O sbrannure, o gioielle, e comme iate
Tutte tre 'n chietta 'n commerzazïone?
O mazzo mio de vruoccole spicate,
Rammaglietto de st' arma e sto premmone!
Bene mio, cossì 'nzemma ne 'ncacate
A le Fate Morgane: e 'n crosïone
Vuie perzì de bellizze arcepassate
A Mecera, ad Aletto e a Trisefone.
Cierto parite d' arme la vorpara,
O no trépete site: ah, fosse io miso
'Ncoppa a sso trépete, tiesto pe caudara!
O vui tre, pe non dareme cchiù riso,
De tre legna faciteme na vara:
De ssa forca voglio essere lo 'mpiso!