5

Me diceva chell' arma benedetta De zia Chiarella Vusciolo la sera, Quanno a la cemmenera Stevamo attuorno tutte quante 'n chietta,

Cose che beramente Farriano stravedere, affé, le gente; Io mo, ch' era figliulo, avea gran gusto A n' addore d' arrusto

Senti' no cunto, e massema de chille Che non so' de quarchiamme o de verrille. Na vota me contaie, nfra l' aute cose, Ca dinto a certe grutte astrette e scure,

C' hanno tutte le mmure Che feteno de muffa e schefenzose, Sta la 'Mmidia arraggiata, Vecchia pezzente, secca e spremmentata;

E de cchiù, ca se gliotte a no voccone No vuotto o no scorzone, E ca sempe l' è attuorno, e dinto o fore, Lo despriezzo, li guaie e lo dolore.

Mo a sta cosa, affé, quanto cchiù penzo Quanto la voto cchiù pe la mammoria, Trovo ch' è bera storia, E non cunto de l' uorco o Masto Rienzo.

Vecchia, perché nascìje Da chisto munno, e da li guaie ascìje; Pezzente e secca perché sente pene Quann' uno ha quarche bene,

E de lo bene d' autro sta scontente, Ch' a essa fa cchiù male ch' a la gente. Ha lo despriezzo dintro a le stentine Pe dire male d' ogne poveriello,

E comme a taccariello Le fa la lengua, e pare che manciato Avesse ogne matina Lengua de ciàola o culo de gallina.

Quanta vote, pe 'mmidia e pe schiattiglia, Uno entra 'n crepantiglia? E perché male ad aute non pò fare Le cerca co la lengua sbregognare.

Sarrà quacche poeta, ommo fammuso Che nfra poete portarrà corona, Ch' ogne perzona bona Lo stimma pe saputo e bertoluso:

Quanno no zuca–allessa, N' allorda — carta, no spechiechia e sguessa, Sgarra — conciette, pe la 'mmidia dice Ca sto vierzo è 'nfelice,

Ca sto concetto è scuro ed è 'mmrogliato, E non s' addona ch' isso è no sciaurato. Veccote no pezzente, a n' ommo ricco Le dice, saiettannolo co l' uocchie,

Ca s' ha fatto li cuocchie Perché è baggiano, e bòle ave' lo cricco, E non have pedale, E a mmuro a mmuro sta co lo 'spetale;

Ch' a la casa tu puoie ioca' de ronca: Se na strenga se stronca, Se sbraca; e de cammise n' ha petaccia, E li pedale l' ha de carta straccia.

Se va na bella femmena a na festa, N' auta, ch' è brutta, pe la 'mmidia dice Ca pare iusta alice, C' ha lo mugno a brachetta e ch' è na pesta;

Ch' aggobbat' ha li rine, C' ha l' uocchie nigre, e s' usano torchine; Ca porta granne assaie lo guardanfante, E tanta cose e tante

T' accaccia, pe schiattiglia e pe la 'mmidia, E se la contradice, cchiù proffidia. E s' a na chiazza nce sarrà quaccuna Che se 'ncigna a na festa no dobbretto,

A n' auta no corzetto, Dice lo munno: “Ssa faccie de luna C' ha fatto a lo marito Senza parti' da Napole i' a Cornito,

Ca mancia buono, sforgia e stace allegra”: E chella, scura e negra, Pe se fare na robba o na gonnella 'Mpegnato s' avarrà la caudarella.

Ed è lo peo, po', ca le qualesse Cacciano tanta 'nfammie e betoperie Che cchiù de li cauterie Feteno, e fuorze fuorze cchiù de vesse;

Tanto che pe chiarire Le cose, 'n frutto, t' abbesogna dire Quant' haie fatto, si 'mpigne o s' haie vennuto, Pe leva' llo cornuto,

E sì forzato che li fatte tuoie Le sprubbeche, si vuoie o si non vuoie. Accossì propio soccedette puro A na perzona meglio de le meglio,

Poledora Sberneglio. Sta Poledora avea lo core puro, Le parole coiete, E se faceva ammare da le prete:

Ed accossì, da tutte le perzune, Tofano Tretaccune, Marito de Sberneglia ed ommo raro De l' arte soia, ch' era latrenaro.

