Stem: Arent Pieter Gysen, met Mieuwes, Iaep en Leen.
Wat baat my den dranck daer ellick vreughd uyt suyghd?
En dit lief gheselschap dat nu dus singht en iuyghd,
Met bly en soet gelach?
Als 't oogh hier niet de liefste siet,
Die ick so gaeren sach.
2 Speelt ghy, en danst vry de lieve lange nacht,
Laet my mijn selven vermaken met mijn klacht,
Die 't hart uyt droefheyt dicht:
Ick sal myn smart vrolijck sijn,
Of ten minsten wat verlicht.
3 Ach! daer een ander gheluckich hem bevindt,
Nevens de gene die hy van herte mint,
Daer sit ick hier alleen:
Diens groot gheluck, vermeert mijn druck
Met droeve treuriche'en.
4 Niet dat ick yemant sijn voorspoet hier beny,
Maer ick beklaegh het wreet geval, dat my
Dus dompelt in 't verdriet;
Hierom ben ick niet in mijn schick,
So ghy hier merck'lijck siet.
5 Gaet hene Speelnoot, verheucht de jonge lien,
Ick sal mijn selven van binnen wat besien,
En dromen van mijn Vrouw,
Al ist bedroch, het sal my noch
Verquicken in mijn rouw.
6 Gaet hene, gaet hene, wat hebdy noch al praets,
Misschien sal u een ander afwinnen nu de plaets,
En 't Meysjen oock daer by:
Ick danck u seer van al de Eer,
Die ghy bewijst aen my.
7 Helaes Princesje! helaes waer sydy nu?
Helaes mijn leven! wat ben ick sonder u?
Een schaduw' en een schijn,
En geen ding min, als die ick bin,
Als ick by u mach zijn.