Steva facenno de lo spantecato
Dove s' affaccia Meneca lo iuorno,
E passïanno co la mano a lato
Pareva no cavallo de retuorno.
Meneca, creo pe fareme no scuorno,
Me 'mmertecaie de vroda no pignato,
E fu lo ppeo ca 'n fronte appiccecato
No vruoccolo restaie, che parze cuorno.
Essa me vedde, e se pigliaie piacere,
Stanno affacciata a la fenesta, soda,
Fegnenno lo dammaggio non sapere.
Comm' aseno restaie senza la coda,
E disse: “O Ammore, e che me faie vedere?
Ad aute daie la carne, a me la vroda !”