Uocchie miei, che bedite ? Uocchie doliente,
Lo sole vuosto, aimé, vecco aggrissato:
Veccote chillo strummolo scacato
Addove attuorno avévamo contiento!
Veccove fatte misere e pezziente,
Ogne gran bene vuosto è appalorciato,
Vecco, lo cane nigro nce ha cacato
A l' allegrezze, pe ve da' trommiente.
Vecco bello scassone ha fatto Morte
Vecco ca le bellizze n' ha zampate
Pe farve tanto cchiù chiagnere forte.
Uocchie, chiagnite, e manco arreposate!
Faciteve, o de chianto afflitte porte,
Pe tanto spisso chiagnere, scazzate!