4

A chillo tiempo ch' era viva vava De Capoa lo Verlascio E de cuoiro correano le monete, Dice ch' a chella aietate nfi' a le prete

Corzero a bottafascio A la vertute, tanto se prezzava: Ed a chille poete e musechiere Corzero li sommiere,

E le serve e li vuosche e ogne anemale, E fecese appedisso no casale. Lasso ghire da banna, e arrasso stia, Chill' auto che scennette

A lo spreffunno, addove è parasacco: E fece tanto bello no sciabbacco Che Potrone dicette: “Mo che sì sciso, a la bon' ora sia!

Sso canto m' ha 'ncantato; vì, che buoie? “Da', pe li muorte tuoie, Bello paputo mio, chillo dicìje, Moglièrema Rarice”; e già l' avìje.

Mille aute cose che facette a branca, A chille tiempe 'ntanno, Bella vertute, chi le pò contare? So' cchiù che stelle 'n cielo, arena a mmare,

Punte e momiente a l' anno, E mosche pe le stronze e pe le chianche! E mo, vertute, dove sì scrïata? Dove sì appalorciata?

Ah, ca te fa cocca' senza ave' cria La canna, l' ozio e la potronaria! Ma che dich' io ? E comme so' bozzacchio, Brutto piezzo d' Antuono!

Non sì scriata, no, non sì foiuta Ma sulo è ca non sì cchiù canosciuta; Anze, te sanno buono, Ma te teneno, vì, peo de vernacchio.

Mo no Signore fa cchiù stimma assaie De sentire doie baie Da no licca–scotelle, no boffone, Che Arzeneca, che Tullio e che Pratone.

Nc' èie ommo che cchiù prezza na varvetta, No levriero, ch' a grolia Tenere 'n casa trenta vertoluse; Auto ha lo core a lo donare 'nchiuso,

E puoie sonare a grolia E dire ca Vertute 'n cielo metta A chi l' aiuta, ch' isso se contenta Che n' aseno deventa

Puro che d' oro chiena aggia la sacca, E tene la vertute pe na tacca. Autro vòle ire linto e pinto 'n chiazza E fare mille sfuorgie,

E de lo riesto, po', cercame tutto: Si pe sciorta vò dicere no mutto, Farrà comme l' alluorgie, Che sonano se tozzola la mazza.

Zoè: iarrà a consurta a no pedante, O a quacche stodïante, Pe sape' c' ha da di' s' uno dicesse Si so' tutt' uno vàllane ed allesse.

Uno refonne a tommola li scute A guaguine ed a perchie, Che mente le refuste danno guste, E po' desguste, quanno no' refuste,

E co mille coperchie Te fanno torna' l' uommene papute. N' autro a li roffïane o a li spïune Refonne pataccune;

Ma no saccente, po', vaga e addommanna: Te puoie mori', ca non te sputa 'n canna. Fa' bierze quanta vuoie e fa' soniette, Fa' libbre e po' le stampa,

Va' l' appresenta, c' haie preiezza 'nzuonno! Perzò te trovarraie l' uoglio e lo suonno! Nce refunne la stampa, E li miezze abbesogna che nce miette

Quanno vuoie da' lo libbro, e l' appresiente; E nce fatiche e stiente, E po' n' haie doie parole cortesciane: “Commanname”, e tu rieste senza pane.

Anze, ca manco male sarria chesto: Ma lo ppeo è sentire Ch' ognuno te delleggia e n' ha ndelletto. Va' addommannalo a Cacapozonetto,

Vì che se sente dire: “Pigliate chesso, e torna pe lo riesto !” E quanta baia fanno a sto paiese A Dottore Chiaiese?

Che stimma fanno d' isso ? E peo de chillo, Povero Sbruffapappa e Sio Pezillo. È Cacapozonetto no Dottore, Ommo saputo (uh quanto!) ,

Ed have li Digiestre sotta coscia; E perché ba che pare na paposcia, Né portaie maie no guanto, Né straccia seta, a chi se fa mo 'nore

Perché è no poverielio, ed ha ste pene Ch' è n' ommo assaie da bene, Né maie è stato, comme songo mille, 'Mbroglia — prociesse e scotola — vorzille;

Perzò tutte le fanno mo l' abbaia. Né ppò lo sfortunato Camminare pe Napole lo iuorno, Ca mille peccerille le so' attuorno,

Gridanno p' ogne lato: “Ehi, Cacapozonetto !” Vì che chiaia, Vì che posteoma se le fa, scur' isso! E chesto è spisso spisso,

E tanto so' a le bote li mmarazze Che pe sarvarse fuie a li palazze. O bona Astrega addotta, o legge bella, Comme tu mo compuorte

Che se faccia sto scuorno a chi te serve? Nce vòle no sceruppo auto che d' erve Pe caca' sti sconfuorte, Né priemmeto ce abbasta, o cacarella.

Tu mo, c' haie la valanza e faie lo giusto, Va' lle da' quacche gusto. Eilà, non siente ? Fusse sorda tu? Ma oimé! , ca 'n terra non te truove cchiù.

S' è pe Chiaiese, pone, è no saccente, Oratore fammuso, Ed have la rettoreca a cantara. Ma che ne voglio fare, o sciorta avara?

Perché è no vertoluso Ed è ommo da bene, è no pezzente: Ma s' isso fosse quacche marranchino, O quacch' otra de vino,

Sarria tenuto pe no Re de coppa: Mo le fa ognuno la varva de stoppa. Quanta vote va appriesso a na carrozza Poco manco doie miglia,

Dicenno sei conciette a tre parole: Ca dice cose da ferma' lo sole! A chi frìsole piglia? Chi le dà p' accattare na cocozza?

