Chella, che de bellizze fu sfonnerio,
E passaie Ciulla, Renza e Colaspizia,
E Rosa e Schiattacantare e Pommizia,
E fece d' ogne bella no streverio;
Chella, che fu d' ogne bertute arterio,
E benze a fila' stoppa nfi' a Grannizia,
E meglio assaie cosette de Fenizia,
E tanto sappe, che fu betoperio;
Chella, che s' essa te sguardava schitto
T' annivenava, o stisse a monte o a chiano,
Si camminave o vero stive fitto,
Se n' è allicciata, bello, chiano chiano,
Ed ha lassato chisto munno affritto,
Che senz' essa pigliato ha già vaiano.