3

Prencepessa, Monarchessa, De Proserpena gran mamma, Co le penne

Vienetenne, Ca chest' arma mia te chiamma. Co dui zumpe Viene, scumpe,

O Reggina de le spiche; Si lo Cielo, Si lo ielo Te ne arrasse da formiche.

Mone ch' io No golìo Aggio 'n cuorpo che me scanna De cantare,

De laudare Chille ch' énchieno sta canna, Tu conforta, (Vì ca 'mporta!)

Damme aiuto, o bella, mone, Ch' io già canto Lo gra' spanto De lo bello maccarone.

Na zetella Ionnolella, Addorosa de migliaccio, La farina

Cerne e affina Pe la panza de setaccio. Chella rota Che la vota,

Tappa tappa, n' è la chiave: Essa avanza, Chella ddanza De le sfere cchiù soave.

La trommetta L' arma 'nfetta De no core che guerreia, Ma lo suono

È cchiù buono De quann' uno grammoleia. Lo susurro De tammurro

Fi' a la morte l' ommo porta, Ma sentire Lo bollire De caudara te conforta.

Fu avantato Ca 'mmentato Arcomede no munn' appe: Cchiù è de spanto

E de vanto Chi sto 'nciegno fare sappe. Chillo sicco No palicco,

Si nce pienze, t' arreduce: Co la massa Chisto 'ngrassa De li muorze belle duce.

O sbrannure, O signure, Maccarune belle care, Chisto core

Che se more Vui potite sorzetare. Belle ianche, Vranche a branche

Da lo 'nciegno quann' ascite, S' a no panno Spase v' hanno La via lattea mme parite.

Si sospise Véove appise A le canne, st' arma dice: “Vui, o belle,

Le trezzelle Me parite de Bernice”. Si vui spase A le spase

State, e scise da la canna, Vui passate, Avanzate La corona d' Arïanna.

Quanno pone Belle e buone A na carta uno ve lega, In pesare

A me pare La valanza de l' Astrega. L' ommo vene Pe gran bene

A trovarve: o gran trasoro! Ped averve, Possederve, Cagna e sprezza pe nfi' a l' oro.

Nc' è quaccuno Che dïuno Non potenno de vui stare, Senza 'nfenta

Se contenta Fi' a le brache de 'mpignare. Sango mio, Gran golìo,

De sta vita arce–patrune, Io speresco, 'Scievolesco De provarve, o maccarune.

Si ve trovo, Si ve provo, Che gran gusto me ne piglio! Si ve gliotto

Me n' abbotto, De docezza me squaquiglio. S' io non tocco Vui, me 'ncrocco,

Io non pozzo arrecoiare: Me consummo, Väo 'n fummo, No' lo pozzo sopportare.

De ianchezza, Tennerezza, Le recotte vui passate; De sbrannore,

De sapore Li migliaccie nne 'ncacate. L' ammra bella, Ionnolella,

Tira paglia, è cosa vecchia! No pïatto De vui fatto Mille core ne scervecchia.

Li Segnure 'Mperature Quanno 'n tavola non v' hanno So' sperute,

So' spedute, E lo trivolo ne fanno. Addormenta Lenta e spenta

Co lo canto la Serena: Cchiù gostuse L' uocchie ha chiuse Chi de vui la panza ha chiena.

Calamita Tira ardita L' aspro fierro da llà 'ntuorno: Maccarune,

Li manciune Vui tirate notte e ghiuorno. A l' addore No Signore

Nce iarrà, de musco, a caso: Vui tirate L' abbrammate Comme a bufara pe naso.

Disse: “Io moro D' aver' oro !” Mida, e l' ebbe a li premmune: Sarria vivo,

Lo corrivo, Se magnava maccarune. Giove mio, Sto golìo

C' appe Mida a lo toccare, Ah, fa' tune Maccarune Quanto tocco deventare!

Fa', gran Giove, Si te move Lo pregare a 'passïone, Si Narciso

'N sciore è ammiso, Ch' io deventa maccarone.