Cecca mia, dove sì ? Comme haie potuto Lassa' lo tata tuio e ghiretenne? Chi pe bolare, aimé, te di' le penne? Perché me lasse ccà comme a paputo,
Comme a strunzo peruto, E te ne affuffe e baie a l' auto munno, Schiaffannome de doglie a no spreffunno? O te ne porta a mene, o vienetenne!
Vecco ca st' arma chiamma te a ciammiello: Vienola, viene, o Cecca, a sautariello. Ma co chi parlo, aiméne, e co chi strillo, E che confuorto spero, e che farraggio,
Si be' arraglio comm' aseno lo maggio? Lo sorece è 'ncappato a lo mastrillo: Già chillo speritillo È ghiuto a mitto e ccà non torna cchiù!
O Cecca mia, te n' allicciaste tu! Ma s' auto fa' non pozzo, chiagnarraggio Cecca, la morte toia a crepa–core, Né cantarraggio maie, maie cchiù d' ammore.
Se canto cchiù d' ammore, o Cecca mia, Me venga lo catarro e lo crastone, O lo ciammuoiro come a caperrone. Se canto cchiù d' ammore, arrasso sia,
Io de cravonchia stia Chino fi' a l' uocchie, de mozzelle e grosse, E vengame la pica co la tosse. Se canto cchiù d' ammore, io sia vracone,
E pozza deventare nfra cient' anne O n' ascio, o no vozzacchio, o varvaianne. Se canto cchiù d' ammore, o Cecca bella, Me pozza veni' 'n capo spennazzola
E scennere tre diente co na mola. Se canto cchiù d' ammore, che la zella Me venga, e l' arenella, E pe cchiù doglia mia e pe desgusto
E freve e cacarella quanno è agusto. Se canto cchiù d' ammore na parola, Che mente io canto faccia lo sciabbacco E me 'nzonna ogne notte parasacco.
Si canto cchiù d' ammore, o Cecca ammata, Che sbattere me pozza l' uocchio 'ritto, Ch' è lo 'nzegnale de lo core affritto. Se canto cchiù d' ammore, na cacata
Faccia sbetoperata, No cane nigro a l' azzïune meie, E s' una non abbasta, siano seie. Se canto cchiù d' ammore, fitto fitto
Pozza sto naso mio scola' de mucco Senza ascia' moccaturo o stoiavucco. Se canto cchiù d' ammore, o Cecca cara, Ch' io pozza deventare no vavuso,
E quanno chiove io stia scauzo e 'n caruso. Se canto cchiù d' ammore, ch' a migliara, A tommola e a cantara, Pe cchiù trommiente mieie e cchiù 'mpapuocchie,
Aggia e bottelle e piccinache a l' uocchie. Se canto cchiù d' ammore, io stia rognuso Lo vierno, ed aggia rosole e sperune, E fridde sempe guaie e maccarune.
Se canto cchiù d' ammore, o bella Cecca, Che nascere me pozza n' agliarulo, O na scalogna 'n fronte, o no cetrulo. Se canto cchiù d' ammore, ch' ogne zecca
Pe cuollo me se 'nzecca, E sia cchiù tosta assaie che n' è l' ancunia, E granne e grossa quanto na cestunia. Se canto cchiù d' ammore, io sia cuculo,
Io sia cuccepannella, io sia cevettola, O che na coda m' esca comme a pettola. Se canto cchiù d' ammore, che n' aurecchia Me pozza rosecare pe despietto
No sorece o na zoccola a lo lietto. Se canto cchiù d' ammore, ch' io 'mbessecchia Comme si felichiecchia Manciato avesse, o vero totomaglia,
E 'ntorzare me pozza n' anguinaglia. Se canto cchiù d' ammore, io maie stia nietto De chianto, de dolore e de penziero, De vrògnola, de gumme e de vrachiero.
Se canto cchiù d' ammore, ch' io me sosa Co l' uocchie ogne matina 'mbessicchiate, Co l' uocchie ogne matina arcescazzate. Se canto cchiù d' ammore, fetenzosa
Me saccia, e no' addorosa, La pettorina posta co la 'nnoglia A no pignato ch' è de carne e foglia. Se canto cchiù d' ammore, maie spicate
Pe me trova' se pozzano li vruoccole, Né scarpe io aggia sane, e manco zuoccole. Se canto cchiù d' ammore, aggia li ture Che gliottere non pozza, ed aggia famma,
E stia senza manciare e co l' abbramma. Se canto cchiù d' ammore, a sse chianure Siano le torza scure; Se canto cchiù d' ammore, me venga de sei rotola
No vruognolo, na guallara e na vozzola. E 'n frutto, o Cecca mia, de st' arma sciamma, Se voglio maie d' ammore cchiù cantare Pozza deventare aseno e arragliare!
Trivoleia, o canzona: Ma si volesse Ammore che cantasse, Di' ca n' è tiempo cchiù de guste o spasse: Ca Cecca mia se le pportaie cod essa,
Né li sospire miei so' quacche bessa.
Cookies on Poetry Cove