Na sera chisto portaie mille 'mbroglie E disse: “O Poledora, bella mia, No' 'ntrare 'n cardacia S' aggio portato trippa, carne e foglia

E maccarune e caso: Perché sta sera m' è scontrato a scaso Compà Paziezo Capo–de–cognòle, E m' ha ditto ca vòle,

Fatto c' ha no servizio, o a lo cchiù duie, Ciancolïare craie 'nzembra co nuie. “Cucina allegramente, agge pacienzia; E mente che n' avimmo nuie zitelle,

Porta tu le scotelle, Da' a bevere e fa bello leverenzia”, E la mogliere disse: “Farraggio, affé, cose che maie vedisse !”

Veccote venne po' compà Paziezo, E disse: “Strunzo 'mmiezo! Bonnì, commare, lassa la conocchia. Compà, lo Cielo me ve guarde 'n cocchia”.

Subbeto ièro a tavola a sedere Tofano co Paziezo; e po' gliuttute Duie muorze cannarute, Tofano fece zinno a la mogliere

Che lo gotto portasse A lo compare e niente non parlasse: Cossì, mente Paziezo fatto aveva No brinnese, e beveva,

Senza malizia, a la 'mpenzata, allora Scappaie no gran vernacchio a Poledora. Da vocca se levaie tutt' a na botta Lo bicchiero Paziezo, e a bocca aperta

Rstaie, ed a l' allerta S' auzaie, e quase ca se cacaie sotta; Volea fui': ma fu Granne lo iaio, e lo terrore chiù,

Che ghiappe–iappe fecero le gamme. A Tofano la famme Passaie de botta pe la gran paura, E pe cacciarla nce volea na cura.

Poledora Sberneglia, c' avea fatto Chillo streverio e chillo gran fracasso Non se parte no passo, E pe scuorno dicìje: “Perché no' schiatto?

Aimé, che betoperio! Che n' esca fuoco o nc' entra vesenterio, E cuorno e palo e perteca e no vommaro, E facciano no gliuommaro

De ste bodella ! E tu fanne mennette O terra ! Che non t' apre e bivemette ?” Vecco ca s' apre sùbbeto la terra E Poledora scura se gliotti';

Quale cadenno ghi' 'Nnante a lo Re che li vernacchie 'nzerra E le scapola quanno Pïace a l' assoluto suio commanno.

Dove arrivata disse po' lo Re: “Che cosa vuoie da me ?” Disse essa: “E tu chi sì, varva a pennacchio ?” Respose: “Io so' lo Re d' ogne bernacchio”.

Poledora, sentenno tale nova, Le contaie ogne cosa pe lo filo; E quase ch' ogne mpilo Pe la vregogna 'nduosso se l' accova.

Disse ch' asci' de posta Chillo vernacchio, e no' lo fice a posta, Ed: “Arremmedia, Vosta Autoretate”. Lo Re disse: “Fermate,

Olà, vassalle mieie ! Ccà ! Che se chiamma Lo pìdeto c' ha fatto sta Maddamma!” Sùbbeto mille pedeta corrèro A fa' l' obbedïenzia de lo Re;

E trovatolo: “A te, Dissero, vò lo Re”. Sùbbeto ièro; Ed arrevate llà Disse lo pedetone: “Eccome ccà.

Che me commanne ?” E lo Re disse: “Or su, Passa ccà 'nnanze, tu. Dimme: da cuorpo a chesta comme asciste? Essa te fece, o tu pe te nasciste ?”

“Signore, disse chillo pedetazzo: Sacce ch' io me sentea tanto gagliardo Che manco no petardo Me poteva sta' a fronte a fa' scamazzo;

E cossì non poteva Cchiù stare 'nchiuso, anze d' asci' spereva, E comm' essa chieàise no tantillo Io 'sciette co no strillo

Tanto forte e terribbole ch' io stisso Pe no pezzullo ne rommase ammisso”. “Buono vassallo mio, io te perdono, Lo Re disse. Perché faie sti sciabbacche?

Pìgliate ste patacche, Ca so' treciento, tutte te le dono; E faccio io mo pe te Che sto vernacchio sia scordato, affé”.

Accossì ditto isso appuzaie la groppa E fece che llà 'ncoppa Poledora sedesse, e po' sparaie No pìdeto che sopra la portaie.

