Quanno, stracquato, Apollo se n' è ghiuto
Gialluoteco a corca' sopa a lo lietto,
Va lo massaro a rendere trebbuto
A Morfeo, che pe l' uocchie dà de pietto.
Lo puorco a lo mantrullo 'mbrodoluto
Va, e la gallina cerca lo recietto,
L' aseno arraglia, c' ha lo suonno 'mpietto,
Strilla lo voie ped essere asciogliuto;
Cossì la tigra, l' orza o lo lione,
La pecora, la crapa ed ogne auciello
Se reposano l' ossa e lo premmone:
Ma sulo io, sfortunato e poveriello,
La notte giro comme a sportiglione,
Perché così me va lo cellevriello.