CANTO PRIMMO

Scrive lo Re che facciano gran gente Pe ghire contra ad ogne malandrino: Micco 'ncoraggia ognuno ch'è valente A Puorto, a lo Mercato e a lo Pennino

Che cod isso se scriva allegramente, Ch'a Napole non s'ascia no carrino; E dapo' assauta cierte compagnune, E le cadeno 'n terra li cauzune.

Io canto chelle brave cortellate, Le fente, li revierze e li scenniente, Li fuorte stramazzune e le 'mbroccate De lo sciore de l'uommene valiente,

E chille ammure tanto nnomenate Da quanta foro e so' ricche e pezziente De chillo ch'è smargiasso perzì muorto, Micco Passaro, nato 'n miezo Puorto.

Musa, tu che deciste a no cecato Quanta botte se dezero pe Alèna Ogne Grieco e Troiano sfortunato, De quale sempre sta la Famma prena,

Tu sai ca maie non te so' stato sgrato: Damme mo, sore mia, tanto de vena Ch'io pozza auzare a tante cose belle 'Nzieme co chisto Passaro l'ascelle.

Lo Re nuostro, de famma sempiterna, Ch'è Re a due Munne e sta de casa a Spagna, Chillo che nce defenza, nce coverna, E la robba e la vita nce sparagna,

Chillo ch'èie la strata e la lanterna Che nce porta a ben fare e nce accompagna, Chillo che nc'è cchiù patre che patrone, Le sescava a l'aurecchie no vespone:

Ca lettere da Romma avea leiute, Che le screvea da llà lo 'Mmasciatore, Ch'erano pe lo Regno forasciute Che mettevano a tutte gran terrore.

E pe chesso avea già scritte e spedute A so' 'Zelenzia, ch'era gran Segnore, Pe fi' a tridece littere e staffette, Dove a la spagnolesca le decette:

«'Lustro mi primmo, ià tiengo 'ntennito Ca muccio bandoliero y latrone S'asciano co no mui granne appetito, Da sere en isso Regno sbarione;

E tammiene perzì s'hanno attrevito De tommare a su tierra no Barone, Ed otras chellas muccios saltiato, Por lo quale sto 'n collera e 'ntosciato.

«Por tanto chiero hagais mo luego luego No poco de mui linna 'nfantaria, Che appeccare vaian proprio fuoco A todas quanta la latronaria,

E se teneis fuorze dinieros puoco Io massa atroppo a mi tresoraria. Vaiano adonca todo allegramente, Che no' nce cheda sporchia de sta gente».

Quanno lo Veceréne appe leiuto Chesta lettera tanto cremmenale, Se be' ch'era Segnore assai saputo Fece chiammare lo Collaterale:

E quanno àppero 'nzembra resoluto Chi sia lo Colloniello Generale, De Capetanie fecero na lista, Che foro tutte pratteche e de vista.

E sùbito sentiste d'ogne strata La tappa-tappa de li tammorrine; Ogne guarzone pe porta' la spata A scrivere se iea pe dui carrine.

Chi stea 'n desditta co la 'nnammorata: «Priesto, decea, lassammo ste guaguine! A la guerra, a la guerra, allegramente, Dove l'ommo se fa ricco e balente!»

Ogne guattaro lassa la cucina, Ogni vastaso lo sacco o segetta, E bestuto che s'è de ferrannina, E puostose na penna a la barretta,

Chi se 'ntona ca vò la sorgentina, Chi ca vòle na 'nzegna o la ginetta; Ma fatto c'ha na corza de sommiero Co gran favore è fatto moschettiero.

Micco Passaro, mo, c'avea no core Quanto a chillo d'Orlanno, e fuorze cchiù, E perché procedeva da Segnore, E lo scetava taratappa-bù,

Disse no iuorno: «O gente de valore De le Ceoze e Duchesca, priesto, su! Iammo a la guerra, iammo, o gente ardita, Ca vale cchiù l'onore de la vita!

«Iammo a la guerra, iammo tutte, frate, A servire lo Re che nc'è patrone, Ca fare ntra nuie autre a cortellate, Pe ve la dire, è cosa da potrone:

A lanzate, a piccate, a scoppettate S'ha da stare, co n'armo de lione, E llà menare a vuonne cchiù le mano Mostranno a tutte ch'è Napoletano».

'Ntennenno chesto ognuno ad auta voce Disse: «Iammo, su, priesto, ca so' lesto! Ca se be' Ammore me spertosa e coce Non guasto converzione maie pe chesto;

Ogne fastidio co l'amico è doce. Ma che fastidio? Fastidio è se resto!» Ed accossì decenno s'abbïaro De buono passo per lo Lavenaro.

