S' era quanno lo sole appe lo sfratto,
A chillo tiempo che la notte resta
E de papagne semmena na cesta
Cchiù tiennere e cchiù frische de lo llatto.
Io me ne corze bello guatto guatto
Dove Renzolla tene la fenesta,
E nce sentìje n' addore de menesta
Che de la famme ancora me ne schiatto.
Gridaie, che parze lo lupomenaro:
“Scinne ccà, Renza, io disse, a chisto scuro,
Defrescame sto core tanto ammaro !”
Essa me 'ntese da no correturo:
“Defrescate, me disse, a st' aurenaro !”,
E 'n capo me iettaie no pesciaturo.