Stemme: Sondach, Sondach, &c. O Hoofdeloose sinnen! O sinneloose hooft! Wat ongemeene minne V kennis heeft gherooft, En u reden verdooft? Dat ghy u sinlijckheyden Dus sottelijck laet leyden? Dat had ick noyt ghelooft.
2 Is u wijsheyt verdreven?
Is al 't verstant verrot? Helaes! waer is ghebleven De schoone gaef van Godt? Is gantsch ver-ylt, versot, Verplet, verdruckt, verschoven? En 't slechste dat komt boven, 't Welck u ghedijt tot spot.
3 Door u, door u mijn ooren So is dit al gheschiet: Ick ben verlieft door 't hooren Van mijn waerde Margriet. O lieffelijck verdriet! O wonderlijcke krachten! Die 't hoochst' van mijn ghedachten
So haest in d'Afgrondt stiet.
3 Ick, die heb durven dencken Dat Venus Knapelijn My niet en konde krencken, Of yets vermocht op mijn: Helaes: het was maer schijn Van wijsheyt, die my streelde, En 't sotte breyn verbeelde Een schaduw-achtich sijn.
5 Van dinghen sonder wesen O losse frenesy! Een straal-godt is verresen Met al sijn hovaerdy: Ick waande (meer als hy
Die Python hadt verwonnen,) Dat duysent Cupidonnen Bestonden teghens my.
6 Want t'wijl ick onbedwonghen Veel woede woorden sprack, De wuste wyse Ionghen Sijn Eske Boochje track, En mickten also vlack, Dat binnen korter wylen Mijn lichaem gants vol pylen, En snelle schichten stack.
7 Maer dit onseker gissen Benevelt my althans, In dicke duysternissen,
In blintheydt des verstants: Dees nacht die heeft bekans Met swillich, en swart Linnen Verdonckert in mijn sinnen Het weynich van mijn glans:
8 O dol en dom vermeten! O sotheyt sonder voet! Ick waande wat te weten; Maer mijn boerachtigh bloet Heeft in der daet bevroet, Dat niemandt kan voorkomen 't Geen Godt heeft voorgenomen, Die 't al om beter doet.
9 Vaert wel, vaert wel mijn wenschen,
En ydelheden blindt: Vertrout de gunst van menschen Niet meerder als de windt: Gerbrande! u besint! En gaet den Hemel vrijen, Godt sal 't gebenedijen Ist dat ghy 't wel begint.
10 Te bidden, en te leven, En sterven lusten snoot, Wilt u voorts overgeven In Godes goetheyt groot: Die sal u voor u doot Sijn miltheyt steets bewysen: En naerderhant oock spysen Met heylich Hemels Broot.
Cookies on Poetry Cove