Quanno te veo da sso cafuorchio 'scire,
E co ssi belle zuoccole passare,
Sso tuppe–tuppe che me fai sentire
Te dico ca me fa strasecolare.
Io sempe a lo tornare, a lo benire,
Sentire te vorria zoccolïare:
A n' auto sto fracasso fa stordire,
Ed a me sulo me fa recrïare.
Io lassaria na museca a taccone
Fatta da Iacoviello 'n concorrenza,
E de sentire l' arpa e lo trommone!
Si de lïuto, Ammore, stai de senza,
Ed hai golìo de fare quatto suone,
Pigliate chille zuoccole de Renza.