Chill' uocchie straluciente e zennarielle,
Ch' avanzano a le gatte sorïane;
Chille capille iunne e recciutielle,
Cchiù luonghe de le fune de campane;
Chelle zizzelle fatte a panarielle,
Che mellune parettero de pane;
Le ciglia co li pile 'ncrespatielle,
'Nnarcate comme a l' anche de li cane;
Le mmano ianche cchiù de na recotta,
Chillo pietto pastuso (o bene mio!) ,
Tutto de nzogna 'mmottonato sotta,
Già co ste cose, aiméne, è ghiuto a Cchiunzo,
Ca ne l' ha Morte scervecchiate, ed io
Peresco, pe la doglia, comm' a strunzo!