Sgruttendio mio, pocca lo Cielo tanto
Le bertute t' ha chiòppete a lancelle,
Che daie a tutto Napole sto spanto,
E pare frate a le nove sorelle;
Bene mio, tu che puoie co chisso canto
Le tigre fa' tornare de freselle,
Famme Renza piatosa: che sto chianto
L' ha tenuto pe baia e bagattelle.
Tu co sso calascione tanto doce
Dille c' aggio li curze co le ghiute,
E comme 'nnanze ad essa io moro 'n foce:
Ch' io te 'mprommecco, 'nzigno de trebbute,
Bella conciata darete na noce
E dire: “Crisce buono !” se sternute.