Iette addove se venneno li zuoccole,
Ca nc' era festa, e sùbbeto sedietteme;
'Ncigno a cantare, e quanto ca vedietteme
Attuorno uommene, femmene e piciuoccole!
Cantaie co tanta belle sghirignuoccole
Che laudare da tutte llà sentietteme.
Io me ne iea pe l' allegrezza 'nzuoccole
E p' avantarme, po', disse e sosietteme:
“Che benga Arfeo, o s' auto è che mo pìccase,
Ca chisto calascione mio ccà sbòzzalo,
E chillo cchiù, che cchiù se 'ntoscia e 'ngrìccase !”
De gusto io mo leccavame le ghiedeta,
Quanno me sbregognaie no sauta — e — tozzalo:
“Sona co mico !”, disse, e sparaie pedeta.