Oh sfortonato, oh poveriello mene,
Oh tinto cchiù de culo de tiella,
Ca morta che sì, Cecca, ecco ca vene
A li contiente miei la pelarella.
Mo me ne addono, o Cecca, aiméne, aiméne,
Ca fu, lo curzo de ssa vita bella,
Curzo chino de priemmete e de pene,
E po' se resorvette 'n cacarella.
Tu pollecino, e Morte fu bozzacchio:
Ssa grazia appalorciai pe le staffette!
Ssa bellezza a lo viento fu pennacchio!
Ah, ch' appena appari' e che po' sparette:
E chessa vita è stata no vernacchio,
Ch' appena se senti', quanno morette.