De che manera io pozzo stare maie,
O maro mene, alliegro né contente,
Si fuie sempe da me, Betta pezzente,
Si me cresceno guaie e catalaie?
La cornacchia a li guste fa crà–cràie,
Li trivole aggio sempe de presente:
M' esceno da Levante e da Ponente
Le chellete che mai me 'mmaggenaie.
Me sa, si vevo vino, mmescetato,
Me feteno le foglia e li fasule,
E lo ppane me pare scriscetato.
Sto ghianco e russo comme a li cetrule:
E quanno sto a lo lietto stennecchiato
Li rescegnuole mieie so' li cucule.