Tolla, che nne vuoie fa' de sto spellecchia
Che sempe te scorcoglia e te 'mpapocchia,
E mo na caudarella e mo t' arrocchia
Na còncola, no trépete e na secchia?
È squacquara, è bavuso ed è guallecchia,
Non te dà maie no fuso o na conocchia,
Sta sempe sicco comme a la restocchia
Ed arrappato comme a scarpa vecchia.
Pìgliate a mene e lassa sso vozzacchio,
Ch' è cchiù pezzente assaie de lo peducchio
E cchiù fetente assaie de lo vernacchio.
“Pagassece no pede o no denucchio,
Respose Tolla, 'mmiezo a lo Mantracchio,
E fusse accossì bello comme a Mucchio !”