O Ammore, vasta ! N' è lo vero, di',
Ca me dellieggie e ca me truffe tu?
E si te chiammo e dico: “Ammore, uh, uh,
Fornaranno ste doglie, none o sì ?”,
E tu respunne e fai: “Chichirichi!
Quanno sì biecchio, che non vale cchiù”.
S' io dico: “Moro !”, e tu me fai: “Cù–cu' !”,
E me dellieggie e me cuffìje perzì.
S' io dico: “Ammore, vuoi che crepa, neh?
Che te ne pare, e mbe' ?”, fai l' eco po'
E comme a piecoro respunne: “Mbè !”
S' io dico ca chiagnenno sempre sto
Tu respunne: “Oh !”, e no' lo cride, affé,
E pe schiattiglia suone lo crò–crò.