Non ne fa' tanta, no, maddamma ntroccola!
Non te piccare tanto, o sore mia!
S' io dico: “Schiavo de vossegnoria”
Tu fui cchiù che non fuie de gatta zoccola.
Che t' haie 'mpizzato a chessa chierecoccola?
Da dove t' è benuta ss' arbascia?
Siente, pe non fa' cchiu' la filastroccola:
Chi la stira la spezza, e n' è boscia.
'Ntòsciate mo si saie, statte 'n grannezze,
E sona sempe le ccampane a grolia,
Ch' ogne cosa se fa porva e 'mmonnezze.
Secca la fico moscia e l' uva 'nzolia,
Lo mmele puro perde le docezze:
Lo saccio ca non sempre lilia frolia.