò sapere commo sia l'ammore Una vaiassa nce lo pò 'mmezzare. Va' la festeggia, va' schitto doie ore, E vì se non te face pazzïare.

Sùbeto se ne vene e dice: - Core, La grazia toïa me fa spasemare -. Che cosa è chella, chi non zuca e licca Come fa cola de <co> la franferlicca?

«Falle quatto carizze, àmale sulo, Ca de manciare non te pò mancare: Schitto che tu le dinghe no cetrulo, De pettorina te fa satorare,

De cótene te carreca no mulo, E te dà quanto maie pòte aboscare E te ietta da sùso a la fenestra Pe fi' a lo vruodo e pe fi' a la menestra.

«Di' ca truove nesciuna vaiassella De nomme brutto, Livia o Catarina: Se chiamma onnuna Cecca e Iacovella, Meneca, Prezïosa e Carmosina,

Vasta, Renza, Grannizia ed Antonella: Nomme che ne puoie 'nchire na cantina. E di' ca me pò dire quarche chiario Ca songo nomme pueste 'n calannario.

«O vaiasse, 'lustrissime Segnore, Vuie cchiù nmerdate de l'aute perzune: Vengano adonca pe ve fare 'nore Cicco, Cenzullo, Rienzo e Vecenzone

E de fauzetto, vascio e de tenore Le laude voste co lo calascione Onnuno canta, onnuno strilla e dica: - Viato chi vaiassa ha ped amica! -.

«Cedano donca tutte Baronesse, La Marchesa e la figlia de lo Duca, E quanta songo cchiù gran Prencepesse: Nulla de lloro sarrà maie che luca

De le vostre bellizze vaiassesse. Vèstale Mastro Granne o Mastro Luca Facciano tutto chello zò che fanno, Ca maie, vaiasse, commo a vuie saranno.

«Che serve lo zibetto e li sapune Moscate, che ne songo tutte chiene, Se chillo fieto ammorba le perzune E face spisso addeboli' le prene?

Ma da <de> vostre tetélleca e tallune Vale cchiù chillo adore che ne vene Che quanto musco ed acque sperfummate Portano le Segnore tetolate!»

Quanno chesto cantare fu scomputo, Ch'onnuno fece stare a vocca aperta Commo iocasse a l'uovo cannaruto, De brocca se susìjo Madamma Berta

E disse: «Iatevenne, ch'è venuto Lo tiempo che lo zito faccia certa La mogliere ch'è ommo: e craie venite, Ch'a la cammisa lo 'nore asciarrite».

Se ne ièro le gente, e se corcaro Li zite: se contiente penzatello, Ch'avea sett'anne che se desïaro. Mineco disse: «Orsù, bene mio bello,

Mo me ne vengo, ma pigliame a caro, Ca volimmo iocare tanto bello». «Vienela, viene», disse la mogliera, Comme se fosse iuoco a covalera.

Musa, cantalo tu quanto se disse, Quanto se fece a l'una e l'auta parte: Cose da fare ascevolire Ulisse E da fare sorreiere no Marte!

Venga conca d'ammore e guerra scrisse Ca no' ne porria dicere na parte. Vasta: ca se sosèro sbessecchiate Commo se funge avessero manciate.

Mostraro la cammisa allegramente Quanno venette po' lo parentato, Che pareva na vesta de vattente, Tanto che ne rommase conzolato

Vedenno tanto 'nore a lo parente, Che nullo se l'avette mai penzato. E se ne ièro alliegre, ma restaro Le sogre, che cossì le conzigliaro:

«Mo che me l'allecordo, e non me 'ncresce, Te dico, figlia mia, tu no' scopare La casa toa quanno marìteto esce, E non volere 'n tierzo manco fare

Lo lietto, né pigliare maie lo pesce Pe la capo, e se te vuoie sfommecare Ietta lo fuoco fora la fenesta, Ca nullo male agurio po' nce resta.

«Se viene a 'scire prena ed hai golìo De quarche cosa, tiene mente a l'ogna, O te tocca la nateca. Sai ch'io Fice a fràteto 'n fronte na scalogna,

Che se ne desperaie lo figlio mio E foiette pe còlera a Bologna. A lo lèparo falle na vasata, Se no lo ninno ha la vocca spaccata.

«E caccialo tre vote quanno è nato A la fenesta, ca sarrà quïeto La sera; e tu lo chiamma: - Sbregognato -, No' lo chiamma' pe nomme, te lo beto,

Ca da ianare non sarrà guastato. A la cònola 'mpizza de segreto Le fuerfece, e po' miette a la fenesta Vallarïana, e statte sempre 'n festa.

«A crïature no' lo fa' vasare, Ca po' non parla, ed a lo pegnatiello Fa' che veva, ca priesto sa parlare; E se fosse no poco vavosiello

Da quarche schiavo tu lo fa' vasare, E faccia mpumma a quarche campaniello: Chello che l'è 'mprommiso falle avere, Se no sempre lo vide po' cadere».

Voleva dire cchiù, ma se sosìjo Chell'auta e disse: «E tu che non saie l'uso De li 'nzorate, siente che dico io. Se filanno moglièreta lo fuso

Le cade, e tu lo piglia, figlio mio, Mózzecale la coda, ca sì 'scruso Da chello che da tutto <tutte> èie temuto: Zoè ca mai non te farà cornuto».

«Ora bona pozz'essere, respose Renza. Madamma sogra, che decite? No' besogna co mico chesse cose: Ca sapite chi songo, e vederrite

Tutte l'opere meie fare 'norose, E sempre maie de me ve laudarite». «Lo creo, disse essa, ma buono è penzare Chello che pò de facele accascare».

«Sta' zitto, mamma, respose lo zito, Ca se quarcuno adocchia mente schitto Le cacciarraggio n'uocchio co sto dito». «No, bene mio, chesto non sia pe ditto»,

Tanno respose Renza a lo marito. E la mamma: «No n, singhe beneditto! Se sì geluso e faie no sbarïone Tu vaie de zeppa e pésole 'mpresone».

In chesto venne Zoccola a gridare Ca la taverna steva senza cuoco, E nc'era gente che volea magnare, Se no ca se ne ieva a n'auto luoco.

Perzò scompìjo lo zito de parlare E scese vrociolanno a fa' lo fuoco, Da dove po' tornai tutto sodunto, Ma craie scompo lo riesto de lo cunto.