Chiagno, o Sgruttendio, e trivoleio tanto
Perché lo core mio 'mpietto me frie,
E Narda, c' ha gran gusto de sto chianto,
Dice 'n vederme: “Sfratta !”, e bò che scrïe.
Ora tu, mo, che ssaie che cosa è chianto,
Conzidera che so' ste cardaccìe,
E tanto cchiù me 'ntòmmacano, quanto
Ch' essa me conzolaie mille golìe.
Mo s' io le dico: “Ferma, cornutella,
No' fa' che st' arma mia cchiù pe tte s' arda !”,
Mme fuie comme vedesse farfarella.
È chiena de senàpo la mostarda!
Lo maro che mme nega n' alicella
No tiempo mme donaie cchiù de na sarda!