CANTO DECEMO

Nora se scopre a Micco e Micco resta Stopefatto vedenno tale chella Sana, e la 'nguadia, ca già stace lesta, Ed allogata s'have na gonnella.

Cierte Segnure fanno a tale festa Na 'mpertecata co na iostra bella, E po' na farza, e 'nmitano Grannizia, Che sempre grida: «Iostizia, iostizia!»

Già la Fortuna s'era satorata De fare strazie a chesta poverella, Ed a chille Segnure avea contata Nora de soie desgrazie la novella.

Già Micco l'avea bona affegorata E decea fra se stisso: «E fuorze chella? O l'è parente? O veglio, od è che dorma?» Perzò la chiamma e dice 'n chesta forma:

«Giovene mio, se no' l'avite a male Deciteme, v'asciate nulla sore? Ca canoscette na Segnora tale Che me portaie no sbesciolato ammore,

E mo canosco ca fuie bestïale A no' l'essere schiavo e servetore: E buie ne site proprio la fegura A lo parlare ed a la 'ncornatura.

«Ma se me soso da sta malatia A la 'ncorza iarraggio dove stace, E se non ha cagnato fantasia Me la voglio pigliar e stare 'n pace».

Nora, che sente chello che borria, S'allegra tutta e no gran core face E disse: «Fosse Nora de Varletta, Che stea de casa 'n miezo la Chiazzetta?»

«Chessa, decette Micco. E be', t'è sore?» «Sì, disse Nora, e stace ccà becino, E bòle ch'io te faccia tanto 'nore Che remolle sso core diamantino.

E se tu le portasse quarche ammore Ccà la farria benir da craie matino: E chesto faccio, benché le sia frate, Ca de li suoi tormiente aggio pietate».

«Aimé, decette Micco, m'haie feruto, Perché a direme chesso avite tuorto, Ca songo propriamente resoluto Daremelle pe schiavo vivo e muorto».

E Nora disse: «Se t'aggio cogliuto Non voglio sperlongare lo confuorto! Damme ssa fede e sia co la buon'ora: Io so' la schiava toia, e songo Nora.»

«E se st'ammore mio merta pietate Pensalo tu da chello che bediste, E quanno le ferute so' sanate Famme contenta comme prommettiste».

Oh ch'allegrezze granne, oh ch'ahbracciate A chillo ditto fare le vediste! Po' se parlaro n'uosso mastro a dire Quanta potte essa chillete zoffrire.

E li Segnure de la massaria N'avettero perzì gran contentezza, E quanno 'scette da la malatia 'Mmitaro ciento a tale parentezza:

Ca vonno fare st'autra cortesia De spennere a sta festa ed allegrezza, Ed ogne foretana fo 'mmitata Che benesse a ballare la spallata.

Ntra l'autre lo patrone nce venette De Grannizia, ch'a chiste era parente, Ch'isso la festa 'n ordene mettette Che pe chesso era lesta assai gran gente;

Ma non tant'isso 'sfazïone avette Quanto Grannizia stea scura e dolente, E fo ssa crepantiglia occasïone De fare festa co cchiù 'sfazïone.

Ora quanno venette la iornata Che la festa già fare se deveva, Micco e la zita sotta na frascata 'Nzieme co li Segnure se sedeva.

Nora stea bella a l'uocchie de na fata, Co certe trezze ch'allogate aveva De lino tinto co la zaffarana, E na gonnella de na foretana.

Grannizia steva llà, perché boleva Lo patrone che stesse accanto a Nora, E quanno quarche femmena veneva A dicere a la zita: «A la buon'ora»,

Essa l'ora e lo punto mardeceva, E co l'uocchie le 'scea l'arma da fora, E grida ch'a lo core have sto chiuovo Commo gallina che vò fare l'uovo.

Lo patrone de riso era scosuto E chill'autre Segnure tellecava; 'N chesto no cierto suono fo sentuto Che tutta la campagna ne 'ntronava,

Perzò cchiù d'uno già s'era sosuto Pe bedere la cosa commo stava: Ognuno stace ammisso e sta sospiso Commo chi sauto aspetta de chi è 'mpiso.

Ed auzaro la vista, ma 'ncantute A bedere sto suono che cosa èie, Ecco ca ciento morre so' benute De mascare, de farze e de torneie:

Ognuno pe 'norarese ha spennute A 'ntriche e striche cinco rana e <o> seie, E portaro a bizeffa e a montune E 'mprese e mutte e 'nciegne e 'mmenzïune.

Pizo, ch'era lo capo de na morra, Portava n'alecuorno a lo brocchiero Co lo mutto: «Nesciuno me 'nzavorra Se pe sciorta have rutto lo bicchiero»;

Avea a la spagnola cappa y gorra De Seregnano, e ieva tanto autiero Ch'appena de li zite a la presenza Vasciaie la capo e fece leverenza.

