Uh, uh ! quanto ne faie co ssa bellezza!
Comme te picche e staie 'ngarzepelluta!
E s' uno se sbarretta e te saluta
Manco lo sguarde e bai co l' auterezza.
Da dove t' è benuta ssa grannezza?
E comme de soperbia sì 'nfociuta?
Fuorze perché ca d' oro haie ogne ntrezza
Stai tant' auta la mano e 'ncepolluta?
Lo tiempo, ch' è la preta paragone,
Te lo scommogliarrà tutto a na botta
L' oro, ch' è miezo stagno e miezo attone.
Ride, ca se lo bello se ne trotta
Chiagnarraie, brutta ed arrappata, pone!
Sso caso giallo se farrà recotta!