Ma la Famma lenguta e forcelluta Che li cìcere manco pò tenere, Pe tutte le guagnastre era già iuta E fattole ogne ncosa già sapere:

Null'è che non remanga sbagottuta, Non è chi possa lo chianto tenere, Decenno: «Oimé, ca resto 'n chiana terra Se lo bell'ommo mio vace a la guerra».

Ma chi cchiù ne facette lo sciabacco Fo l'ammica de Mase lo Sgargiato, Che notte e iuorno portava lo giacco, Ed era de li buone a lo Mercato;

E s'averia perzì puosto lo sacco, E s'averria lo tuppo carosato: Ma perché na vecina nce corrette Fare tanto streverio non potette.

E chiagnenno deceva: «E te nne vaie, E puoie lassare <a> Napole ed a mene? Malannaggia la funa che legaie Chest'arma a fare zò che piace a tene!

Malannaggia lo bisco che 'ncappaie Commo auciello sto core a tanta pene! E pocca mo me faie sto bello tratto Te sia nmarditto quanto t'aggio fatto.

«Ecco pe te lassato Cesarone, Ecco lassato Titta e Sapatiello, E Ciullo e Tonno e Luccio e Menecone, E Cecio e Rienzo e Liso e Masaniello.

Ecco ca t'aggio fatto no Barone Co la fleba e co l'oro a lo cappiello: E mo fuie e me lasse affritta e sola Commo auciello che fuie da la gaiola.

«Ecco vennuto fi' a la caudarella Pe te fa' 'scire da la presonia, Ecco restata senza la gonnella Pe te sanare chella malatia.

Giovene songo ancora, e songo bella! Vale quarcosa la perzona mia! Che dico? Se me lassa sto scortese La vita mia non vale no tornese».

Mentre chesta accossì sfrenesïava Ed averia voluto llà morire, A la cammara soa na vecchia 'ntrava, Che d'argentata la solea servire,

E saputo perché trevolïava: «Sta' zitto, disse, vattene a dormire, Ca te lo faccio, mo, priesto e beloce Venire commo lècora a la noce».

E se facette da' no pegnatiello Co na vranca de fave e na caiazza, E de maneca negra no cortiello, E de sanbuco n'argata e na mazza;

Fece de cera po' no popatiello, E mesese a parlare come pazza Chelle solete lloro asenetate Credute da li scure 'nnammorate.

Ma non pe chesto Mase maie venette: E perzò consertaro de chiammare Una mano d'ammiche cchiù perfette E tutte 'nzembra, po', se consigliare:

Cossì la vecchia a la 'ncorrenno iette A l'ammiche, a le sore, a le commare, Che steano puro co li stisse guaie, E da parte de Cianna le chiammaie.

Micco e compagne ieano passïanno, Ntratanto, pe bedere dove sia Meglio de s'assentare ma non sanno Scegliere per fi' mo la meglio via;

E pe le 'nzegne vannose 'nzeccanno, Vedenno chi le fa cchiù cortesia. E iettero e benettero e tornaro, Fi' tanto ch'a Forcella s'assentaro.

Lo Micco se facette no vestito, O isce!, ca parea zito noviello: No paro de cosciale de Cerrito Co denocchiale co lo bellotiello,

No colletto tagliato assai polito E fascïato po' de zegreniello, Le cauzette de stamma, e no corpetto Co le maneche ad otra de dobretto;

Le scarpe c'aveano auto lo tallone E lo cappiello co la pennacchiera, La spata 'nargentata, e de montone Lo pennente, lo fodaro e giarnera;

Lo stregneturo, comme a smargiassone, Ad armacuollo, e parea iusto 'n cera Marte pognuto da sdegnose vespe Quanno d'Adone sanneiaie le crespe.

Ma 'nnante che se iessero <a> assentare Vennero cierte de la Sellaria, Ed uno disse: «Te vengo a pregare Che vienghe, o Micco, co la 'nzegna mia,

Ca da nullo averraie tante denare, Né tanto 'nore ad autra compagnia: E pe capo de squatra nce songo io, Che tu sarrai lo camarata mio».

Commo chi fa carizze a quarche cano Mozzecataro propio de natura, Che nce avanza no muzzeco a na mano E de le gamme appriesso ha gran paura;

O se dice: «Arre», e tocca no pacchiano N'aseno caucetaro a la secura, Che le dà pe resposta doie panelle E fa parla' franzesa le bodelle;

Accossì Micco, 'ntiso sto parlare, Se carca lo cappiello, e da valente: «Averaggio abbesuogno de denare, Disse, o fuorze me facciano Sargente?

Co chi te pienze mo de contrattare, Co quarche paro tuo, guitto pezzente? Voglio ire venturiero, e non pagato, Ca songo Micco, ed aggio no docato».

«Co chi l'haie? Chiano, quanta 'ntonamiente! Vide che faie, tiene le mano a buie, Rispose chillo, o Re de li valiente, Fuste maie autro che n'arranca-e-fuie?»