Era Cecio cod isso a chesta danza Ch'avea le cauze a brache e lo ieppone De panno de Cerrito, co la panza Commo a prieno, abbottata de cottone:

La maneca accossì granne, a l'usanza, Che non saie s'è balice o s'è bracone, Co no cuorno pe 'mpresa e co no mutto: «Scorna s'è sano e sona quanno è rutto».

Cola veneva appriesso e la barretta Portava de peluzzo verdegaio, La cauza a mattacino rossa e stretta, De cammuscio e de friso era lo saio;

E co gualdrappa gialla de lanetta Ieva a cavallo a n'aseniello baio, Co no voie tunno e co na scritta 'n quatro: «Iunto a la vacca tirarà l'aratro».

Appriesso a chiste iea na folla granne De cornamuse, tromme e tammorrine, Tutte co giubbe, barrettune e banne De tela negra e stelle di lupine;

Na sarma po' de cannavo e de canne, Pe rompere le lanze a li facchine, E po' dereto a chisse (o Musa, accorza, Sciósciame da dereto e damme forza):

Chi porria dire mo lo granne spanto, S'avesse ciento lengue e vocche ciento, Che secotava, e che po' avesse tanto Sciato che stesse a tuzzo co lo viento?

No carro ch'era accossì bello quanto Trasesse a Romma maie d'oro o d'argiento A tiempo che sciogliuto quarche 'mbroglio Trasea lo 'Mparatore a Campo d'uoglio:

Era d'ellera tutto e de spatelle E de frunne de vita 'ntornïato, Che co le france 'n fronte e campanelle Da crastate de Foggia era tirato;

'Ncoppa nce ieano tre bone zitelle Che d'Ercole, de pelle e mazza armato, Co le denocchie 'n terra steano 'ntuorno, Che le donasse 'n grazia cierto cuorno.

Era lo carro fatto con tal arte C'Automedonte pò ghire a la striglia: Tutto era 'nmenzïune d'ogne parte Da fare deventare arco le ciglia.

O carro digno de te dire 'n carte Ottava de lo munno maraviglia! Apollo, agge pacienzia s'haie st'offese: Lo carro tuo non vale no tornese.

Commo sto carro a lo cospetto iogne De li zite, e lo cuorno Ercole dace, La copia 'n terra co lo cuorno pogne Che comparere mille frutte face:

Cocozze longhe, rape, puorre e spogne, Che se ne piglia chi li pare e piace, Ed a lo zito danno a na sportella Fasule frische ed uva cornecella.

Dall'autra banna venne n'autra troppa De cravaccante sopra li sommiere: Le bide trottïare a chioppa a chioppa Da fare 'nmidia ad ogne Cavaliere.

Ciommo è lo primmo, che no cuorno 'ncoppa Porta de ciervo puosto a lo cerniere, Co lo mutto: «Già Renza chiuso m'have, Io ne porto lo cuorno, essa la chiave».

Portava no cappotto de sommacco 'Nforrato de zizena cramesina, Lo cauzone tagliato da no sacco C'avea guastato proprio la matina;

Lo cuorpo lavorato comme a giacco De filo verde e lana 'ncarnatina, La montera de nmisco nigro e giallo, La pennacchiera de pavone e gallo.

Venea dapo' Renzone, e no vestito Avea d'arbascio tutto quanto sano, Che nc'erano buttune assaie de vrito E pe cchiù sfarzo senza passamano;

No scuto avea de fico assai polito, Dove decea no mutto 'n 'talïano 'Ncoppa na bella e lustra cornïola: «Legata all'oro è meglio assai che sola».

Cuosemo iea dereto, e de vaietta Avea na giubba co le france rosse, De ferrannina gialla la cauzetta Longa e chiantuta, che coprea le cosse;

La 'mpresa (se n'è curzo co staffetta Lo cellevriello mio) creo che fosse No cauzatoro co no mutto strano: «Se miezo servo, che faraggio sano?»

Appriesso po' venea na grossa frotta De serveture tutte de librera, La giubba ognuno avea de saia scotta Rossa, e de panno verde la montera;

Chillo va galoppanno e chisto trotta, Chi va de passo e chi va de carrera; A l'utemo se vede (o Musa, aiuta, Se non pontille la casa è caduta! ):

Venea no carro tutto de cartone Verde, e lucente po' d'oro pisato, Dove nc'era na nave co Iasone Co l'Argonaute a fare guerra armato,

Tutte prunte a robbare no montone, Cossì l'essere piecoro è stimato: O felice chi è piecoro ogge 'n terra, Ca pe la pelle soa se face guerra!

