Cianna lo lazzespingolo chiammaie,
Che l' aspettava abbascio a la portella,
Quanno mese lo pede, e sciolïaie,
'Ncoppa a na cacca de na peccerella.
Essa tutte le grade vrociolaie
E bona se sciaccaie, la poverella:
Ma creo ch' Ammore, pe le dare guaie,
Llà ghieze a devacare le bodella.
O bella prova che faciste, Ammore!
Perché non ghive a cacare a lo ponte,
O dinto a quacche stalla de Signore?
Ma tu, che stare no' le puoie a fronte,
Sperciare non potennole lo core
L' haie fatto buono rompere lo fronte.