«A chesto, Micco disse, tu ne miente», E mese mano e disse: «Aiosa, a nuie! Chesta lo dica», e tira na stoccata C'averia na muraglia spertosata.

Ma chillo zompa e lo gran cuorpo scanza, E po' cossì deritto vota e gira Na ponta ad isso 'nmiero de la panza, Che tre canne cchiù appriesso iea de mira

(C'avea 'nmezzato de scremmire a Franza) E negrecato a chi la botta tira, Ca pò dire: «A Dio, gente, ca ve lasso». Ma vò la sciorta ca maie stenne passo.

Micco lo pede manco miso 'nnante Se mette 'mposta, e se face tantillo, E po' se stenne e fasse no giagante E zompa 'nnanze lieggio commo a grillo,

E dice: «Olà, fuìte tutte quante, Ca non l'avite co no peccerillo!», E decenno accossì valentemente Senga na ponta e tira no scennente.

Ma pe bona fortuna non cogliette, C'avea schitto na strenga a li cauzune, Che se roppe, e sbracato isso cadette Commo chi cade da li scalandrune;

E 'nnante che da terra se sosette E che s'auza e s'apponta li vracune Tonno Gottuso e Prospero Faziezo Corzero tutti a dire: «Strunzo 'n miezo!»

E spartute che l'àppero e saputo L'arigene de tale parapiglia, Tutte lo Segno' Micco hanno tenuto Commo se fa cavallo pe la vriglia;

E no Segnore nobele e saputo, Ch'era stato 'n 'Gretterra ed a Castiglia, Tanto vota e revota e tanto face Che tanno stisso fecero la pace.

E pe farela proprio da buon figlio, E commo s'usa nfra gente aggarbate, Le portaie tutte quante a lo Cerriglio A magna' fecatielle e cervellate;

Dove arrevato co no gran besbiglio Tavole e scanne foro apparecchiate, Tovaglie ianche, sale e no tagliere, Carrafe e carrafune, e tre bicchiere.

Ora chiste se iezero a sedere, E dapo' n'antepasto de zoffritto Fo cierto bella cosa da vedere Quale battaglia fecero e confritto,

Ca non tanto vedettero apparere No feletto de puorco e no crapitto, Che senza avere manco no cortiello Ne fecero ne n'attemo maciello.

E po' portaro appriesso na porcella Che priesto Micco l'uocchie nce 'mpizzaie, E disse: «Non sarria chesta Ciannella Che chella spennazzola me 'nmescaie?»

E stesa co destrezza la manella Co no valore granne la squartaie, E squartata che l'appe a no momiento Squagliaie, sparafonnaie commo a lo viento.

Chi porria dire maie la gran roina Che fece ognuno, e le tremenne botte? Dicalo lo Cerriglio e la cocina, Lo dicano carrafe, arciole e gotte;

Chisto tagliava ccà la ielatina, Chillo da llà spaccava le recotte, Chi veve e chi, vevuto, l'autro stommeca O parla o dorme o ride o chiagne o vommeca.

'N crosïone facette da chi era Ognuno, a l'uocchie de li Palladine, E commattèro sempre fi' a la sera Co la facce de rose tomaschine;

E già teneva ognuno a la panzera Cchiù robba ca non cape a doi cantine: Perzò a Mostaccio dezero l'agresta E fo corrivo chi fece la festa.

Ma 'nnante che scompessero venette Mastro Rogiero co li sonature, E na museca bella se facette, Commo se face 'nnante a li Segnure;

Lo vïolino fece le trommette E le zampogne commo li pasture, E po' disse co boce auta e stredente: «A 'nore e laude toa, Micco valente!»

Così cantaie, che fo da pazzïare, «Di cociente sospir l'airo 'ncennava» E «Core, core, ca me faie penare», E «Iacovino a Romma se ne ieva»,

«Crore mia bella» e «Ninfe de lo mare», «Ammore che chest'arma mia voleva», «Una ninfa crodele» e «Bella Fille», «Ninfe vezzose» ed «O iunne capille».

Ne disse n'autra po', pre vita mia, Pe quanto me decette no mannese, Che fo de vierze 'n prosa e 'n poesia, De lengua sciorentina e toscanese,

Che laudaie Micco co la compagnia E quanta fatte avea stopenne 'nprese, Dove facea co stilo autiero e bello Tra Micco e Scannabecco paralello.

Concruse po' ca Micco è cchiù balente, De cchiù bertute e de perzona bella, E che la famma soa commo a pezzente Corre dove se 'spenza la panella,

Ca la soa facce chi la vede ardente Pe gran terrore n'ha la cacarella; Damme, Musa, a laudarelo soccurzo, Ca chisto non è Passaro, ma struzzo.