4

Ferma, su, Masto Paziezo, Ccà facimmo na Lucia! E se mecca strunzo 'mmiezo A lo ghire pe la via:

Vide Zoza, ca sta lesta Pe bederce, a la fenesta. Vecco llà Grannizia e Lella, Ciulla, Perna e Carmosina,

Margarita e Porzïella, Rosa, Cianna e Fragostina, E ciento aute fresche e grasse Regginelle de vaiasse.

Ma nfra tutte ecco llà Cecca, Che de st' arma sola è core; Né cod essa se nce mecca Cocetrigna a lo sbrannore,

Perché avanza co na cera De bellizze nfi' a Meggera. Li capille curte e ricce, 'Ncrespatielle, a sciuocche fatte,

Iunne cchiù de li pasticce, Danno a tutte schiacche matte: E resta' fanno confusa Co le trezze soie Medusa.

Chillo fronte stralucente Pe chi tutto abbampo ed ardo È cchiù lustro e resbrannente De na cótena de lardo;

So' l' aurecchie ianche e belle, Cinco deta longarelle. So' le ciglia, o belle cose! Né chist' è cunto dell' uorco:

Ca deritte so', pelose Comme a setole de puorco; So' le chiocche 'ncafutate Comme a boccola spennate.

Ma de l' uocchie chi contare Pò li lampe e l' auto riesto? Si è pe chesso, ognuno pare Pertusillo de no tiesto;

Le parpetole so' pone Scarnatelle, ma so' bone. Chillo naso sproffilato, Auto a cuollo e moccusiello,

Si be' è luongo e sta 'ncriccato Dace a tutte gran martiello; E facenno no sternuto Dà no chiarfo pe trebbuto.

Doi saucicce saporite So' li lavre tostarielle E na 'nzerta so' d' antrite Chille diente grossarielle;

Ed è tanto la vocchella, Quanto cape na panella. Chella facce ianca e rossa, De colure 'mpetenata,

'Nforchia n' arma into na fossa, Ma de guste conzolata: E nce pare a sto paiese Mascarella ferrarese.

Tene ianche doie zizzelle Che ne 'ncaca a Galïone: Si se move o fa squasille Fanno 'mpietto tordeglione:

E le ppuoi tenere 'mbraccia Comme a bertola o vesaccia. So' doi ronche le bracciolle Da stronca' le pene meie:

Chelle ddeta corte e molle, Le manzolle (aimé, ched èie?) So' retonne e 'mmessicchiate Comme a provole 'mmorrate.

Belle coscie have, e sottile, Gamme corte, tonne e grosse: So' li piede po' gentile, Si be' mostano assai l' osse;

E le scarpe so' attillate Dece punte e sgavigliate. Dove lasso lo ventrillo? Zitto, aimé, ca so' 'gnorante!

Strunzo arreto ! A sto tantillo Non passammo tanto 'nnante, Che quaccuno, arrasso sia, Me 'ncantasse Cecca mia.

Su, Paziezo, de cchiù sciorte Sona mo ch' io sauto e canto: Fa' catubba e sona forte, Fa' ch' ognuno n' aggia spanto.

Vì sti saute e repolune? Siente appriesso ste canzune: Chi vedere vò lo sciore, Lo sbrannore

De la Loggia e de la Zecca; Chi vedere vò la vera Primmavera, Lassa tutte e vega Cecca,

Cecca mia, Ca non dico la boscia. O Lucia, ah Lucia, Lucia, Lucia mia,

Stienne sso musso e nzeccate ccà! Vide sto core ca 'ngrossa, ca sguazza, Auza sso pede ca zompo, canazza! Cucherecù,

Zompa mo su! Vecco ca sauto, ca giro, ca zompo: 'Nnante che scompo Zompa, Locia, ch' addanzo io da ccà!

Tuba catubba e nanïa nà! Si tu isse camminanno, Revotanno Da la Lecca nfi' a la Mecca,

Tu bellizze propio maie Trovarraie Che 'mparaggio stiano a Cecca, Cecca mia,

E non dico la boscia. O Lucia, ah Lucia, Lucia, Lucia mia, Cotognì, cotognì, cotognià!

Vide chest' arma ca scola, ca squaglia, Tiente, ca passo, sautanno, na quaglia! Cucherecù, Sauta mo su!

Vecco ca sauto, ca torno, ca roto, Vì ca mme voto: Sauta, Lucia, ca zompo io da ccà! Uh, che te scuosse, e pernovallà!

Ceda a Cecca ogne zetella Cianciosella, Né cod essa se nce mecca; Ceda 'n frutto ogne baiassa,

Perché passa De bellizze a tutte Cecca, Cecca mia, E non dico la boscia.

O Lucia, ah Lucia, Lucia, Lucia mia, Cocozza de vino bona me sa! Vide, canella, ca tutto me scolo,

Tiente, ca corro, ca roto, ca volo! Cucherecù, Rota mo su! Vecco ca roto, ca corro, ca giro,

Vì ca sospiro: Rota, Lucia, ca scompo mo ccà! 'Ngritta, ca 'ngritta, e cuccarasà!