Face comme a gallina, e scacateia: Chi nc' è che se ne preia? Sulo quaccuno che bò mille rise Na pubreca le dace, o duie tornise.

Sfortunata rettoreca, che primma Te stirave la cauza, Mo, poverella te, sì ghiuta a Chiunzo! E stanno pe manciarese no strunzo

Peruto e senza sauza Chi mo de te fa cunto e ne fa stimma, Tanto stanno abbrammate ed allancate! Isse, le sfortunate,

Se cresero auza' famma e ghi' pe l' aria: E mo t' asciano donna mercennaria. Ma fremma ! Addove lasso Sbruffapappa? Poeta, arcepoeta,

Sciore de Puorto e grolia de Napole, Che fa li vierze suoie comme a l' ova apole: E quanno canta sceta Fi' a li muorte, e li vive appila e attappa,

'Ncanta li viente e fa appraca' lo maro! Va' di' a lo Lavenaro Quanto fermate ha fatto sta' le fraveche E a canna aperta, pe senti', le chiaveche!

Quanta soniette ha fatte, e quanta vierze Accossì sciuoute e 'n sdrùsciolo, E quanta barzellette 'n toscanisco? E chi ha cacciato lo cantare a sisco?

Chi lo dicere vùsciolo? È poeta co bierze e co revierze! E chi 'mmentaie: “Masto Ruggiero, di', Che pare n' Uccialì ?”

E chi lo dicere: “Auza l' attaccaglia”, E po' respunne: “Lassal' i', ch' è paglia”? Isso puro accacciaie chella canzona: “Aimé, che fosse ciàola,

E te decesse 'mmiento na parola: Ma non che me mettisse a la gaiola !” E chella de: “Zia Paola, Quanno n' haie freve è signo ca staie bona;

Aggio perduto lo galluccio mio, Titì, titillo mio! Riviezzo mio, reviene, e passaricolo, No' mme ne fa' morire pe no spicolo”.

E tanta cose, isce bellezzetudene! , Chi contare le pò, C' ha fatto Sbruffapappa a branca e a tommola? Vì chi l' ha dato manco doie grisommola!

Ed è lo peo, dapo', Ca voleno le gente a mortetudene Canzune non de vrenna. Lo chiappo che le 'mpenna!

Te veneno a fruscia' li cularine, E non c' è taglio maie de duie carrine. Fa cunto, mo, ca sto poeta scuro Non pò campare cchiù,

E fa pe tre tornise cinco ottave! Maie non se vede satoro de fave, Va comme a no cucù E comme à sporteglione pe lo scuro.

La cappa sola è manco de na pettola: Perzò comme a cevettola Esce de notte, e l' have Micco Auliva 'N obrecanza accusata a la Vagliva.

O bella Poesia senza tre cicere, O Apollo, lo mmetallo Che gnienete a lo munno, addove è, di'? Comme a le gente toie tratte accossì?

“O povero cavallo !” Sto mutto a li poiete se pò dicere: Sì l' uocchio de lo munno e non ce vide? O fuorze no' lo cride?

Vì ca pigliato ognuno ha mo vaiano Senza na crespa 'n crispo a lo crispano. Ma che dirraggio de Pezillo ? Va', Aiutame tu, Musa:

Euterpe mia, sta vota attocca a te; Po' de lo riesto lassa fare a me. Che non ce fusse schiusa 'Nfruceca mo; ma tu non parle, sa,

Perché ca non haie facce, ed haie vregogna, Ca chisto te sbregogna: Ma conzidera ch' è no gran sesurro Quanno la panza fa comme a tammurro.

Perzò, decimmo nuie, Pezillo è n' ommo, Musechiero de sfuorgio, Che paro ad isso maie non ne nasci'; Mo da ccà, mo da llà lo vide asci',

E pe na vranca d' uorgio O na panella c' ha da Titta o Ciommo Te canta e te dà gusto na mez' ora: “Vienola a mammagnora !”

Te dice, e po': “Ch' è pesce e non è pesce, Chi l' ascota, no parmo, affé, cchiu' cresce”. E s' isso na retaglia have de caso Da quacche casadduoglio,

Lloco te fa passaggie a gargariseme; Ma cchiù l' afferra po' li parasiseme Si le dà n' arravuoglio De quaccosa ch' a tavola è remmaso

Quacche zetella, o cosa de cucina, Cótena e pettorina, Quanto te dice po': “Oh de la pergola! , Vorria parla' co ttico, e non co màmmata”.

E po' te dice co na voce 'sprìceta: “Vaga bella Sirena Si potete col canto”, e fa no vienola, E po' cagnanno voce de cchiù sciorte:

“Farmi dolce la pena”. Lebbreca spisso spisso, e se solliceta Pe dare gusto a chiste ed a chill' aute, E fa crovette e saute

E non se cura ave' da li piciuoccole N' annicchio pe no truocchio o pe duie vruoccole. Tanto, che la vertute ecco addove è, E a che tenute so'

Li vertoluse a chiste tiempe ccà. Vertute mia, covernamette, sa! Agge pacienzia mo, Sto munno tutto quanto è contra a te:

E si è pe buie, simmo sprezzate cchiù Assai che non sì tu, E ogne pacchiano dicence accossì: “Galle, cantate, su ! Chichirichì !”