Stem: Als't begint. Sondach, Sondach lest-leden, Op een, op een St. Ians-dach Ben ick buyten getreden, Daermen veel waghens sach, Met so veul omme-slach, Het volck quam met hoopen Al by de voer-luy loopen, En maeckten daer verdrach.
2 De Kneukels en de Boeren
Die hadden 't op gestelt, Sy wilden niemant voeren Dan voor ghedrongen gelt, Dit (docht myn) was ghewelt, Ick wandelde met lusten, En gingh mijn selven rusten In 't groen geschildert velt.
3 De gladde paerden renden Langhes de harde slijck, De Voerluy diese menden Klaterden vreesselijck. De dorre droghe dijck Die was besayt met Menschen, Ick sach het al na wenschen
In myn begraselt rijck.
4 Flucx quam daer an rumoeren, En raesden sonder roy, Heele waghens met Hoeren, Die wierpen vast met hoy, Dit dunckt de lieden moy. Sy riepen, en sy kreten Al haddens niet ghegeten Dit goore gorle goy.
5 Wel eer wouw ick wel weten, Waer van, of hoe het quam? Datmen mal plach te heten Het volck van Amsterdam: Maar als ick dit vernam
Ick barsten uyt van lacchen, Het schijnt wy komen pracchen, Der droogers Speck of Ham.
6 Waer heen ghy broetsche lieden? Ay lieve, blijft in stadt: Laat hier u roockt-vleys sieden En monckelt hier doch wat, Tapt eens uyt 't beste vat, Laet die gulsighe wespen Haar geel-garstighe Hespen, En haar kranckhoofdich nat;
7 Ghewoonten, en Landts-zeden Heeft u te seer verleyt: Ey luystert na de reden,
Betoomt u sinlijckheyt: Vertoeft, een luttel beydt, Wilt my hier in gherieven, Bestelt my dese brieven, By Iaap Haas Majesteyt.
8 Drogisten uytghenomen, Wy sijn dit vollick moe, Als sy tot uwent komen, So sluyt u poorten toe, Tot ickse open doe, Of sydy so bescheyden, Stiert dit ghespuys tot Leyden, Ick neem 't u of in 't goe.
9 Sanckt Ridders wilt niet pocchen,
Om dat ghy Meesters bent Over dees slechte Iochen, Diemen u willich sent, Warenser maer ghewent By u gebooren beuken En hallif gaeren kreuken Die rouw waer al ghe-ent.
10 De velden en de stoepen Met wyven sijn beseyt: Waer heen, waer heen sy roepen Na Haerlem gildt en meyt, Met so veul vrolijckheydt: Maar als sy weder komen, Is haer de vreucht benomen
't Alleluya is gheleydt.
11 Onder so menich hongdert Was nau een deeg'lijck Man, Ick was blydt en verwongdert Dat wy'er so raeckten van, Quaemt ghy op een Sint Ian, Sanct Ridders ons versoecken, Ghy souwt in onse kloecken V wel verdwalen dan.
12 Ghy Princen en ghy Heeren, Of nieus-gierighe lien, Ghy meucht wel weder keeren, Want hier is niet te sien, Of lustet u misschien
De Waghens eens te tellen? Of die voerluy te quellen? Dat wil ick niet verbien.
Cookies on Poetry Cove