Si mancio o vevo sto penzanno a Cianna,
Ch' a na taverna me ferìje sto core,
Ed ogne mmuorzo che me 'mpizzo 'n canna
Me 'mpizza 'mpietto na saietta Ammore.
Pe mme lo vino èie acqua de dolore,
Fèle me sa lo zuccaro e la manna:
Ietto li grutte e li sospire fore
Tanta è la passione che me scanna.
Vorria ch' Ammore, quanno me fa sete,
No' mme portasse a bevera' a lo Tevere,
Ma a chillo sciummo che se chiamma Lete:
Grazia cchiù granne no' porria recevere,
Pe bivere ste quatt' ore coiete,
Fuorze me la scordasse co lo bevere.