Comme lassaie a chille, essa accossì Tutte duie le trovaie: mieze strasiecolo, E quase iute 'nziecolo; Quann' essa disse: “E che facite, di'?

Mancia, compare, su! Tofano mio, pecché n' ammaglie tu? Allegramente, priesto, che cosa è? Vive, marito, te' !”

Cossì dicenno fece che manciassero E parze che da suonno se scetassero. Ora la festa granne e la preiezza Che Sberneglia facette appriesso, po'

Chi contare la pò? E comme se vestette, isce bellezza! Tanto che Poledora Non parea cchiù ciantella ma Signora.

Lo vicenato che bedette chesto Disse: “Lo fatto è lesto: Poledora fa sfuorgie e ba de spanto? Affé, ca senza pile n' è lo manto !”

Tante cose accacciaino e tanta 'nfammie Ch' a l' aurecchie le vennero no iuorno (Se trattava de cuorno: Cosa da fare smerteca' le lammie!)

A Tofano, che cierto Poteva pe nfi' a l' uocchie ire scopierto. Nfra l' aute na commare 'mmidïosa, Na perchia, na zellosa,

Na votta — schiatta — cantare, na vacca, Ch' ognuno la chiammaie Cacapatacca, Dicette pe la 'mmidia, e che scriasse! : “Commare, e comme faie tu la baggiana?

Che fuorze sì pottana? Chisse so' troppo sfuorgie e troppo schiasse. Tu non vieste ordenario; Vì ca pe no cornuto volontario

Marìteto 'n galera, affé, ghiarrà, E da sta chiazza cca (Perché, commare mia, iette gran fieto) Bello te sentarraie mo no sfratteto.”

A Poledora cadìje travo 'ncuollo Quanno sentette di' tanta 'mmecidie, E disse: “So' le 'mmidie, Commare, e non m' agg' io rutto lo cuollo,

Ca songo stata sempe Na femmena 'norata a tutte tiempe; E s' io sti sfuorgie pozzo fare, e cchiù, Sienteme perché, tu”.

E cossì le contaie quanto socceze Ed ogne ncosa qualemente ieze. Cacapatacche che sta cosa 'ntese, E comme iette, e quanto le sorti':

“Voglio fare accossì Pur' io, disse nfra d' essa, e fa' ste spese !” 'N frutto che ghi' a la casa E dicette a Pantullo Pisciavrasa

(Ch' accossì lo marito se chiammava) Ch' a Compà Leccavava 'Mmitasse la matina; e chillo venne Correnno comme auciello c' ha le penne.

E mente a Leccavava dea lo vino Cacapatacche, s' aiutaie a spremmere E co la mano a premmere Ed a 'ncarca' la panza co lo schino:

E fece accossì 'ntista Na meza vessa, affocaticcia e trista; E fatto chesto essa dicette po': “Gliutteme, terra, mo !”

La terra aprette sùbbeto la vocca Ed a lo Re ne la portaie de brocca. Lo Re la 'nzammenaie, e canosci' Ca pe la 'mmidia fatt' avea lo pìdeto,

E quase co lo jìdeto Da tu — me — 'ntienne l' avea fatto asci'; E ca l' avea, de cchiù, Tanto affocato che non fece bu.

Perzò, avennolo acciso no vassallo, Voze che tanto fallo Se castecasse: e così facette ordene Ad ogne nfieto che se mecca 'nn ordene.

Mille vesse crepate llà benettero, E bernacchie de viecchie e de figliule, Loffe de cane e mule E pedeta 'ndeggeste po' correttero,

Co li fiete de chiaveche E de latrine rotte pe le fraveche: Ed ordenaie a tutte quante 'nzemma Che senz' avere fremma,

Pe casteca' Cacapatacche, ognuno La sfommassero bello ad uno ad uno. Dapo' che sproffommata fu accossì Ne la mannaie pe na latrina ad auto,

Tutta chiena de smauto. Conzidera tu mo comme sagli'! Cossì restaie chiaruta Cacapatacche 'mmidïosa e astuta.

Vecco che fa la 'mmidia: e perzò bravo Cantaie 'n tiempo de vavo N' ommo saputo sotta a l' urme e a l' acera: “La 'mmidia, figlio mio, se stisso macera”.