È morta Cecca ! E mo che Cecca è morta
È muorto ogne contento ed ogne spasso:
Napele sta 'n trommiento e sta 'n fracasso,
Ca non c' è nullo cchiù che lo conforta.
Aimé, ca Morte sempe fa sto schiasso,
E le meglio ne zampa e se le porta.
E tu lo bide e lo compuorte, o Sciorta?
O Sciorta, cruda cchiù de Sautanasso!
Tu faciste tornare a Cecca mia
La vita, comme a bino cuotto 'n tierzo,
Pe fa' a li guste miei 'mmattere scria.
Vecco, non canto cchiù, ma chiagno sulo:
E si pe sciorta canto, è chillo vierzo
Che fa de meza notte lo cuculo.