Stem: Pots hondert duysent slabberment. B Nu Heereman, nu Iong-gesel, Hoort toe, en houwt wat stal. H Nou laet myn gaen gy ouwe vel, Wat schortje? sinje mal? B Hoe komt dat ghy u so verhaest? Ay lieve houwt wat stee. H Wech ouwe Totebel, ghy raast: Dat jy soeckt, soeck ick mee.
B 2 Hoe valt u dit so euvel in, Dat ghy my so versmaet? H Wech quijl-bab met u kevel-kin, Wech met u malle praat. B Ay Iong-man gheeft my wat gehoor, Het is mijn eerste bee. H En prevelt my niet meer an 't oor: Dat jy soeckt, soeck ick mee.
B 3 Dit schenck ick u, o ionger Helt! Daer toe mijn lijf, en goet. H Nu Besje, laet mijn onghequelt, En soeckt een gierich bloedt. B Ick maack u Iongelingh so rijck Als 't water vande Zee.
H Ghy sijt my al te onghelijck: Dat ghy soeckt, soeck ick mee.
B 4 Ick sal u houden als een Graef, In 't gouwt, in 't silver stijf. H Daer voor souw ick dan zijn een slaaf Van een verschrompelt wijf. B Dat kleuter is te wispeltuer, Al is sy blanck as snee. H En ghy syt my te goons en suur: Dat jy soeckt, soeck ick mee.
H 5 Wech taye tandeloose Best, Wech druyp-neus, wech root-oogh, Gaet haelt ien kooltje in u test, En setse vry wat hoogh,
En raest en blaest daer leven in, En laet myn in mijn vree, Dit is een Meysjen na mijn sin: Dat jy soeckt, soeck ick mee.
B 6 Den ouwerdom is wijs van raet, Daer toe suynich en vroet, H Ghelijckheyt in den Echten staet Baert vruntschap in 't gemoet: Wat is hier lieffelijcker dingh, Of 't alderdroefste wee, Als goe, of geen vereenigingh? Dat jy soeckt, soeck ick mee.
7 Al waer de Rijckdom van u schat, Als al de werelt groot:
En eer ickse met u besat, Ick was veel liever doot: Wech Morssebel gy hebt een gongs: Gaet door ghy ouwe quee, Och Beste-moer ghy soeck wat iongs Dat jy soeckt, soeck ick mee.
Cookies on Poetry Cove