Ora chiste arrivate a chillo luoco Dove steano assettate Micco e Nora Accomenzaro, o bene mio, e che iuoco, Che duraie, se non mento, cchiù de n'ora,

E se lo cielo non facease vruoco Le scaramuzze durariano ancora, De cannuccie, de chierchia, e pe cchiù bello Correttero na papara e n'aniello.

Ma già ch'era smontato da cavallo Lo Sole, e iunto all'ostaria del Moro, Na mascarata accommenzaie no ballo Che Nora e Micco stopefatte foro:

Le giubbe a la moresca de Sangallo Aveano, e de brattino stelle d'oro, Campanelle a le gamme, commo s'usa, E sonanno cornette e cornamusa.

Fecero mattacine e abbattemiento La 'mpertecata e mille cose belle, E scomputo che fo l'abballamiento Danzaie n'autro delluvio de zitelle:

Ogne gualano a canna apierto attiento Steva, miranno fitto cheste e chelle, Che ballanno faceano 'n veretate Cchiù gran fracasso che cavalle armate.

Maie vista fu cchiù bella gioventute, Ne ncaco <'ncaca> Palla, Venere e Giunone, Che nude 'nnante a n'ommo songo 'sciute Pe avere no cetrullo o no lemmone:

S'avesse lo pastore Ideo vedute Ste femmene de chelle a paragone Venere era speduta, e Troia fuorze Cossì priesto non ieva per le torze.

Nc'era Ciomma fra l'autre, oh che bellezza, Oh che spanto, oh che gioia de lo munno! No parmo o poco manco avea la trezza, Stritto lo fronte, picciol'occhio e tunno,

Lo naso era appontuto commo a frezza La vocca ne 'ncacava Compà Iunno Quanno cchiù docemente a no rotiello Canta le storie 'nnanze a lo Castiello.

Portava de Gragnano na gonnella Co le strenghe de filo verde e ianche, Na cauzetta a lanterna rossa e bella, Che chi la vede è forza che s'allanche:

Aveva 'mpede po' na scarpetella Con che Ammore stroppeia spalle e scianche, Longa, auta a cuollo, e granne de tallone, Che nc'era iuto sano no montone.

Zeza puro nce fu, la cchiù chianchiosa, La cchiù bella che fosse a lo Casale: Ogne sguancia parea na fresca rosa, Ogni uocchio de na pica lo specchiale.

Tutta comprita e bella, non ha cosa Che ne pozza la 'nmidia dire male, Autro creo che tacciare essa non pozza Se non ch'è zopparella ed ha la vozza.

Ma dove lasso a te, Meneca bella, O schiecco de bellezze uneca e sola? Ballanno tu cossì cianciosa e snella Mettiste ciento core a la gaiola:

Che mo gridano sempre, o cianciosella: «Da', pe piatate, da' quattr'ova a Cola». E tu crudele a chi tra doglia 'nvecchia T'hai chiavato lo mafaro a l'aurecchia.

Chesta è ben degna che ped essa strutto Se vea chiagnenno cchiù de n'arma e core, La facce ha proprio commo no presutto Ch'è miezo ianco e russo de colore,

Lo naso 'nfuso, ed è lo labbro asciutto, E l'aurecchie callose e 'sciute 'n fore, E no' la guasta niente de modiello Se be' ha na nata a n'uocchio e lo scartiello.

Ma chi vò dire tutte le bellisce D'ogne guagnastra ch'a la festa iette, Le campanelle, zumpe, scorze e bisce Che pe fi' che sudaro se facette?

Scùmpela, Musa, Micco addebelisce, E bòle autro ca saute e travocchette: Ca non vede maie l'ora d'isso puro Fare na corza d'aseno a lo scuro.

Puro quanto cchiù pò la fegne e sfarza, Pe non dare che dire a le perzone, Fi' che scompette direse na farza, Che dette a tutte quante 'sfazïone;

Non fo de burle e de conciette scarza, E nfra l'autre nce fo no vaiassone E no smargiasso fatto con malizia Che trasformava Micco co Grannizia.

Ma se chella crepava, Micco ancora Facea bottune, pocca era assaie notte E non vedea, scurisso, maie chell'ora O che sficcaglie, o smafare la votte.

All'utemo pe mano piglia Nora E dice a tutte quante: «Bona notte», E trasenno cod essa a no recietto, L'autre ammarciaro, isso ficcaise a lietto.

Dove sùbbeto puro se corcaie La Nora soia, senz'essere pregata, E corcatase stritto l'abbracciaie, Ca non se crese maie tale iornata.

Chello che po' ntra lloro se passaie Da primmo assauto fi' a la ritirata Che serve a dire? Vasta ca lo Micco Tornaie la primma notte giallo e sicco.